ႁွင်ႈၵၢၼ်ၾၢႆႇၾႆးၾႃႉ ဝဵင်းၼမ်ႉၸၢင် ၵဵပ်းၵႃႈၸႂ်ႉၾႆးၾႃႉ(မီႊတိူဝ်ႊ) 2 ပုၼ်ႈ ၾႆးသမ်ႉဢမ်ႇပၼ်ၸႂ်ႉမၢၼ်ႇ ၵူၼ်းပိုၼ်ႉတီႈယၢပ်ႇၽိုတ်ႇ ၵိၼ်းၸႂ် လႆႈသိုဝ်ႉထၢၼ်ႇ/ ၽိုၼ်း ၸႂ်ႉတႃႇႁူင်တူမ်ႈ။  

ႁွင်ႈၵၢၼ် ၾၢႆႇၾႆးၾႃႉဝဵင်းၼမ်ႉၸၢင် ပိုၼ်ၽၢဝ်ႇဝႆႉၸဵမ်မိူဝ်ႈ ဝၼ်းတီႈ 01/09/2024 – ဝႃႈ တေၶိုၼ်ႈၵႃႈမီႊ တိူဝ်ႊၾႆး ၾႃႉ 2 ပုၼ်ႉ ဝႃႈၼႆသေ ထိုင်လိူၼ်သဵင်ႈမႃး မႃးၵဵပ်းငိုၼ်းၵႂႃႇ 2 ပုၼ်ႈ တႄႉယူႇသေတႃႉ ၾႆးၾႃႉတႄႉ ဢမ်ႇပွႆႇပၼ်မၢၼ်ႇ။ ပေႃးပွႆႇသမ်ႉ ပွႆႇပၼ်ၽွင်းၵူၼ်းမိူင်း လူဝ်ႇလပ်းလူဝ်ႇၼွၼ်း။ ယၢမ်းၵၢင်ဝၼ်း သမ်ႉဢမ်ႇပၼ်။ ၵူၼ်းမိူင်း ဢမ်ႇ ၸၢင်ႈႁဵတ်းၵၢၼ်ႁႃၵိၼ်လဵင်ႉတွင်ႉသင်ၼႆ ၼၢင်းယိင်း သႅၼ်းပၢၼ်ဢႃယု 28 ပီ ၵူၼ်းမိူင်းဝဵင်းၼမ်ႉၸၢင် ၵေႃႉၼိုင်ႈလၢတ်ႈၼင်ႇၼႆ။

“တေႃႈလဵဝ် ၵႃႈမီႊတိူဝ်ႊပုင်ႈ ၶိုၼ်ႈထိုင် 2 ပုၼ်ႈ၊ လိူၼ်ၼႆႉ တီႈႁိူၼ်းလႆႈပၼ် 5 မိုၼ်ႇပၢႆ။ တူၵ်း 1 ယူႊၼိတ်ႉ 250 ပျႃး၊ ၾႆးၵေႃႈပေႃးၶႂ်ႈမႃးၵေႃႈမႃး၊ ဢမ်ႇၶႂ်ႈမႃးၵေႃႈ ဢမ်ႇမႃး၊ ယၢပ်ႇၸႂ်ၵူၼ်းမိူင်းၼႃႇ”- ဝႃႈၼႆ။

ယွၼ်ႉပိူဝ်ႈၾႆးၾႃႉၵႆႉၶၢတ်ႇလႄႈ ၵူၼ်းမိူင်းဢမ်ႇၸၢင်ႈႁဵတ်းၵၢၼ်၊ ဢမ်ႇၸၢင်ႈႁုင်ၵိၼ်ၶဝ်ႈၽၵ်း၊ လႆႈသိုဝ်ႉထၢၼ်ႇ သိုဝ်ႉၽိုၼ်းဝႆႉ ၸႂ်ႉတႃႇႁုင်ၵိၼ်ႁုင်ယႅမ်ႉ။ 

ၼၢင်းယိင်း ၵူၼ်းၼမ်ႉၸၢင် သိုပ်ႇလၢတ်ႈထႅင်ႈဝႃႈ -“ၾႆးၵႆႉမွတ်ႇလႄႈ ၵူၼ်းယဵပ်ႉၶူဝ်းၵေႃႈ ပေႃးၾႆးမႃးၵေႃႈ ၼႅတ်ႈယဵပ်ႉ၊ ပေႃးၾႆးဢမ်ႇမႃးၵေႃႈ ဢမ်ႇၸၢင်ႈႁဵတ်းႁိုဝ်၊ တေယဵပ်ႉယဝ်ႉမိူဝ်ႈလႂ်ၼႆ ၶိၼ်းပိူၼ်ႈဝႆႉၵေႃႈ ပေႃးၾႆးဢမ်ႇမႃးၵေႃႈ ဢမ်ႇလႆႈဢမ်ႇၸၢင်ႈႁဵတ်းႁိုဝ်” – ဝႃႈၼႆ။

