မိူဝ်ႈၼႆႉ ဝၼ်းတီႈ 20/11/2024 ယၢမ်းၵၢင်ၼႂ် သိုၵ်းမၢၼ်ႈ ယိုတ်းမိူင်း ႁၢမ်ႈၵႃးတၢင်ႇၵုၼ်ႇ လုၵ်ႉမူႇၸေႊ လူင်းမႃးတၢင်းၼမ်ႉၶမ်း တီႈၶူဝ်ပၢင်ႇၶမ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။

ၵူၼ်းၼမ်ႉၶမ်း ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းမၢၼ်ႈ ဢၼ်ပႂ်ႉတီႈၶူဝ်ပၢင်ႇၶမ်းၼၼ်ႉ ဢမ်ႇပၼ်ၵႃးတၢင်ႇၵုၼ်ႇ လုၵ်ႉတၢင်းမူႇၸေႊ လူင်းမႃးတၢင်းၼမ်ႉၶမ်းၼႆႉ။ ဢမ်ႇဝႃႈ ၵႃးသႅၼ်းလႂ် သင်တၢင်ႇၵုၼ်ႇမႃးၼႆ ၶဝ်ဢမ်ႇပၼ်လူင်းမႃး။ ၵႃးတၢင်ႇၵုၼ်ႇ ဢၼ်တေမႃးၶၢႆ ၵၢတ်ႇၼမ်ႉၶမ်းၼႆႉ ၶဝ်ယင်းဢမ်ႇပၼ်မႃး။ လႅင်းၵႃးတႄႉ တၢင်ႇၵူၼ်းတႄႉ ပၼ်မႃးယူႇ။ ယဝ်ႉၵေႃႈ ၶဝ်သင်ႇၸဝ်ႈၵႃးဝႆႉ သင်လုၵ်ႉၼမ်ႉၶမ်း ၶိုၼ်ႈၵႂႃႇမူႇ ၸေႊ ပေႃးလူင်းမႃးၶိုၼ်းၸိုင် ယႃႇတၢင်ႇၶူဝ်းၵုၼ်ႇ သင် မႃးၼႆၶႃႈဢေႃႈ”- ဝႃႈၼႆ။

ထႅင်ႈၾၢႆႇၼိုင်ႈၵေႃႈ တႄႇဢဝ် ၵၢင်လိူၼ်ၼူဝ်ႊဝႅမ်ႊပိူဝ်ႊၼႆႉမႃး သိုၵ်းတဢၢင်း TNLA သမ်ႉ ယူႇတီႈၵဵတ်ႉဢေႊသျိူဝ်ႊဝေႃႊ ဝၢၼ်ႈၼွင်ၶၢင် ၼႂ်းၸႄႈဝဵင်းၼမ်ႉၶမ်းသေ ႁၢမ်ႈတေႃႉၼမ်ႉမၼ်းၵိၼ်၊ ၼမ်ႉမၼ်း ၸိူဝ်ႉၾႆး သူင်ႇၸူးတၢင်းဝဵင်းမူႇၸေႊ ၼႂ်းပိုၼ်ႉတီႈ သိုၵ်းမၢၼ်ႈ ၵုမ်းၵမ် ဝႃႈၼႆ။

“တေလႆႈဝႃႈ ၶဝ်တေႃႇၶဝ် ဢိုတ်းတေႃႇၵၼ်ၶႃႈဢေႃႈ။ သိုၵ်းလွႆသမ်ႉ ဢိုတ်းတီႈၵဵတ်ႉဢေႊသျိူဝ်ႊဝေႃႊ ဝၢၼ်ႈၼွင်ၶၢင် ႁၢမ်ႈၼမ်ႉမၼ်းၵိၼ်၊ ၼမ်ႉမၼ်းၸၢၵ်ႈၶိုၼ်ႈၵႂႃႇတၢင်းမူႇၸေႊ။ ယၢမ်းလဵဝ် တီႈၼမ်ႉၶမ်း၊ မူႇၸေႊၼႆႉ ယၢပ်ႇၽိုတ်ႇလိူဝ်ႁႅင်းဝႆႉ ၶွင်ၵိၼ်ယႅမ်ႉ ၶူဝ်းၵုၼ်ႇ ၸိူဝ်းၼႆႉဢေႃႈ။ ၵမ်ႈၼမ် ၶူဝ်းၵုၼ်ႇ ၶွင်ၵိၼ်ယႅမ်ႉၼႆႉသမ်ႉ လႆႈတေႃႉတၢင်းမူႇ ၸေႊမႃး”- ၵူၼ်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။

