မိူဝ်ႈၼႆႉ ဝၼ်းတီႈ 15 /07/2025 ယၢမ်းၵၢင်ဝၼ်း မွၵ်ႈ 1 မူင်း ႁိူဝ်းမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇ ၵဵၵ်ႉလၢၼ်ႇသိုၵ်းတဢၢင်း ဢၼ်တင်ႈဝႆႉႁိမ်းၶူဝ် တၢင်းၽႄမၢၼ်ႈပိုၼ်ႉ သဵၼ်ႈတၢင်းၶဝ်ႈဝဵင်းမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။

ၼၢင်းယိင်းၵူၼ်းမိူင်းငေႃႉ  လၢတ်ႈတီႈၽူႈတွႆႇႁွၵ်ႈဝႃႈ “ဢမ်ႇၸႂ်ႈၶူဝ်ဢၼ်မီးၼႂ်းဝဵင်း။ မၢၵ်ႇတူၵ်းသႂ်ႇႁိမ်းၶူဝ် တီႈတၢင်းၽႄ မၢၼ်ႈပိုၼ်ႉ တၢင်းၶဝ်ႈမႃးဝဵင်းမိူင်းငေႃႉၼၼ်ႉ။ ၶူဝ်ဢမ်ႇပေႃးတိူဝ်ႉႁႅင်းလႄႈ ယင်းတိုၵ်ႉတေႃႉတႄႉၵႂႃႇမႃးလႆႈယူႇ” ဝႃႈၼႆ။

တီႈၵဵတ်ႉလၢၼ်ႇၼၼ်ႉမီးႁႅင်းသိုၵ်းလၢႆၵေႃႉလႄႈ မီးလွင်ႈမၢတ်ႇၸဵပ်းလူႉတၢႆလၢႆၵေႃႉတႄႉပႆႇလႆႈႁူႉတႅတ်ႈတေႃး။ ၾၢႆႇပွင်ႇၶၢဝ်ႇသိုၵ်းတဢၢင်း TNLA ၵေႃႈပႆႇပိုၼ်ၽၢဝ်ႇလွင်ႈၼႆႉဝႃႈႁိုဝ်။

လႆႈႁူႉဝႃႈ ႁိူဝ်းမိၼ်တိုၵ်းသိုၵ်းမၢၼ်ႈ ဢၼ်ၵႂႃႇပွႆႇမၢၵ်ႇသႂ်ႇတီႈတၢင်းၶဝ်ႈဝဵင်းမိူင်းငေႃႉၼႆႉ လတ်းဝဵင်းၵျွၵ်ႉမႄးၵႂႃႇ ။ မိၼ်တႅမ်ႇၼႃႈလႄႈၵူၼ်းၼႂ်းဝဵင်း သမ်ႉပေႃးတူၵ်းၸႂ် ဢွၼ်ၵၼ်ပၢႆႈသွၼ်ႈ ၶဝ်ႈလုၵ်းပဵမ်ႇ လႄႈတီႈလွတ်ႈၽေးမၢၵ်ႇၵွင်ႈ။  ဝဵင်းၵျွၵ်ႉမႄး လႄႈ ဝဵင်းမိူင်းငေႃႉၼႆႉ ယၢၼ်ၵႆၵၼ် မွၵ်ႈ 20 လၵ်းပၢႆ ဝႃႈၼႆ။

မိူဝ်ႈပူၼ်ႉမႃး ၼႂ်းလိူၼ်မေႇၼၼ်ႉၵေႃႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ႁိမ်းဝဵင်းမိူင်းငေႃႉ ၸႄႈဝဵင်းၵျွၵ်ႉမႄးၼၼ်ႉ 2 ပွၵ်ႈသေ တူၵ်းသႂ်ႇႁိမ်းႁူင်းႁဵၼ်းသွၼ်လိၵ်ႈ ၼႂ်းပွၵ်ႉတႃႈလူင် လႄႈ ဝၢၼ်ႈၵွင်းၸလၢၼ်းၼၼ်ႉ ၼႆယဝ်ႉ။

တႄႇႁၢင်လိူၼ်ၵျုၼ်ႊ တေႃႇထိုင် လိူၼ်ၵျူႊလၢႆႊ ဝၼ်းတီႈ 15 မိူဝ်ႈၼႆႉ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၼႃႈတီႈ သိုၵ်းတဢၢင်းၵုမ်းၵမ်ဝႆႉၸူဝ်ႈၶၢဝ်း ဝၢႆးလင် ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ၼၼ်ႉ တီႈၸႄႈဝဵင်းၵျွၵ်ႉမႄး 7 ပွၵ်ႈ၊ ၸႄႈဝဵင်းသီႇပေႃႉ 2 ပွၵ်ႈသေ ၵူၼ်းမိူင်းတၢႆၵႂႃႇ မွၵ်ႈ 12 ၵေႃႉ၊ မၢတ်ႇၸဵပ်းၵႂႃႇၸွမ်း 30 ၵေႃႉ ၼႆယဝ်ႉ။

တႅမ်ႈ- ၽူၺ်းၼုမ်ႇ