ၾႆးၾႃႉၼႆႉ ၶၢဝ်းပၼ်လႄႈ ၶၢဝ်းတတ်း ဢမ်ႇမီးၶၢဝ်းဢမ်ႇမီးယၢမ်း။ ၶႂ်ႈပၼ်ၶၢဝ်းလႂ်ၵေႃႈပၼ်သေ ၶႂ်ႈတတ်းၶၢဝ်းလႂ် ၵေႃႈတတ်း။ ၵမ်ႈၼမ် မႃးဢမ်ႇတၼ်းထိုင် ၶိုင်ႈၸူဝ်ႈမူင်းၵေႃႈ ၶၢတ်ႇယဝ်ႉ။ မၢင်ပွၵ်ႈ ႁုင်ၶဝ်ႈဝႆႉ ယင်းပႆႇတၼ်းသုၵ်း ၶဝ်ႈလူႉပႅတ်ႈၵေႃႈ တင်းၼမ်။ ဢမ်ႇတၼ်းလႆႈႁဵတ်းၵၢၼ်သင်။  

ဢၼ်ၾႆးၾႃႉမႃးႁိုင်သုတ်းၼႆႉ တေမီးမွၵ်ႈ 3 ၸူဝ်ႈမူင်း။ ၵႆႉမီးယၢမ်းၵၢင်ၶိုၼ်းၵူၺ်း။ ၼႆႉၵေႃႈ ႁိုင်ႁိုင်ၸင်ႇမီးၼိုင်ႈပွၵ်ႈ – ၵူၼ်းမိူင်း ဝဵင်းၼမ်ႉၸၢင် လၢတ်ႈၼင်ႇၼႆ။

“တွၼ်ႈတႃႇ ၵူၼ်းမိူင်းၼမ်ႉၸၢင်တႄႉ ၶႂ်ႈဝႃႈမိူၼ်ၵၼ်မူတ်းယဝ်ႉ။ ၸႂ်ယႂ်ႇၾႆးၾႃႉသေ ႁႃၵိၼ်လဵင်ႉတွင်ႉတႄႉ ဢမ်ႇပဵၼ်ယဝ်ႉ။ ဢၼ်လႆႈၾႆးၾႃႉမၢၼ်ႇတႄႉ ဢမ်ႇမီးၽႂ်။ ဢမ်ႇႁူႉယဝ်ႉၶႃႈ ၼႂ်းတပ်ႉသိုၵ်းၶဝ်တႄႉ”- ၵူၼ်းမိူင်းဝဵင်းၼမ်ႉၸၢင် လၢတ်ႈၼင်ႇၼႆ။                                                 

မိူဝ်ႈၵွၼ်ႇ တီႈဝဵင်းၼမ်ႉၸၢင် ထၢၼ်ႇၼိုင်ႈထူင် သိုဝ်ႉၶၢႆၵၼ် 8 ႁဵင်ပျႃး၊ ယၢမ်းလဵဝ် 1 ထူင် လႆႈပၼ် 3 မိုၼ်ႇပျႃး။ ၵူၼ်းမိူင်းလႆႈႁႃသိုဝ်ႉထၢၼ်ႇၽိုၼ်း၊ ၵႅတ်ႉသ်လႄႈ မၢၵ်ႇထၢၼ်ႇ Power Bank ဝႆႉ။

