ဝၼ်းတီႈ 17/11/2024 ၼႆႉ ၸၼ်ႉၸွမ်မႁႃၸူးလႃး သင်ၶၸဝ်ႈ ဝဵင်းလမ်းပုၼ်း ၸတ်းႁဵတ်းပၢင် ယိုၼ်ႈမွပ်ႈၸုမ်ႈၶူး ၸၼ်ႉ B.A ,M.A မီးၽူႈလႆႈႁပ်ႉၸုမ်ႈၶူး 100 ပၢႆ။ ၼႂ်းၼၼ်ႉ ပႃးလုၵ်ႈႁဵၼ်းသင်ၶတႆး 6 တူၼ်။ ၽွင်းငဝ်းလၢႆး ဝၢၼ်ႈမိူင်းတႆး ဢမ်ႇၵတ်းယဵၼ် ၵူၼ်းၼုမ်ႇသုမ်းတိုဝ်ႉတၢင်း ၵၢၼ်ႁဵၼ်းၵၢၼ်သွၼ်ၼမ်။

မၢင်ၸိူဝ်းၵေႃႈ လုၵ်ႉၼႂ်းၵႄႈလွင်ႈယၢပ်ႇၽိုတ်ႇ လၢႆလွင်ႈသေ ၶဝ်ႈႁႃလဵပ်ႈႁဵၼ်းထႅင်ႈတၢင်ႇတီႈ။ ၸၼ်ႉၸွမ်မႁႃၸူးလႃးလူင်းၵွၼ်းၼႆႉၵေႃႈ ပဵၼ်ဢွင်ႈတီႈဢၼ်ၵူၼ်းၼုမ်ႇလႄႈ သင်ၶၸဝ်ႈမိူင်းတႆးၶဝ်ႈႁဵၼ်းလႆႈသေ လႆႈလွင်ႈဢွင်ႇမၢၼ်ၵႂႃႇ ႁင်းၽႂ်မၼ်း။

ၸၼ်ႉၸွမ်မႁႃၸူးလႃးလူင်းၵွၼ်း လမ်းပုၼ်း ၸတ်းႁဵတ်းပၢင်ယုၵ်ႉယွင်ႈ ယိုၼ်ႈမွပ်ႈၸုမ်ႈၶူး B.A & M.A ၼႂ်းပီ 2024 ၼႆႉ ႁူဝ်ၼပ်ႉၽူႈလႆႈႁပ်ႉၸုမ်ႈၶူးမီး 100 ပၢႆ ။ၼႂ်းၼၼ်ႉ ပႃးလုၵ်ႈႁဵၼ်းသင်ၶတႆး 6 တူၼ် ပဵၼ်လုၵ်ႈႁဵၼ်းသင်ၶတႆး ဢၼ်လုၵ်ႉတၢင်းဝဵင်းၵုၼ်ႁဵင်၊ ၵဵင်းတုင်၊ လၢင်းၶိူဝ်း၊ ၵေးသီး၊ မိူင်း တူၼ် ၸိူဝ်းၼႆႉ မႃးၶိုၼ်ႈႁဵၼ်း။

ၸဝ်ႈၶူးဢႃႇၸႃႇရ မိူင်းတူၼ် ဢၼ်လႆႈႁပ်ႉၸုမ်ႈၶူး B.A လၢတ်ႈၼႄဝႆႉၼင်ႇၼႆ – “ဢၼ်လႆႈႁဵၼ်းၼႆႉ သေလႆႈၸုမ်ႈ ၶူးၼႆႉ လႆႈၸႂ်ႉၶၢဝ်းယၢမ်းယူႇ 4 ပီ (ၸႂ်ႉဝႂ် Passport )၊ ၸိူဝ်းၸႂ်ႉဝတ်းသိပ်းပီ၊ ပေႃးပဵၼ် ၵူၼ်းယိပ်းဝတ်းထႆးတႄႉ လႆႈ ႁဵၼ်း 5 ပီဢေႃႈ။ ဢၼ်ၶႃႈယဝ်ႉၵႂႃႇၼႆႉ (BA) Bachelor of arts Program in English ပဵၼ်ၾၢႆႇဢင်းၵိတ်ႉၶႃႈ။ ၶႃႈတႄႉ မိူဝ်ႈၶၢဝ်းၶူဝ်ႊဝိတ်ႉၼၼ်ႉ ႁႃတိုဝ်ႉတၢင်းတႃႇႁဵၼ်းသေ ၸင်ႇလႆႈၵပ်းသိုပ်ႇၸူး ႁူဝ်ၼႃႈသင်ၶလမ်းပုၼ်းၼႆႉ မိူၼ်ၼင်ႇ ၸဝ်ႈၶူးလၢဝ် ၸဝ်ႈၶူးဢႃႊလုၼ်ႊလႄႈ ၸဝ်ႈၶူးၼေႃႇၶမ်း ၸိူဝ်းၼႆႉ။ ၶဝ်ၸဝ်ႈၵေႃႈ ၸင်ႇလၢတ်ႈပၼ်ၶိုၼ်းဝႃႈ မီးတိုဝ်ႉတၢင်းလီ မီးတီႈ ယူႇပၼ်ၼႆသေ ၸင်ႇၶဝ်ႈမႃးႁဵၼ်းၶႃႈဢေႃႈ”- ဝႃႈၼႆ။  

