ပီၼႆႉ ၼႂ်းၸႄႈတွၼ်ႈၵဵင်းမႂ်ႇ – လမ်းပုၼ်း ၸိုင်ႈထႆး ပိုတ်ႇပၢင်သွၼ်လိၵ်ႈတႆး ၶၢဝ်းမႆႈ တင်းမူတ်း 8 ပၢင် လုၵ်ႈႁဵၼ်းမီး 200 ပၢႆ။

တႄႇဢဝ် ဝၼ်းတီႈ 01/04/2025 မႃး ယူႇတီႈ ၶူးသွၼ်/ မေႃသွၼ်လႄႈ ႁွင်ႈၵၢၼ်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး RCSS ႁူမ်ႈၵၼ်သေ ပိုတ်ႇပၢင်သွၼ်လိၵ်ႈတႆး ၶၢဝ်းမႆႈမႃး တီႈႁူင်းႁဵၼ်းသီဝူဝ်ငိုၼ်း၊ ဝတ်ႉၵူႇတဝ်ႈ၊ ဝၢၼ်ႈပုင်ႇယဵင်းၼွၵ်ႈ၊ ဝၢၼ်ႈမႂ်ႇတႆး မၼ်ႈၵိုမ်း၊ ႁူင်းႁဵၼ်းသၼ်ၽၵ်းဝၢၼ်၊ ဝတ်ႉမႄႈၽႅၵ်ႇလူင်၊ ဝဵင်းမႄႈတႅင်လႄႈ ဝၢၼ်ႈသၼ်ပႃႇႁဵင် ၸိူဝ်း ၼႆႉ။

မေႃသွၼ် ယိင်းႁွမ် လၢတ်ႈတီႈၽူႈတွႆႇႁွၵ်ႈဝႃႈ – “ၽွင်းၶၢဝ်းပိၵ်ႉႁူင်းႁဵၼ်းၼႆႉ လုၵ်ႈဢွၼ်ႇႁႅင်းၵၢၼ်တႆး ႁဝ်းဢမ်ႇၶႂ်ႈႁႂ်ႈၶဝ်ယူႇလၢႆ လဵၼ်ႈၵဵမ်း ၸိူဝ်းၼႆႉ။ ယဝ်ႉၵေႃႈ မိူဝ်ႈမီးၶၢဝ်းယၢမ်း ပွတ်းဢွၼ်တွၼ်ႈ ၼိုင်ႈၼႆႉ ၶႂ်ႈႁႂ်ႈၶဝ်လႆႈႁဵၼ်းႁူႉလိၵ်ႈလၢႆးႁဝ်း သေဢမ်ႇၵႃး ၸဵမ်ၾိင်ႈငႄႈၾိင်ႈထုင်း ၽႃသႃၵႂၢမ်းလၢတ်ႈ တႆးႁဝ်းၶႃႈ ၸိူဝ်းၼႆႉၵေႃႈ ၶႂ်ႈႁႂ်ႈၶဝ်ႁူႉၶဝ်မေႃ။ ႁဝ်း ၶႃႈ မႃးယူႇမိူင်းပိူၼ်ႈၵေႃႈ ဢမ်ႇၶႂ်ႈႁႂ်ႈလုၵ်ႈဢွၼ်ႇတႆးႁဝ်း ႁၢမ်းသုၼ်ႇႁဵၼ်းလိၵ်ႈလၢႆးႁဝ်းၶႃႈ ၸဵမ်ၸိူဝ်းၼႆႉၶႃႈဢေႃႈ”- ဝႃႈၼႆ။

ယၢမ်းလဵဝ် ၸွမ်းၼင်ႇ သဵၼ်ႈသၢႆမၢႆ လုၵ်ႈႁဵၼ်း လႆႈၵဵပ်းဝႆႉတႄႉ တီႈဝၢၼ်ႈသၼ်ပႃႇႁဵင် ဝဵင်းလမ်းပုၼ်း မီး 18 ၵေႃႉ၊ ဝၢၼ်ႈပူင်ႇယဵၼ်းၼွၵ်ႈ ဝဵင်းမႄႈလိမ်း မီး 60 ၵေႃႉ၊ ႁူင်းႁဵၼ်းသီဝူဝ်ငိုၼ်း ဝဵင်းၵဵင်းမႂ်ႇ မီး 50 ၵေႃႉ၊ ဝၢၼ်ႈမႂ်ႇတႆး မၼ်ႈၵိုမ်း ဝဵင်းမႄႈလိမ်း 60 ၵေႃႉ၊ ဝတ်ႉၵူႇတဝ်ႈ ဝဵင်းၵဵင်းမႂ်ႇ 17 ၵေႃႉ၊ ႁူင်းႁဵၼ်းသၼ်ၽၵ်းဝၢၼ် ဝဵင်းႁၢင်လူင်းမီး 9 ၵေႃႉ၊ ဝတ်ႉမႄႈ ၽႅၵ်ႇလူင် ဝဵင်းသၼ်သၢႆး မီး 23 ၵေႃႉလႄႈ ဝဵင်းမႄႈတႅင်မီး 8 ၵေႃႉ။ ယဝ်ႉၵေႃႈ ၶူးသွၼ်/ မေႃသွၼ် မီး 20 တူၼ်/ ၵေႃႉပၢႆ။

“မိူဝ်ႈလဵဝ် ဢၼ်ႁဝ်းၶႃႈ မေႃသွၼ် တၢင်းႁူင်းႁဵၼ်းသီဝူဝ်ငိုၼ်းလႄႈ ဝတ်ႉၵူႇတဝ်ႈတႄႉ ႁဝ်းၶႃႈ မီးလွင်ႈယၢပ်ႇၽိုတ်ႇဝႆႉ လွင်ႈၵႂႃႇမႃး မေႃသွၼ်ၶဝ် မၢင်ၸိူဝ်း လႆႈၼင်ႈရူတ်ႉ Card မႃးသွၼ်ပၼ်သေဢမ်ႇၵႃး ပၢႆလႆႈၸုၵ်းငိုၼ်း ၼႂ်းထွင်းၸၢႆႇပၼ်ပႃးထႅင်ႈ ၸိူင်ႉၼႆၶႃႈဢေႃႈ ဢၼ်ယၢပ်ႇၽိုတ်ႇတႄႉ”- မေႃသွၼ် ယိင်းႁွမ် သိုပ်ႇလၢတ်ႈၼႄၼင်ႇၼႆ။

ပၢင်သွၼ်လိၵ်ႈတႆး ၶၢဝ်းမႆႈ မိူဝ်ႈပီ 2024 ၼၼ်ႉ တင်းမူတ်းမီး 4 ပၢင် မိူၼ်ၼင်ႇ – ဝတ်ႉသီဝူဝ်ငိုၼ်း၊ ဝၢၼ်ႈ ပူင်ႇယဵင်းၼွၵ်ႈ၊ ဝၢၼ်ႈမႂ်ႇတႆး မၼ်ႈၵိုမ်း၊ ဝၢၼ်ႈသၼ်ပႃႇႁဵင် ဝဵင်းလမ်းပုၼ်း ၸိူဝ်းၼႆႉ။ လုၵ်ႈႁဵၼ်းမီး 100 ပၢႆ ဢၼ်မႃးတွပ်ႇလိၵ်ႈသမ်ႉ မီး 87 ၵေႃႉ ၼႆယဝ်ႉ။