လုမ်းၽွင်းတၢင်ၶႄႇ ဢၼ်ၵဵဝ်ႇတင်းမိူင်းမၢၼ်ႈ ပိုၼ်ၽၢဝ်ႇဝႃႈ မိူင်းၶႄႇတေပၼ်ဝီႊသႃႊ ၸဝ်ႈၵၢၼ် ပၢႆးမၢၵ်ႈမီး မိူင်းမၢၼ်ႈလႄႈ ၵူၼ်းႁူမ်ႈႁိူၼ်းၶဝ် ယူႇသဝ်းၼႂ်းမိူင်းၶႄႇလႆႈထိုင် 6 လိူၼ်  “လၢၼ်ႉၸၢင်ႉ – မႄႈၶူင် ဝီႊသႃႊ” ဝႃႈၼႆ။

ဝီႊသႃႊၼႆႉ ဢႃယုမီး 5 ပီ ပဵၼ်ဝီႊသႃႊ သႅၼ်းဢၼ်ၸႂ်ႉတိုဝ်းၶဝ်ႈၼႂ်းမိူင်းၶႄႇလႆႈ လၢႆလၢႆပွၵ်ႈ(Multiple Entry) ။ တႄႇ ဢဝ်ဝၼ်းတီႈ 18/11/2024 ၼႆႉၵႂႃႇ တႄႇတၢင်ႇယိုၼ်ႈယွၼ်းလႆႈယဝ်ႉ ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇ လုမ်းၽွင်းတၢင်ႇၶႄႇၼၼ်ႉပႃးဝႆႉဝႃႈ – ၸဝ်ႈၵၢၼ်ပၢႆးမၢၵ်ႈမီးမိူင်းမၢၼ်ႈလႄႈ ၵူၼ်းႁူမ်ႈႁိူၼ်းၶဝ် ၸိူဝ်းဢၼ်ၶေႃႈမုလ်း ငၢမ်ႇမႅၼ်ႈၵၼ်တင်းလွင်ႈ တၢင်ႇယိုၼ်ႈဝီႊသႃႊၼၼ်ႉ တႄႇတၢင်ႇ ယိုၼ်ႈယွၼ်းၵႂႃႇလႆႈယဝ်ႉ။ ၵဵဝ်ႇလူၺ်ႈၶေႃႈမုလ်းႁူဝ်ယွႆႈတႄႉ ဢမ်ႇလၢတ်ႈဝႆႉပႃး။

လွင်ႈၵပ်းသိုပ်ႇပၼ် ဝီႊသႃႊသႅၼ်းၼႆႉ တႄႇမႃး ဝၢႆးလင် ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဢွၵ်ႇၶၢဝ်း တၢင်းၵႂႃႇ မိူင်းၶႄႇသေ ပွၵ်ႈမႃးၶိုၼ်းမိူင်းမၢၼ်ႈ။ ၸွမ်းၼင်ႇ မိူင်းၶႄႇ မွၵ်ႇႁွင်ႉမႃးသေ ၸွမ်ၸိၵ်း သိုၵ်းမၢၼ်ႈ မိၼ်းဢွင်ႇလၢႆႇ ၵႂႃႇ ၶိုၼ်ႈႁွတ်ႈပၢင်ၵုမ် လၢၼ်ႉၸၢင်ႉ – မႄႈၶူင်လႄႈ ပၢင်ၵုမ်ထႅင်ႈလၢႆဢၼ်။ ၾၢႆႇသိုၵ်းမၢၼ်ႈၵေႃႈ ပိုၼ်ၽၢဝ်ႇဝႆႉဝႃႈ ပဵၼ် ၵၢၼ်ဢွၵ်ႇၶၢဝ်းတၢင်း ဢၼ်မီးလွင်ႈဢွင်ႇမၢၼ် ဢၼ်ၼိုင်ႈ ဝႃႈၼႆ။