ၵမ်ႈၼမ် သင်ၶလုၵ်ႈႁဵၼ်း ၸိူဝ်းမႃးႁဵၼ်းလိၵ်ႈ တီႈလမ်းပုၼ်းၼႆႉ မီးတီႈယူႇတီႈၵိၼ်ပၼ်တီႈဝတ်ႉ ၽရထၢတ်ႈ ႁႃႊရိၽုၼ်ႊၶျႆႊ၊ ယွၼ်ႉဝႃႈ ၸဝ်ႈၵွၼ်းဝတ်ႉ ပၼ်တိုဝ်ႉတၢင်းၵူၼ်းၸိူဝ်း ၶႂ်ႈႁဵၼ်းလိၵ်ႈလၢႆး ပၢႆးပၺ်ၺႃမႃးယူႇသဝ်း ၽွင်းတိုၵ်ႉႁဵၼ်းလိၵ်ႈၼႆ ၸဝ်ႈၶူး ဢႃႇၸႃႇရ သိုပ်ႇလၢတ်ႈၼင်ႇၼႆ။

ၼႂ်းပၢင်ယိုၼ်ႈမွပ်ႈၸုမ်ႈၶူးပီၼႆႉ ၽူႈလႆႈႁပ်ႉၸုမ်ႈၶူး B.A. မီး 90 တူၼ်/ၵေႃႉ ၊ ၽူႈလႆႈႁပ်ႉၸုမ်ႈၶူး M.A. 22 တူၼ်/ၵေႃႉ ႁူမ်ႈတင်းသဵင်ႈ 112 တူၼ်/ၵေႃႉ-  ၼႂ်းၼၼ်ႉ ပႃးသင်ၶတႆး 6 တူၼ်။ လုၵ်ႈႁဵၼ်း ဢၼ်ႁဵၼ်းသုတ်းၵႂႃႇ တီႈလမ်းပုၼ်းၼႆႉ မီးထိုင် 69 ၸုပ်ႈယဝ်ႉသေတႃႉ ဢၼ်မီးပႃးသင်ၶတႆး တိုၵ်ႉမီး 7 ၸုပ်ႈၼႆႉၵူၺ်း ဝႃႈၼႆ။

ႁူဝ်ၼႃႈ ၸုမ်းသင်ႇၶႃႇတႆး ၸဝ်ႈၶူးမူၼ်းၶိူဝ်း ပုင်ႇၺဝမ်ႇသ လၢတ်ႈၼႄဝႆႉၼင်ႇၼႆ – “မိူဝ်ႈဢွၼ်တၢင်း တီႈလမ်းပုၼ်း ၼႆႉ ပႆႇမီးပၢင်ယိုၼ်ႈမွပ်ႈ ၸုမ်ႈၶူးၵမ်းလဵဝ် လႆႈၵႂႃႇႁပ်ႉတီႈၵုင်းထဵပ်ႈယူႇ။ မၢင်ပီၵေႃႈ ၵႂႃႇ ပၼ်တီႈၵုင်းထဵပ်ႈ၊ မၢင်ပီၵေႃႈ ပၼ်ယူႇတီႈၼႆႈ။ ယွၼ်ႉဝႃႈ မၼ်းပဵၼ်ၵေႃၽႄတီႈၵုင်းထဵပ်ႈၵူၺ်း။ လုၵ်ႈႁဵၼ်း ၸိူဝ်းလုၵ်ႉမိူင်းတႆးမႃး ဢၼ်မီးဝႆႉမိူဝ်ႈလဵဝ် မီး 48 ၵေႃႉ။ လွင်ႈၵိၼ်လွင်ႈယူႇတႄႉ ပေႃးပဵၼ်ၵူၼ်းႁိူၼ်း လႆႈဢွၵ်ႇၵႃႈၸႂ်ႉၸၢႆႇႁင်းၵူၺ်း။ ၼႂ်းၸၼ်ႉၸွမ်တႄႉ ၶဝ်ပၼ်ၶၢတ်ႈႁွင်ႈယူႇ ၼိုင်ႈႁွင်ႈ 2 ၵေႃႉ။ တေႃႇလိူၼ်လႆႈၸၢႆႇပၼ် 600 ဝၢတ်ႇ။ သင်ဝႃႈ ၽႂ်ၶႂ်ႈမႃးႁဵၼ်းၼႆၵေႃႈ ၵႃႈမၼ်းၵေႃႈဢမ်ႇသုင် လူးၼေႃႈ ။ ၵၢၼ်ႁဵၼ်းၵၢၼ်သွၼ်မၼ်းၵေႃႈ လႆႈဝႃႈၶိုတ်းၸၼ်ႉထိုင်တီႈယူႇ ဢမ်ႇဝႃႈၽႂ်ၶႂ်ႈမႃး ႁဵၼ်း ၵေႃႈ ႁႂ်ႈႁၢင်ႈႁႅၼ်းဝႂ်ဢၼ်လူဝ်ႇမၼ်းၸိူဝ်းၼၼ်ႉသေ မႃးယိုၼ်ႈ။ ႁဝ်းၶႃႈ တေမီးၸုမ်းၾၢႆႇတိတ်း တေႃႇလုၵ်ႈ ႁဵၼ်းမိူင်းတႆးႁဝ်းဝႆႉယူႇလႄႈ တေဢမ်ႇယၢပ်ႇသင်ၶႃႈ”- ဝႃႈၼႆ။  

