သိုၵ်းတဢၢင်း TNLA ပိၵ်ႉဢိုတ်းသဵၼ်ႈတၢင်း ၼမ်ႉၶမ်း – မူႇၸေႊ ႁၢမ်ႈတေႃႉသူင်ႇၼမ်ႉမၼ်းၸိူဝ်ႉၾႆး (ၼမ်ႉမၼ်း ၸၢၵ်ႈ) ၵႂႃႇတၢင်းမူႇၸေႊ။

တႄႇဢဝ် ၵၢင်လိူၼ်ၼူဝ်ႊဝႅမ်ႊပိူဝ်ႊ 2024 ၼႆႉမႃး သိုၵ်းတဢၢင်း TNLA ပိၵ်ႉဢိုတ်းသဵၼ်ႈတၢင်း တီႈၵဵတ်ႉဢေႊသျိူဝ်ႊဝေႃႊ ဝၢၼ်ႈၼွင်ၶၢင် ၼႂ်းၵႄႈၼမ်ႉၶမ်း – မူႇၸေႊ ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ႁၢမ်ႈတေႃႉၼမ်ႉမၼ်း ၸိူဝ်ႉၾႆး သူင်ႇၶၢႆၸူး ၼႂ်းပိုၼ်ႉတီႈသိုၵ်းမၢၼ်ႈ ၵုမ်းၵမ် တၢင်းၸႄႈဝဵင်းမူႇၸေႊ ဝႃႈၼႆ။

ၵူၼ်းၼမ်ႉၶမ်း ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ဢၼ်သိုၵ်းလွႆ ၶဝ်ပိၵ်ႉၼႆႉ ပဵၼ်ၼမ်ႉမၼ်း ၸၢၵ်ႈ ဢၼ်လုၵ်ႉတၢင်းမိူင်းယႆ – လႃႈသဵဝ်ႈ ၶိုၼ်ႈမႃးတၢင်းၼမ်ႉၶမ်းၼႆႉသေ တေတေႃႉၵႂႃႇတၢင်းမူႇၸေႊၼၼ်ႉ ဢေႃႈ။ ၶဝ်ႁၢမ်ႈဝႆႉ တီႈဝၢၼ်ႈၼွင်ၶၢင်ၼၼ်ႉဢေႃႈ။ ၼမ်ႉမၼ်းၸၢၵ်ႈ တီႈမူႇၸေႊၼၼ်ႉ တေၵႃႈလိူဝ် တီႈၼမ်ႉၶမ်း ၵႂႃႇ ယၢမ်းလဵဝ် တီႈၼမ်ႉၶမ်းၼႆႉ 1 လိတ်ႉ 8,000 ပျႃး။ တီႈမူႇၸေႊ သမ်ႉ10,000 ပျႃး။ ပေႃးပဵၼ်ပုင်းလိူင် 20 လိတ်ႉသမ်ႉ ၼိုင်ႈပုင်း 220,000 ထိုင် 240,000 ပျႃး”- ဝႃႈၼႆ။

ဢိင်ၼိူဝ် လွင်ႈသိုၵ်းတဢၢင်း TNLA ႁၢမ်ႈတေႃႉသူင်ႇ ၼမ်ႉမၼ်းၸိူဝ်ႉၾႆး လုၵ်ႉၼမ်ႉၶမ်း တေႃႇသူင်ႇၶၢႆတၢင်းမူႇ ၸေႊ ၼၼ်ႉယဝ်ႉ။ ထႅင်ႈၾၢႆႇၼိုင်ႈသမ်ႉ တၢင်းၾင်ႇမိူင်းၶႄႇၵေႃႈ ႁၢမ်ႈတေႃႉသူင်ႇၶဝ်ႈမႃးၶၢႆ တၢင်းမူႇၸေႊ မိူၼ်ၵၼ် တင်ႈတႄႇ ႁၢင်လိူၼ်ဢွၵ်ႊထူဝ်ႊပိူဝ်ႊၼၼ်ႉမႃး။ လိူဝ်ၼၼ်ႉ ဝဵင်းၼမ်ႉၶမ်း – မူႇၸေႊၼႆႉ တေယၢၼ်ၵၼ် 19 လၵ်း။