လီႊၶျႅၼ်း ၽွင်းလူင်မိူင်းၶႄႇ လၢတ်ႈဝႃႈ တႃႇႁႂ်ႈပဵၼ်ၵၢၼ်ႁူမ်ႈသၢင်ႈ ၼႂ်းပိုၼ်ႉတီႈၼၼ်ႉ တေႁဵတ်းဢွၵ်ႇပၼ် “လၢၼ်ႉ ၸၢင်ႉ – မႄႈၶူင် ဝီႊသႃႊ” ။ လွင်ႈၼႆႉ ပိုၼ်ၽၢဝ်ႇလၢတ်ႈၵႂႃႇ ၼႂ်းပၢင်ၵုမ် ၵမ်းထူၼ်ႈ 8 ။ ဝၢႆးလင် ၼၼ်ႉယဝ်ႉ ၸင်ႇတႄႇႁဵတ်းသၢင်ႈမႃး။

ၵူၼ်းၸိူဝ်း တေတၢင်ႇယိုၼ်ႈယွၼ်း ဝီႊသႃႊသႅၼ်းၼႆႉ တေလႆႈပဵၼ်ၸဝ်ႈၵၢၼ်ပၢႆးမၢၵ်ႈမီး ဢၼ်ႁူမ်ႈႁဵတ်းၵၢၼ်ၸွမ်း ၸုမ်းလူင်ပွင်ၸိုင်ႈသေ ၸုမ်းၸုမ်း ဢမ်ႇၼၼ် ၶွမ်ႊပၼီႊ ၾၢႆႇမိူင်းၶႄႇသေဢၼ်ဢၼ်။ တေလႆႈမီးပႃး လိၵ်ႈၵမ်ႉယၼ်။ လိူဝ်ၼၼ်ႉ ၶေႃႈမုလ်း ငၢႆးမိူၼ်ၵၼ်တင်း မိူဝ်ႈတၢင်ႇယွၼ်းဝီႊသႃႊ ပၢႆးမၢၵ်ႈမီးယူႇသဝ်း ၼႂ်းမိူင်းၶႄႇ 1 ပီ တီႈလုမ်းၽွင်းတၢင်ၶႄႇၼၼ်ႉၵူၺ်း – ၶၢဝ်ႇ VOA ႁၢႆးငၢၼ်းဝႆႉၼင်ႇၼႆ။

သႅၼ်းဝီႊသႃႊ ဢၼ်မိူင်းၶႄႇပၼ်ၶႂၢင်ႉ ၵူၼ်းမိူင်းမၢၼ်ႈဝႆႉ မိူဝ်ႈဢွၼ်တၢင်းၼၼ်ႉ မီး 16 သႅၼ်း။ မိူၼ်ၼင်ႇ ဝီႊသႃႊ ဢႅဝ်ႇလႄႇ၊ ဝီႊသႃႊ လုၵ်ႈႁဵၼ်း၊ ဝီႊသႃႊ ၵၢၼ်မၢၵ်ႈမီးလႄႈ ဝီႊသႃႊ ၽူႈသိုဝ်ႇၶၢဝ်ႇ (Journalist) 2 သႅၼ်း ၸိူဝ်းၼႆႉ။ ပေႃးၼပ်ႉပႃး ဢၼ်ပၼ်ၶႂၢင်ႉထႅင်ႈ ယၢမ်းလဵဝ်ၸိုင် တင်းမူတ်းမီးၵႂႃႇ 17 သႅၼ်း ၼႆယဝ်ႉ။

ဝီႊသႃႊ လၢၼ်ႉၸၢင်ႉ – မႄႈၶူင်ၼႆႉ လိူဝ်သေ မိူင်းမၢၼ်ႈယဝ်ႉ မိူၼ်ၼင်ႇ – မိူင်းလၢဝ်း ၊ မိူင်းဝႅတ်ႉၼၢမ်း၊ မိူင်းၵမ်ႇပူးၶျႃး ၊ မိူင်းထႆး ၸိူဝ်းၼၼ်ႉၵေႃႈ တေပၼ်ၵႂႃႇ – ဝႃႈၼႆ။