တႃႇတေ ၶဝ်ႈႁဵၼ်းလႆႈၸၼ်ႉၸွမ်မႁႃၸူးလႃးလူင်းၵွၼ်း လမ်းပုၼ်းၼႆႉ သင်ဢမ်ႇၸႂ်ႈၵူၼ်းၼႂ်းမိူင်းထႆး ႁႂ်ႈမီးဝႆႉပပ်ႉဝႂ် ၶၢမ်ႈမိူင်း passport ၊ ဝႂ်ဢွင်ႇပူၼ်ႉၸၼ်ႉ ၽွင်းႁဵၼ်းၼႂ်းမိူင်းမၢၼ်ႈ ၾၢႆႇဢင်းၵိတ်း၊ မၢႆၾၢင်တူဝ်၊ မၢႆလႆႈဝၢၵ်ႈ ၵူႈၽႃႇသႃႇ ၸိူဝ်းၼႆႉ ႁႂ်ႈယိုၼ်ႈၽိုၼ်မိူၼ် – ၾၢႆႇမၢၼ်ႈ၊ ၾၢႆႇဢင်းၵိတ်းလႄႈ တႅမ်ႈပိုၼ်းၵႅပ်ႈသုၼ်ႇတူဝ် Essay (100 words) ၾၢႆႇဢင်းၵိတ်း ယိုၼ်ႈထိုင်ၸၼ်ႉၸွမ်လႆႈၵမ်းသိုဝ်ႈ။

တႃႇႁဵၼ်းဢဝ် B.A ၼႆႉ လႆႈၸႂ်ႉၶၢဝ်းတၢင်း 4 ပီ ပေႃးပဵၼ်သင်ၶၸဝ်ႈ ၵႃႈႁဵၼ်းၼိုင်ႈထိူမ်း (ၶိုင်ႈပီ/ ၼိုင်ႈၸုပ်ႈ) 3,000 ဝၢတ်ႇ ၊ ၼိုင်ႈပီလႂ် 2 ထိူမ်း၊ ႁူမ်ႈတင်းသဵင်ႈ 4 ပီ တေလႆႈၵႃႈထိူမ်း 24,000 ဝၢတ်ႇ ။ သင်ပဵၼ်ၵူၼ်းႁိူၼ်းၸိုင် ၼိုင်ႈထိူမ်းလႂ် 4,000 ၊ ႁူမ်ႈ 4 ပီၵေႃႈ တေမႅၼ်ႈယူႇ 32,000 ဝၢတ်ႇ။

တႃႇႁဵၼ်းဢဝ် ၸုမ်ႈၶူး MA သမ်ႉ လႆႈၸႂ်ႉၶၢဝ်းယၢမ်း 2 ပီ ၊ ၼိုင်ႈပီလႂ် 2 ထိူမ်း၊ သင်ပဵၼ်သင်ၶၸဝ်ႈ ၼိုင်ႈထိူမ်းလႆႈ ၸၢႆႇၵႃႈႁဵၼ်း 13,750 ဝၢတ်ႇ ၊ ၵူၼ်းႁိူၼ်းသမ်ႉ ၼိုင်ႈထိူမ်း 21,250 ။ ပိူင်လူင်မၼ်း လိၵ်ႈထႆးလႄႈ လိၵ်ႈဢင်းၵိတ်း တေလႆႈမေႃဝႆႉပိုၼ်ႉထၢၼ်မၼ်းဝႆႉလီလီ။

ၽႂ်သူၼ်ၸႂ် ၶႂ်ႈၶိုၼ်ႈႁဵၼ်းၸၼ်ႉၸွမ်ၵေႃႈ ၵပ်းသိုပ်ႇတွင်ႈထၢမ်လႆႈတီႈ ၸဝ်ႈၶူးလၢဝ် ဝႃႇလေႃးၵ 080 4938 023 ၊ ၸဝ်ႈၶူး မူၼ်းၶိူဝ်း ပုင်ႇၺဝမ်ႇသ 099-1076-465 ၊ ၸဝ်ႈၶူး ၶိူဝ်းၸွမ် ဝႃႇယမ 083 9969 736 – လႆႈၵမ်းသိုဝ်ႈ။