မၢၵ်ႇၶိူင်ႈမိၼ် သိုၵ်းမၢၼ်ႈ မႃးပွႆႇတီႈမိူင်းငေႃႉ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းမၢတ်ႇၸဵပ်း 5 ၵေႃႉ ႁိူၼ်းယေးလူႉၵွႆ ဢမ်ႇယွမ်း 15 လင်။
ဝၼ်းတီႈ 17/11/2024 ယၢမ်းၵၢင်ဝၼ်းမွၵ်ႈ 12 မူင်း သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇတီႈမၢၼ်ႈလူင် ၵိင်ႇၽႄၸႄႈဝဵင်းမိူင်းငေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ပဵၼ်မၢၵ်ႇလူင်သႅၼ်းၼမ်ႉၼၵ်း 300 ပွင်ႇ 2 လုၵ်ႈ တိူဝ်ႉၺႃးၽူႈၸၢႆး ၵေႃႉၼိုင်ႈလႄႈ ၽူႈယိင်း 4 ၵေႃႉ လႆႈမၢတ်ႇၸဵပ်း။
ၵူၼ်းၵျွၵ်ႉမႄး ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁိူၼ်းယေး လူႉၵွႆၵႂႃႇ ဢမ်ႇယွမ်း 15 လင်ၶႃႈ။ ၸၢၵ်ႇမၢၵ်ႇ တိူဝ်ႉၺႃး ၵူၼ်းမိူင်းမၢတ်ႇၸဵပ်းထႅင်ႈ 5 ၵေႃႉ။ ၼႂ်းၼၼ်ႉ ပဵၼ်ၸၢႆး 1 ၵေႃႉလႄႈ ယိင်း 4 ၵေႃႉ”- ဝႃႈၼႆ။
ၵူၼ်းမိူင်းငေႃႉ ဢၼ်ၺႃးမၢတ်ႇၸဵပ်း 5 ၵေႃႉၼၼ်ႉသမ်ႉ – ပဵၼ်ၸၢႆး ဢႃယု 29 ပီ။ ယဝ်ႉၵေႃႈ ထဝ်ႈယိင်း ဢႃယု 74 ပီ၊ ဢႃယု 62 ပီ၊ ဢႃယု 59 ပီလႄႈ ဢႃယု 49 ပီ။ ၵမ်ႈၼမ် တိူဝ်ႉမၢတ်ႇၸဵပ်း ၸွမ်းၼႃႈ၊ ၶေႃးလႄႈ ၶႃ ၸိူဝ်းၼႆႉ။
တီႈမိူင်းငေႃႉၼႆႉ ပူၼ်ႉမႃး မိူဝ်ႈဝၼ်းတီႈ 31/12/2023 ၼၼ်ႉ ယူႇတီႈ ၸုမ်းဢူၺ်းလီပွတ်းႁွင်ႇ 3 ၸုမ်း ႁူမ်ႈၵၼ် လေႃႇတိုၵ်းတပ်ႉသိုၵ်းမၢၼ်ႈ ယိုတ်းမိူင်း မႃးႁၢဝ်ႈႁႅင်းသေ ယိုတ်းၵုမ်းလႆႈဝႆႉ ႁၢၼ်ႉတေႃႇထိုင် ယၢမ်းလဵဝ်။ ဢိင်ၼိူဝ် လွင်ႈသိုၵ်းမၢၼ်ႈ မႃးပွႆႇမၢၵ်ႇ ၼႂ်းဝၼ်းတီႈ 17 ၼႆႉ ပဵၼ်ပွၵ်ႈၵမ်းႁႅၵ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