ၵူၼ်းမူႇၸေႊ ၽူႈၸၢႆး ဢႃယု 30 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းလွႆၶဝ်ႁၢမ်ႈ ယဝ်ႉၶႃႈ ဢၼ်ၼမ်ႉမၼ်းၸၢၵ်ႈ လုၵ်ႉတၢင်းၼမ်ႉၶမ်း ၶိုၼ်ႈမႃးယဝ်ႉ။ တၢင်းၾင်ႇမိူင်းၶႄႇၵေႃႈ ဢမ်ႇပၼ် ၶဝ်ႈမႃး။ ပူၼ်ႉမႃးလၢႆဝၼ်းၼႆႉ တီႈမူႇၸေႊၼႆႉ ၵိၼ်းၸႂ်ဢေႃႈ။ ၼမ်ႉမၼ်းၸၢၵ်ႈ ဢၼ်ၵႂႃႇသႂ်ႇတီႈပၢမ်ႉ မၼ်းၼၼ်ႉ 1 လိတ်ႉ 10,000 ပျႃး ၼႆႉပဵၼ် ၼမ်ႉမၼ်းမႃးတၢင်း မိူင်းၶႄႇ။ ဢၼ်လုၵ်ႉတၢင်း မိူင်းမၢၼ်ႈမႃးသမ်ႉ 1 လိတ်ႉ 10,500 ပျႃး။ ဢၼ်သႂ်ႇတဝ်ႈသေ ၶၢႆၸွမ်းၶၢင်ႈတၢင်းသမ်ႉ 1 တဝ်ႈ 15,000 ပျႃး”- ဝႃႈၼႆ။

တႄႇဢဝ် ဝၼ်းတီႈ 22/10/2024 ၼၼ်ႉမႃး တၢင်းၾင်ႇမိူင်းၶႄႇ ႁၢမ်ႈၶူဝ်းၵုၼ်ႇ ၶွင်ၵိၼ်ယႅမ်ႉ၊ ၶိူင်ႈၸႂ်ႉၾႆး ၾႃႉ၊ ၼမ်ႉမၼ်းၸၢၵ်ႈ ၸိူဝ်းၼႆႉ တေႃႉၶဝ်ႈမႃးတၢင်းဝဵင်းမူႇၸေႊ ႁၢၼ်ႉတေႃႇထိုင် ယၢမ်းလဵဝ်။ မိူဝ်ႈဝၼ်းတီႈ 11/11/2024 ယၢမ်းၵၢင်ၼႂ် မိူင်းၶႄႇ ပိုၼ်ၽၢဝ်ႇ ႁၢမ်ႈၵူၼ်းမိူင်းမူႇၸေႊ တေႃႉၶူဝ်းၵုၼ်ႇ မိူင်းၶႄႇ ဢွၵ်ႇမႃးတၢင်းၽၵ်းတူၸၢင်ႉၽိူၵ်ႇ၊ ပၼ်တေႃႉသူင်ႇတၢင်း ၽၵ်းတူမၢၼ်ႈဝဵင်း၊ သမ်ႉပၢႆတတ်းမၵ်း သႅၼ်းၵုၼ်ႇ၊ မၢင်သႅၼ်း ဢမ်ႇပၼ်တေႃႉသူင်ႇၶဝ်ႈဢွၵ်ႇ ၵူၼ်းမိူင်းမူႇၸေႊ ပဵၼ်ဢၼ်မႆႈၸႂ် ၵူဝ်ၶူဝ်းၶွင်ၵိၼ်ယႅမ်ႉၶၢတ်ႇ။

ၵဵဝ်ႇလူၺ်ႈ ၽႅၼ်ယၢၼ်ႇသိုၵ်း 1027 ၼၼ်ႉမႃးသေ ႁၢၼ်ႉတေႃႇထိုင် ယၢမ်းလဵဝ်ၼႆႉ မီးၶၢဝ်းတၢင်း ပီပၢႆယဝ်ႉ ၼႂ်းၶၢဝ်းတၢင်း ပၢင်တိုၵ်းပွတ်းႁွင်ႇ ပီပၢႆၼႆႉ ယူႇတီႈ ၸုမ်းဢူၺ်းလီပွတ်းႁွင်ႇ 3 ၸုမ်း ယိုတ်းၵုမ်းလႆႈ ဝဵင်းတင်းၼမ်။ ဢၼ်ၶဝ် ပႆႇၵုမ်းလႆႈတႄႉ ၵိုတ်းထႅင်ႈ 3 ၸႄႈဝဵင်းၵူၺ်း ဢၼ်သိုၵ်းမၢၼ်ႈ ၵုမ်းဝႆႉၼႆႉ မိူၼ်ၼင်ႇ – ၸႄႈဝဵင်းမူႇၸေႊ၊ မိူင်းယႆလႄႈ တၢင်ႉယၢၼ်း ၸိူဝ်းၼႆႉ။

တီႈဝဵင်းၼမ်ႉၶမ်းသမ်ႉ ယူႇတီႈ သိုၵ်းတဢၢင်းသေ ယိုတ်းၵုမ်းမႃး တင်ႈတႄႇ မိူဝ်ႈၵၢင်လိူၼ်တီႊသႅပ်ႊပိူဝ်ႊ 2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ်။ တီႈၸႄႈဝဵင်းမူႇၸေႊသမ်ႉ သိုၵ်းၵဝ်ႈၵၢင်ႉ ယိုတ်းၵုမ်းဝႆႉ တၢင်းဝဵင်းပၢင်ႇသၢႆးလႄႈ မိူင်းၵူဝ်းဝႆႉ ၸိူဝ်းၼႆႉ။