ၾႆးၾႃႉၼႂ်းမိူင်းတႆး ပွတ်းၸၢၼ်းၼႆႉ ဢဝ်တီႈႁူင်းၸၢၵ်ႈၾႆးၾႃႉၵဵင်းတွင်းသေ ၸႅၵ်ႇၸၢႆႇပၼ်ၸႂ်ႉ ဝႃႈၼႆသေတႃႉ တီႈတိူင်းသိုၵ်း တပ်ႉသိုၵ်းမၢၼ်ႈပၵ်းသဝ်းတႄႉ လႆႈၾႆးၾႃႉၸႂ်ႉမၢၼ်ႇယူႇ။ ၵူၼ်းမိူင်းတႄႉ ဢမ်ႇမီးၾႆးၾႃႉၸႂ်ႉ။ ယွၼ်ႉပိူဝ်ႉၾႆးၾႃႉ ဢမ်ႇမႃးမၢၼ်ႇသေ ထိုင်တီႈၾႆးမႆႈႁိူၼ်းယေး ဝတ်ႉဝႃးၽႃသိူဝ်ႇၵေႃႈ ယၢမ်ႈမီးမႃးတင်းၼမ်တင်းလၢႆ။ ၵူၼ်းလႆႈတၢႆ ယွၼ်ႉၾႆးၵေႃႈ ဢမ်ႇၼပ်ႉဢမ်ႇဢၢၼ်ႇလႆႈ။

ၵူၼ်းမိူင်းဝဵင်းၼမ်ႉၸၢင် ဢွၼ်ၵၼ်လၢတ်ႈဝႃႈ – ပေႃးသိုၵ်းမၢၼ်ႈ ဢမ်ႇမူၼ်ႉမႄး ပိူင်ငဝ်ႈပိုင်းမိူင်းသေ ၵုမ်ႇၶိုင်လွင်ႈသိုၵ်းသိူဝ် ၼႂ်းမိူင်းယူႇ ၸိူင်ႉၼႆတိၵ်းတိၵ်းတႄႉ – ပၼ်ႁႃၵူႈလွင်ႈလွင်ႈ တေၸၢင်ႈယႂ်ႇမႃး၊ ဢမ်ႇၵႃး ၵၢၼ်မိူင်းၵၢၼ်သိုၵ်း ၵူၺ်း ၽေးသၽႃႇဝၵေႃႈ ၸၢင်ႈထူပ်းမႃးၵူႈသမ်ႇၵူႈပိူင် ဝႃႈၼႆ။

ယၢမ်းလဵဝ် ယွၼ်ႉၶၼ်ၾႆးၾႃႉၶိုၼ်ႈသုင်လႄႈ ၵႃႈၶၼ်ထၢၼ်ႇ ၽိုၼ်းသုင်ယဝ်ႉ ၵႃႈၶၼ်ၽၵ်းယိူဝ်ႈၼၢင်းၶဵဝ် ၶူဝ်းၶွင် ၵိၼ်ယႅမ်ႉသုင်ၵူႈဢၼ်။ ၶၼ်ဢႃႇလူးၸွႆႉ 9,500 ပျႃး။ ၶၼ်မၢၵ်ႇၶိူဝ်သူမ်ႈ ၸွႆႉ 8,000 ပျႃး ၶၼ် ၽၵ်းမီႇလႅင် ၸွႆႉ 6,000 ပျႃး။ 

မိူၼ်ၼင်ႇ ဝဵင်းတူၼ်ႈတီး ၸိုင်ႈတႆးပွတ်းၸၢၼ်းၵေႃႈ ၾႆးၾႃႉၵႆႉၶၢတ်ႇ ႁဵတ်းႁႂ်ႈၵူၼ်းမိူင်းထူပ်းတၢင်း ယၢပ်ႇၽိုတ်ႇႁႅင်း ၶႂ်ႈပၼ်ၶၢဝ်းလႂ် မႃးၶၢဝ်းလႂ်ၵေႃႈ ဢဝ်ၵမ်ႉၶဝ်ပၼ်မႃးၵူၺ်း ၵူၼ်းပိုၼ်ႉတီႈလၢတ်ႈၼင်ၼႆ။

ၸူဝ်ႈသိုၵ်းမၢၼ်ႈ ယိုတ်းမိူင်းမႃးၼႆႉ ၵၢၼ်ပၢႆးမၢၵ်ႈမီးတူၵ်းတႅမ်ႇႁႅင်း။ ၵူၼ်းမိူင်းႁႃၵိၼ်ယၢပ်ႇ။ ပၢင်တေႃႇလွင်း ယႃႈမဝ်း ၵမ် ၽူႈလၵ်ႉၸၵ်ႉၶုတ်ႈ ယိင်ႈၶႅၼ်းလိူင်ႇၼမ်ႁႅင်း။ ၾႆးၾႃႉၵႆႉၶၢတ်ႇ ၼႂ်းမိူင်းတႆးပတ်းပိုၼ်ႉ ဢွၼ်ၵၼ်ထူပ်းတၢင်းယၢပ်ႇၽိုတ်ႇထႅင်ႈ ႁၢဝ်ႈႁႅင်း။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)