မိူဝ်ႈဝႃး ဝၼ်းတီႈ 18/11/2024 ယၢမ်းႁူဝ်ၶမ်ႈ 7 မူင်း သိုၵ်းမၢၼ်ႈပွႆႇမၢၵ်ႇ တီႈဝဵင်းၼွင်ၶဵဝ်ထႅင်ႈ၊ တူၵ်းသႂ်ႇဝၢၼ်ႈသူၼ် ႁိူၼ်းယေးလႄႈ ႁူင်းၸၢၵ်ႈႁုင်ၵိူဝ်ဝၢၼ် လႅဝ်ၽႅဝ်ႉ၊ ၵူၼ်းမိူင်း ႁဵင်ပၢႆ လႆႈပၢႆႈၽေးသိုၵ်း။
ၽူႈၸၢႆး ဢႃယု 50 ပီ ၵူၼ်းဝၢၼ်ႈဢိၼ်းဝၢႆး( အင်းဝိုင်း) ဝဵင်းၼွင်ၶဵဝ် ဢၼ်လႆႈပၢႆႈၽေးသိုၵ်းဝႆႉၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃႈ ႁူဝ်ၶမ်ႈ သိုၵ်းမၢၼ်ႈ ဢဝ်ႁိူဝ်းမိၼ် မႃးပွႆႇမၢၵ်ႇထႅင်ႈ 2 လုၵ်ႈ၊ မိူဝ်ႈမၢၵ်ႇတူၵ်းၼၼ်ႉ ႁဝ်းၶႃႈ ယင်းပႆႇၼွၼ်း၊ လႆႈယိၼ်းသဵင်လင်ၼႃႇ၊ တူၵ်းၾၢႆႇၼႃႈ ႁူင်းၸၢၵ်ႈၵိူဝ်ဝၢၼ် သိၼ်းသူၺ်ႇလီႇ (ဆင်းရွှေလီ)။ ဢိၼ်ႊၵျိၼ်ႊ ၼီႊယႃႊ ၶဝ်တၢႆၵေႃႉၼိုင်ႈ။ ၵူၼ်းၸိူဝ်းဢၼ်ပၢႆႈၽေးသိုၵ်း မႃးယူႇဝႆႉတၢင်းႁဝ်းၶႃႈၼႆႉၵေႃႈ လႆႈပၢႆႈၵႂႃႇတၢင်းဝၢၼ်ႈၵုင်းသႃႇထႅင်ႈ-” ဝႃႈၼႆ။
ယွၼ်ႉသိုၵ်းမၢၼ်ႈ ၵႆႉမႃးပွႆႇမၢၵ်ႇတီႈၼႂ်းၸႄႈဝဵင်းၼွင်ၶဵဝ်ၼႃႇလႄႈ ၵူၼ်းတၢင်ႇဝၢၼ်ႈဢၼ်ပၢႆႈၽေးသိုၵ်း မႃးသွၼ်ႈယူႇတီႈ ဝၢၼ်ႈဢိၼ်းဝၢႆး လႆႈသိုပ်ႇပၢႆႈၵႂႃႇတၢင်းဝၢၼ်ႈၵုင်းသႃႇ၊ ၶဵဝ်ၶမ်း ၸိူဝ်းၼႆႉထႅင်ႈ ဝႃႈၼႆ။
ယၢမ်းလဵဝ် ၵူၼ်းပၢႆႈၽေး ယၢပ်ႇၸႂ်တႃႇႁႃၵိၼ်လဵင်ႉတွင်ႉ လူဝ်ႇတင်းၸွႆႈထႅမ်ဝႆႉၼႆ ၵူၼ်းၸၢႆးၸွႆႈထႅမ်ပၢႆႈ ၽေးသိုၵ်း လၢတ်ႈၼင်ႇၼႆ။
မိူဝ်ႈဝႃး ၵၢင်ၶမ်ႈ 10 မူင်းၵေႃႈ သိုၵ်းမၢၼ်ႈ ပွႆႇမၢၵ်ႇတီႈဝၢၼ်ႈတႄးတၢႆႉ (သဲတိုက်) မီးၵူၼ်းမၢတ်ႇၸဵပ်း လူႉတၢႆၼႆ မၼ်း ၸၢႆးသိုပ်ႇလၢတ်ႈထႅင်ႈၼင်ႇၼႆ။
“မိူဝ်ႈဝႃး ၵၢင်ၶမ်ႈ 10 မူင်း သိုၵ်းမၢၼ်ႈ ပွႆႇမၢၵ်ႇထႅင်ႈ တီႈဝၢၼ်ႈတႄးတၢႆႉ(သဲတိုက်)၊ မီးၵူၼ်းမၢတ်ႇၸဵပ်းလူႉတၢႆ။ တေႃႈလဵဝ် ၽႂ်ၵေႃႈ ဢမ်ႇႁတ်းယူႇယဝ်ႉ၊ သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇ၊ ဢဝ်မၢၵ်ႇလူင် ယိုဝ်းၵူႈဝၼ်း ဢမ်ႇဝူၼ်ႉဝႃႈမီးၵူၼ်းမိူင်း ၵူၼ်းသိုၵ်းသင်”- ဝႃႈၼႆ။
မိူၼ်ၼင်ႇၼႆ မိူဝ်ႈဝၼ်းတီႈ 12/11/2024 ဝၢႆးဝၼ်း 2 မူင်းၶိုင်ႈ သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇတီႈ ႁၢၼ်ႉၼမ်ႉၼဵင်ႈ ၸဵမ်း တီႈဝဵင်းၼွင်ၶဵဝ် ၵူၼ်းမိူင်းတၢႆ 11 ၵေႃႉ ဝႃႈၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