ၸၼ့်ၸွမ်မႁႃၸူးလႃးလူင်းၵွၼ်း ၵဵင်းမႆႇတေၸတ်းပၢင်ယွင်ႈၵုင်ႇ သင်ႇၶႃႇၸိူဝ်းလႆႈႁပ့်ၸုမ်ႈၶူး B.A

ၸၼ့်ၸွမ် မႁႃၸုလႃးလူင်းၵွၼ်း ၵဵင်းမႆႇ ၸိုင်ႈထႆး တေၸတ်းပၢင်ယွင်ႈၵုင်ႇ သင်ႇၶႃႇၸဝ်ႈလႄႈ ၵူၼ်းႁိူၼ်းၸိူဝ်းႁပ့်ၸုမ်ႈၶူး B.A ပီ 2022။

ပၢင်ယွင်ႈၵုင်ႇ သင်ႇၶႃႇၸဝ်ႈၸိူဝ်းလႆႈႁပ့်ၸုမ်ႈၶူးၼႆ့ ယူႇတီႈၸုမ်းႁူမ်ႈတုမ်ၸၢဝ်းၶိူဝ်းတႆး ဢွၼ်ႁူဝ်သေ တေၸတ်းႁဵတ်းတီႈ ၸၼ့်ၸွမ် မႁႃၸုလႃးလူင်းၵွၼ်း ဝတ့်သူၼ်ၻွၵ်ႇ(သူၼ်မွၵ်ႇ) ဝဵင်းၵဵင်းမႆႇ၊ၸိုင်ႈထႆး ၼႂ်းဝၼ်းတီႈ 3/12/2022 ဝၼ်းသဝ်ၼႆ့။

ႁူဝ်ပဝ်ႈ ၸုမ်းႁူမ်ႈတုမ်ပီႈၼွင့်ၸၢဝ်းၶိူဝ်းတႆး လၢတ်ႈတီႈၽူႈတွႆႇႁွၵ်ႈဝႃႈ-“ၸႂ်ႈဢေႃႈ ပၢင်ဢၼ်ၼႆ့ ယူႇတီႈႁဝ်းၶႃႈသေ ၶႂ်ႈႁဵတ်းပဵၼ်တီႈမၢႆတွင်း တႃႇၸိူဝ်းလႆႈႁပ့်ၸုမ်ႈၶူး B.A ၶဝ်ၼၼ့်ၶႃႈဢေႃႈ။ ၸင်ႇႁဵတ်းပၢင်ႁူမ်ၸူမ်းယွင်ႇၵုင်ႇၸိူင့်ၼႆၶႃႈ၊ ပေႃးလၢတ်ႈသိုဝ်ႈသိုဝ်ႈၵေႃႈ ပဵၼ် ၵၢၼ်ၽိုၵ်း ႁပ့် ၸုမ်ႈၶူးၼၼ့်ၼႃႇၼေႃ ။ ဢၼ်တေ့မၼ်းတႄ့ပႆႇၸႂ်ႈ ပီၼႆ့ M.A လႄႈ Ph.D ပႆႇမီးၶႃႈ ၵွပ်ႈဝႃႈ ၵမ်ႈၽွင်ႈႁဵၼ်းပႆႇၸူပ်းဢေႃႈ ၼႂ်းပၢင်ၼႆ့ ႁဝ်းဢၢၼ်းႁႂ်ႈ ပီႈၼွင့်တီႈၸမ်တီႈၵႆ မႃးၶဝ်ႈႁူမ်ႈလႆႈၶႃႈဢေႃႈ ဢမ်ႇတတ်းမၵ်းဝႆ့ သဵၼ်ႈႁူဝ်ၵူၼ်းၶႃႈ မႃးလၢႆၵေႃ့ၵေႃႈ ဢမ်ႇပဵၼ်သင် ”- ဝႃႈၼႆ။

ၸိူဝ်းလႆႈႁပ့်ၸုမ်ႈၶူး B.A  တီႈၸၼ့်ၸွမ် မႁႃၸုလႃးလူင်းၵွၼ်း ၵဵင်းမႆႇ ပီ 2022 ၼႆ့ ႁူမ်ႈၵၼ်တင်းမူတ်းမီး 100 ပၢႆ ဢၼ်ပဵၼ်ၸၢဝ်းၶိူဝ်းတႆး မီး 11 ၵေႃ့ ၼႂ်းၼၼ့် သင်ၶႃႇၸဝ်ႈ 8 တူၼ် လႄႈ ၵူၼ်းႁိူၼ်း 3 ၵေႃ့။ ပီၼႆ့ ပဵၼ် ပွၵ်ႈၵမ်း 67 ။

သင်ႇၶႃႇၸဝ်ႈလႄႈၵူၼ်းႁိူၼ်းဢၼ်လႆႈႁပ့်ၸုမ်ႈၶူးၼႆ့ ပဵၼ်ၵူၼ်းၸိုင်ႈတႆးၵမ်ႈၼမ် မိူၼ်ၼင်ႇ ဝဵင်းၵဵင်းတုင် ၊ မိူင်းၼၢႆး ၊ မိူင်းပဵင်း ၊ မိူင်းယွင်း ၊ ဝဵင်းလႃႈသဵဝ်ႈ ၊ မိူင်းၵိုင် ၊ ဝဵင်းတႃႈၶီႈလဵၵ်း ၊ ဝဵင်းၼမ့်ၸၢင် လႄႈ ဢၼ်လုၵ့်တီႈသိပ်းသွင်ပၼ်းၼႃးမႃး ၵေႃႈမီး။

ပၢင်ႁပ်ႉၸုမ်ႈၶူး ဝၼ်းဢၼ်တေ့ မၼ်း တေၸတ်းႁဵတ်းတီႈ တီႈၸၼ်ႉၸွမ်မႁႃၸူးလႃး ဝင်းၼွႆႉ ဢယုတ်ႉထယႃး ၸိုင်ႈထႆး ဝၼ်းတီႈ 10-11/12/2022 ဢၼ်တေထိုင်။

သင်ႇၶႃႇၸဝ်ႈလႄႈၵူၼ်းႁိူၼ်းၸၢဝ်းၶိူဝ်းတႆး ဢၼ်တိုၵ့်လဵပ်ႈႁဵၼ်းယၢမ်းလဵဝ်  ၼပ့်ပီၼိုင်ႈတေႃႇထိုင် ပီသၢမ် ႁူမ်ႈၵၼ်တင်းသဵင်ႈမီး 40 ပၢႆ ။

ၸၼ့်ၸွမ်မႁႃၸုလႃးလူင်းၵွၼ်း ၵဵင်းမႆႇ ၸိုင်ႈထႆးၼႆ့ မီးလၢႆလၢႆၸိုင်ႈမိူင်း မႃးၶိုၼ်ႈႁွတ်ႈ မိူၼ်ၼင်ႇ မိူင်းလၢဝ်း၊မိူင်းၵမ်ႊပူႊၶျႃး၊မိူင်းႁူမ်ႈတုမ်၊မိူင်းဝႅတ့်ၼၢမ်း လႄႈ ၵူၼ်းၼႂ်းမိူင်းထႆးၸိူဝ်းၼႆ့ၵေႃႈ ၶိုၼ်ႈႁဵၼ်း။ၸၼ့်ၸွမ်ဢၼ်ၼႆ့ ၶိုၼ်ႈဢဝ်လႆႈၸုမ်ႈၶူး B.A , M.A , PhD ၸဵမ်ၸိူဝ်းၼႆ့။