မိူဝ်ႈၼႆႉ ဝၼ်းတီႈ 19/11/2024 ယၢမ်းၵၢင်ၼႂ်ၸဝ်ႉ ၸၢႆးၼုမ်ႇ ယူႇပွၵ်ႉမၢၼ်ႈၶမ်း ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ယွင်ႇမဝ်းယႃႈမ ၽၼ်းသႂ်ႇမေးၼၢင်းမၼ်းၶိုၼ်း တၢႆထင်တီႈ။
ၽူႈၸၢႆးသႅၼ်း ပၢၼ်ႁၢတ်ႈႁၢႆး ၸဝ်ႈႁၢၼ်ႉၶၢႆၶူဝ်းၸႂ်ႉတိုဝ်း ၵူၼ်းမိူင်းဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈ ၼႆႉ ၵၢင်ၼႂ်ၸဝ်ႉ ၵူၼ်းမဝ်းယႃႈၵေႃႉၼိုင်ႈ ယူႇပွၵ်ႉမၢၼ်ႈၶမ်းၼၼ်ႉ ၶိုၼ်းၽၼ်းမေးမၼ်းတၢႆထင်တီႈ။ တူဝ်ၵူၼ်းမဝ်းယႃႈၼၼ်ႉတႄႉ သိုၵ်းလွႆတဢၢင်း တီႉၵႂႃႇယဝ်ႉ”- ဝႃႈၼႆ။
ၸၢႆးမဝ်းယႃႈ ဢၼ်ၽၼ်းမေးမၼ်းၶိုၼ်းၼၼ်ႉ ၸိုဝ်ႈႁွင်ႉ ၸၢႆးဢူင်းၽေႇ ဢႃယု 52 ပီ ၊ မေးၼၢင်းမၼ်းသမ်ႉ ၸိုဝ်ႈႁွင်ႉ ၼၢင်းသူၺ်ႇယဵၼ်ႇ ဢႃယု 48 ပီ။ ပဵၼ်တႆးတင်းသွင်ၽူဝ်မေး။
ၽွင်းသိုၵ်းမၢၼ်ႈ ၽွင်းငမ်းၼၼ်ႉ တီႈဝဵင်းမူႇၸေႊ ၼမ်ႉၶမ်း လႅၼ်လိၼ်တိတ်းၸပ်းမိူင်းၶႄႇၼၼ်ႉ သိုၵ်းမၢၼ်ႈ ဢမ်ႇၵုမ်းလႆႈလႄႈ ယႃႈမယႃႈမဝ်းၵမ် လိူင်ႇၼမ် – ဝႃႈၼႆသေတႃႉၵေႃႈ ၸူဝ်ႈသိုၵ်းတဢၢင်း TNLA ပိုၼ်ၽၢဝ်ႇယိပ်းၵုမ်းမႃး ၶၢဝ်းတၢင်းၸမ်ပီ ၼႆႉၵေႃႈ ယႃႈမယႃႈမဝ်းၵမ် ပႆႇလူတ်းယွမ်း။
လိူဝ်ၼၼ်ႉႁၢၼ်ႉ KTV ၊ ႁၢၼ်ႉလဝ်ႈ ၊ ႁၢၼ်ႉ Bar ၼမ်လိူင်ႇမႃးလိူဝ်ၵဝ်ႇၼႆ ၵူၼ်းပိုၼ်ႉတီႈ လၢတ်ႈၼင်ႇၼႆ။
ၼႂ်းၶၢဝ်းတၢင်းပၢင်တိုၵ်း ၽႅၼ်ယၼ်ႇသိုၵ်း 1027 မႃး ပီပၢႆၼႆႉ လွင်ႈဢၼ်ဝႃႈ ယွင်ႇမဝ်းယႃႈသေ ၽၼ်းၵၼ်တၢႆ ၵမ်း ၼႆႉတႄႉ လႆႈဝႃႈပဵၼ်ပွၵ်ႈၵမ်းႁႅၵ်ႈ။ ယွၼ်ႉယႃႈမဝ်းၵမ်လိူင်ႇၼမ်လႄႈ ၽူႈလၵ်ႉၸၵ်ႉၶုတ်ႈၵေႃႈ လိူင်ႇၼမ်။ ၶူဝ်းၶွင်ၵမ်းၵမ်းႁၢႆ ၵူၼ်းပိုၼ်ႉတီႈလၢတ်ႈၼင်ႇၼႆ။
“ၸူဝ်ႈဝူင်ႈဝၢင်ႈၼႆႉတႄႉ ၼႂ်းပွၵ်ႉၼႂ်းယွမ်ႇၵေႃႈၶူဝ်းၶွင်ႁၢႆၼမ်၊ ဢမ်ႇလိူဝ်သေ ရူတ်ႉၵႃး ရူတ်ႉၶိူင်ႈၵေႃႈႁၢႆ။ ဢၼ်မီးၵႃႈၶၼ်ၸိူဝ်းၼႆႉႁၢႆၼမ်။ KTV ၵေႃႈ ၼမ်မႃးၼႃႇ၊ ဢမ်ႇၸႂ်ႈ KTV လဵၵ်ႉလဵၵ်ႉၶႃႈ၊ ဢၼ်ယႂ်ႇဢၼ် လူင်ၵမ်းလဵဝ်ယဝ်ႉ”- ဝႃႈၼႆ။
တီႈၼမ်ႉၶမ်းၼႆႉ ယူႇတီႈ တပ်ႉသိုၵ်းတဢၢင်း TNLA ပိုၼ်ၽၢဝ်ႇ ၵုမ်းဝႆႉတင်ႈတႄႇ ၵၢင်လိူၼ်သႅပ်ႊထႅမ်ႊပိူဝ်ႊ 2023 မႃးတေႃႇထိုင်ဝၼ်းမိူဝ်ႈၼႆႉ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