တႄႇဢဝ် ၵၢင်လိူၼ်ၼႆႉမႃး ၶၼ်ၽၵ်းၶဵဝ် တီႈဝဵင်းၼမ်ႉၶမ်း မိူၼ်ၼင်ႇ – မၢၵ်ႇၶိူဝ်သူမ်ႈ 1 ၸွႆႉ 15,000 ပျႃး – 18,000 ပျႃး။ ၽၵ်းၵၢတ်ႇမူၼ်ႇ (ကန့်လန့်ရွက်) 1 ၸွႆႉ 30,000 ပျႃး။ ၼိူဝ်ႉမူ/ ဝူဝ်းသမ်ႉ 1 ၸွႆႉ 38,000 – 40,000 ပျႃး။ ၼိူဝ်ႉၵႆႇ 1 ၸွႆႉ 30,000 ပျႃး ၼႆယဝ်ႉ။  

ၵူႈပွၵ်ႈ မိူဝ်ႈသိုၵ်းတဢၢင်း ပႆႇပိၵ်ႉဢိုတ်း ၼႂ်းၵႄႈၼမ်ႉၶမ်း – မူႇၸေႊၼႆႉ ၶၼ်မၢၵ်ႇၶိူဝ်သူမ်ႈ 1 ၸွႆႉ 5,000 ပျႃး။ ၽၵ်း ၵၢတ်ႇမူၼ်ႇ 1 ၸွႆႉ 6,000 ပျႃး– 8,000 ပျႃး။ ၶူဝ်းၵုၼ်ႇ ၸိူဝ်းၼႆႉသမ်ႉ လုၵ်ႉတၢင်းမိူင်းမၢၼ်ႈ – မိူင်းၶႄႇ တေႃႉမႃးၶၢႆ ဝႃႈၼႆ။

ဝဵင်းၼမ်ႉၶမ်း – မူႇၸေႊၼႆႉ ယၢၼ်ၵၼ် 19 လၵ်း ၼႂ်းၼၼ်ႉ မီးၸုမ်းယိပ်းၵွင်ႈၵၢင်ႇ တင်ႈၵဵတ်ႉ/ လၢၼ်ႇ ၵူတ်ႇထတ်းယူႇဝႆႉ မိူၼ်ၼင်ႇ – တီႈၶူဝ်ပၢင်ႇၶမ်း မီးဝႆႉသိုၵ်းမၢၼ်ႈ – ပျီႇတူႉၸိတ်ႉ – ပလိၵ်ႈမၢၼ်ႈ။ တီႈဝၢၼ်ႈပၢင်ႇၶမ်း မီးသိုၵ်းတႆး SSPP ၊ တီႈလွႆၵိဝ်ႇလွၵ်ႇသမ်ႉ မီးသိုၵ်းမၢၼ်ႈ။ တီႈဝၢၼ်ႈၼမ်ႉၸၢင်ႉ၊ ဝၢၼ်ႈၼွင်ၶၢင်လႄႈ ပွၵ်ႉမၢၼ်ႈၶမ်းသမ်ႉ မီးသိုၵ်းတဢၢင်း TNLA တင်ႈၵဵတ်ႉ/ လၢၼ်ႉ ၵူတ်ႇထတ်းဝႆႉ။