မိူဝ်ႈၼႆႉ ဝၼ်းတီႈ 18/11/2024 ယၢမ်းၵၢင်ဝၼ်း 11 မူင်းၶိုင်ႈ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇတူၵ်းသႂ်ႇပၢင်သဝ်းၵူၼ်းပၢႆႈ ၽေးသိုၵ်း ဢၼ်မီးတီႈႁိမ်းဝၢၼ်ႈလဢိ ၸႄႈဝဵင်းၾၢႆၶုၼ်။

သိုၵ်း PDF မိူင်းပၢႆးပိုၼ်ၽၢဝ်ႇဝႆႉဝႃႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇသႂ်ႇ တူၵ်းမႅၼ်ႈတီႈပၢင်သဝ်းပၢင်ၵွၵ်ႇ ဢၼ်မီးႁိမ်းဝၢၼ်ႈလဢိ။ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇသႅၼ်းၼမ်ႉၼၵ်း 500 ပွင်ႊလႄႈ 200 ပွင်ႊ တူၵ်းမႃး 5 လုၵ်ႈ။   

ၸုမ်းၸွႆႈထႅမ် ၵူၼ်းပၢႆႈၽေးသိုၵ်း တၢင်းဝဵင်းၾၢႆၶုၼ် လၢတ်ႈၽူႈတွႆႇႁွၵ်ႈဝႃႈ -“ၶိူင်ႈမိၼ်သိုၵ်းမၢၼ်ႈမႃး 6 ပွၵ်ႈ။ မႃးပွႆႇတူၵ်းသႂ်ႇတၢင်းဝၢၼ်ႈလဢိ ဢွင်ႈတီႈၵူၼ်းပၢႆးၽေးပၢင်ၵွၵ်ႇ၊ ပေႃးတူၺ်းၼႆ ၶဝ်တင်ႈၸႂ်မႃး ၸွမ်းယိုဝ်း ၵူၼ်းပၢႆႈၽေးသိုၵ်း တိၵ်းတိၵ်း၊ ၾၢင်ႉသေယူႇဝႆႉၼႆႉ လီသေပိူၼ်ႈယဝ်ႉ”- ဝႃႈၼႆ။

ယၢမ်းလဵဝ် တိုၵ်ႉၸွပ်ႇထၢမ် ၵူၼ်းမၢတ်ႇၸဵပ်းလူႉတၢႆလႄႈ ဢွင်ႈတီႈလူႉၵွႆလူႉသုမ်းဝႆႉယူႇ – ပႆႇလႆႈႁူႉတႅတ်ႈတေႃး မၼ်း ၸၢႆး သိုပ်ႇလၢတ်ႈထႅင်ႈၼင်ႇၼႆ။

ဢွင်ႈတီႈ ၵူၼ်းပၢႆးၽေးပၢင်ၵွၵ်ႇၼႆႉ ၵူၼ်းမိူင်းတၢင်းဝဵင်းၾၢႆၶုၼ်လႄႈ မိူင်းပၢႆး ပၢႆႈၽေးသိုၵ်း မႃးယူႇ သဝ်းဝႆႉ။

ၵူၼ်းပၢႆႈၽေးသိုၵ်းတင်း ၾၢႆၶုၼ် လၢတ်ႈၽူႈတွႆႇႁွၵ်ႈဝႃႈ – “ဢွင်ႈတီႈၵူၼ်းပၢႆးၽေးသိုၵ်း ပၢင်ၵွၵ်ႇၼႆႉ မီးၵူၼ်းတင်း ၾၢႆၶုၼ်လႄႈ မိူင်းပၢႆး ၵမ်ႈၼမ် ၊ လႆႈၵူဝ်သေၾၢင်ႉထွမ်ႇ ၶိူင်ႈမိၼ်သိုၵ်းမၢၼ်ႈ ယူႇတႃႇသေႇ၊ ၵူဝ်သိုၵ်းမၢၼ်ႈ မႃးပွႆႇမၢၵ်ႇ၊ ပေႃးငိၼ်းသဵင်ရူတ်ႉၵႃး ႁေႃႈလတ်းၵႂႃႇၵူၺ်းၵေႃႈ သမ်ႉပေႃးတူၵ်းၸႂ်ၵူဝ်ႁႄဝႆႉ ယူႇယဝ်ႉ။ ထၢင်ႇပဵၼ်ၶိူင်ႈမိၼ် သိုၵ်းမၢၼ်ႈမႃး၊ ၵၢင်ၶမ်ႈၵၢင်ၶိုၼ်းၵေႃႈ ဢမ်ႇႁတ်းၼွၼ်းလီလီ”- ဝႃႈၼႆ။

တီႈတင်းဝဵင်းၾၢႆၶုၼ်ၼႆႉ ယွၼ်ႉၼမ်ႉထူမ်ႈၼမ်ႉၼွင်းလႄႈ သူၼ်ႁႆႈၼႃးၵူၼ်းမိူင်းၵေႃႈ လူႉၵွႆလူႉသုမ်း တင်းၼမ်။ ၵူၼ်းမိူင်းယၢပ်ႇၸႂ်တႃႇ ႁႃၵိၼ်လဵင်ႉတွင်ႉ သေဢမ်ႇၵႃး လႆႈယၢပ်ႇၸႂ်ပႃးထႅင်ႈ ယွၼ်ႉသိုၵ်း မၢၼ်ႈ ႁၢမ်ႈတေႃႉသူင်ႇ ၶဝ်ႈၼမ်ႉတၢင်းၵိၼ်လႄႈ ယႃႈယႃႇဝႆႉၼႆ မၼ်းၸၢႆးသိုပ်ႇလၢတ်ႈထႅင်ႈၼင်ႇၼႆ။ 

မိူဝ်ႈၼႆႉ ဢၼ်သိုၵ်းမၢၼ်ႈ ပွႆႇမၢၵ်ႇဢွင်ႈတီႈၵူၼ်းပၢႆႈၽေးပၢင်ၵွၵ်ႇၼႆႉ ပဵၼ်ပွၵ်ႈၵမ်း 2 ၊ မိူဝ်ႈလိူၼ်သႅပ်ႊထႅမ်ႊပိူဝ်ႊ ဝၼ်းတီႈ 5 ၼၼ်ႉၵေႃႈ သိုၵ်းမၢၼ်ႈ မႃးပွႆႇမၢၵ်ႇဢွင်ႈတီႈ ၵူၼ်းပၢႆႈၽေးသိုၵ်းပၢင်ၵွၵ်ႇ လုၵ်ႈဢွၼ်ႇလႄႈ ၼၢင်းယိင်း လူႉတၢႆၸမ် 10 ဝႃႈၼႆ။

ယၢမ်းလဵဝ် တီႈတင်းၾၢႆၶုၼ်၊ မိူင်းပၢႆး၊ လွႆၶေႃ သိုၵ်းမၢၼ်ႈ ထႅမ်ႁႅင်းသိုၵ်း ၶိုၼ်ႈမႃးဢမ်ႇထၢတ်ႇလႄႈ ၸၢင်ႈပဵၼ်ပၢင်တိုၵ်းထႅင်ႈၼႆ ၵူၼ်းပိုၼ်ႉတီႈ လၢမ်းၶၢတ်ႈၼင်ႇၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)