သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇတီႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ ၵူၼ်းတၢႆ 3 ၵေႃႉ မၢတ်ႇၸဵပ်း 10 ၵေႃႉ။

ဝၼ်းတီႈ 17/11/2024 ယၢမ်းတဵင်ႈၶိုၼ်း ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇတီႈဝဵင်းၵူတ်ႉၶၢႆ မၢၵ်ႇတူၵ်းတိူဝ်ႉ တီႈပွၵ်ႉ 4 ႁိမ်း ၸမ်ၵျွင်းၶရိတ်ႉယၼ်ႇ ၵူၼ်းတၢႆ 3 ၵေႃႉ မၢတ်ႇၸဵပ်းမွၵ်ႈ 10 ၼႆယဝ်ႉ။

တၢႆ 3 ၵေႃႉၼၼ်ႉ ပႃးမႄႈယူႇၾႆး 2 မႄႈလုၵ်ႈ။ ၼႂ်းၵူၼ်းမၢတ်ႇၸဵပ်း 10 ၵေႃႉၼႆႉ 2 ၵေႃႉ တိူဝ်ႉၺႃးတီႈႁူဝ် ငဝ်းလၢႆးလႆႈမႆႈၸႂ် ဝႃႈၼႆ။

ၸၢႆးၼုမ်ႇ ဢႃယုမွၵ်ႈ 40 ပီ ယူႇဝဵင်းၵူတ်ႉၶၢႆ လၢတ်ႈၽူႈတွႆႇႁွၵ်ႈဝႃႈ -“ယၢမ်းတဵင်ႈၶိုၼ်း သိုၵ်းမၢၼ်ႈမႃး ယိုဝ်းသႂ်ႇ တီႈပွၵ်ႉဢၼ်မီးၵူၼ်းယူႇၼမ်။ ၼႂ်းၵူၼ်းတၢႆၼႆႉ မႄႈလုၵ်ႈဢွၼ်ႇၵေႃႈပႃး တၢႆတင်းမႄႈ တင်း လုၵ်ႈ။ လုၵ်ႈဢွၼ်ႇတိုၵ်ႉလႆႈ 2 လိူၼ်ၵူၺ်း။ ပႃးၵူၼ်းထဝ်ႈ ၵေႃႉၼိုင်ႈ၊ ၵူၼ်းမၢတ်ႇၸဵပ်းတႄႉ မီးၼမ်ၼႃႇ၊ ၼႂ်းၼၼ်ႉမၢင်ၵေႃႉ မၢတ်ႇၸဵပ်းႁၢဝ်ႈ ႁႅင်းလႄႈ လႆႈမႆႈၸႂ်”- ဝႃႈၼႆ။

ၵူၼ်းမၢတ်ႇၸဵပ်း ယၢမ်းလဵဝ် သူင်ႇဝႆႉတီႈႁူင်းယႃႇသုၼ်ႇလဵဝ် “သီႇဝၵ” တီႈဝဵင်းၵူတ်ႉၶၢႆဝႆႉ ဝႃႈၼႆ။

ၵူၼ်းမိူင်းဝဵင်းလႃႈသဵဝ်ႈ ဢၼ်ပၢႆႈၽေးသိုၵ်း မႃးယူႇဝႆႉတီႈ ဝဵင်းၵူတ်ႉၶၢႆ၊ ယၢမ်းလဵဝ် ယွၼ်ႉသိုၵ်းမၢၼ်ႈ မႃးပွႆႇမၢၵ်ႇတီႈဝဵင်းၵူတ်ႉၶၢႆလႄႈ လႆႈပၢႆႈမိူဝ်းၶိုၼ်း ဝဵင်းလႃႈသဵဝ်ႈ။

ၵူၼ်းပၢႆႈၽေးသိုၵ်း လႃႈသဵဝ်ႈ ယူႇဝႆႉတီႈ ၵူတ်ႉၶၢႆ လၢတ်ႈၽူႈတွႆႇႁွၵ်ႈဝႃႈ -“တီႈလႃႈသဵဝ်ႈ သိုၵ်းမၢၼ်ႈ ၵႆႉမႃးပွႆႇမၢၵ်ႇလႄႈ ပၢႆႈမႃးယူႇဝႆႉတီႈ ၵူတ်ႉၶၢႆ။ ၵမ်းၼႆႉ သိုၵ်းမၢၼ်ႈသမ်ႉ ၸွမ်းမႃးပွႆႇမၢၵ်ႇထႅင်ႈ တီႈၵူတ်ႉၶၢႆ၊ ႁဝ်းၶႃႈၵူဝ်လႄႈ ပၢႆႈမႃးၶိုၼ်းလႃႈသဵဝ်ႈ၊ တေပၢႆႈၵႂႃႇတၢင်းလႂ်ပေႃးဢမ်ႇႁူႉယဝ်ႉဝႃႈ၊ ယၢပ်ႇၸႂ်မႃးၵူႈဝၼ်း ၵူႈဝၼ်း”- ဝႃႈၼႆ။

ၼႂ်းလိူၼ်ၼူဝ်ႊဝႅမ်ႊပိူဝ်ႊ ဝၼ်းတီႈ 1 ယၢမ်းၵၢင်ၼႂ် 3 မူင်းၶိုင်ႈ သိုၵ်းမၢၼ်ႈ ပွႆႇမၢၵ်ႇတီႈဝဵင်းၵူတ်ႉၶၢႆ တီႈပွၵ်ႉ 2 ၊ လုမ်းၵဵပ်းၶွၼ်ႇ၊ လုမ်းၽႅဝ်ႈမူၺ်ႉယႃႈမဝ်းၵမ်၊ လုမ်းၾႆးၾႃႉ၊ လုမ်းၶႄၾႆး၊ ႁူင်းႁဵၼ်းလႄႈ ႁိမ်းၵဵတ်ႉ ဢေႊသျိူဝ်ႊဝေႃႊ ၵူၼ်းလူႉတၢႆ ၵေႃႉၼိုင်ႈ။

ဝဵင်းၵူတ်ႉၶၢႆၼႆႉ သိုၵ်းတဢၢင်း TNLA ပိုၼ်ၽၢဝ်ႇဝႃႈ ယိုတ်းၵုမ်းလႆႈဝႆႉ။ ၽႅၼ်ယၼ်ႇသိုၵ်း 1027 ပွၵ်ႈၵမ်း 2 ၼႆႉ။ တီႈဝဵင်းၵူတ်ႉၶၢႆ ပၢင်တိုၵ်းဢမ်ႇပဵၼ်သေတႃႉ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ 4 ပွၵ်ႈယဝ်ႉ ဝႃႈ ၼႆ။

ဝၼ်းတီႈ 17/11/2024 ယၢမ်းၵၢင်ဝၼ်းတဵင်ႈၵေႃႈ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇတီႈမၢၼ်ႈလူင် ၵိင်ႇၽႄ ၸႄႈဝဵင်းမိူင်းငေႃႉ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းမၢတ်ႇၸဵပ်း 5 ၵေႃႉ ႁိူၼ်းယေးလူႉၵွႆဢမ်ႇ ယွမ်း 15 လင်။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)