ႁႅင်းၵၢၼ်မိူင်းမၢၼ်ႈ ၺႃးယိုဝ်းတၢႆ 2 ၵေႃႉတီႈ ၸႄႈတွၼ်ႈရၢတ်ႉၶျပူႇရီႇ မိူင်းထႆး ပဵၼ်ၽႂ်ၶႃႈႁႅမ်တၢႆ ယွၼ်ႉသင်ၼႆ ပလိၵ်ႈတိုၵ်ႉၵူတ်ႇထတ်းဝႆႉယူႇ။
ဝၼ်းတီႈ 14/11/2024 ပလိၵ်ႈမေႃယႃလႄႈ ၸုမ်းၸွႆႈထႅမ် ၵႂႃႇထူပ်းႁၼ် တူဝ်တၢႆၶဝ်ၾင်ဝႆႉၶၢင်ႈတၢင်းသေ ဢဝ်မၢၵ်ႇႁိၼ်မၢၵ်ႇသၢႆးထူမ်ဝႆႉ။
ၽူႈတၢႆ ပဵၼ်ၽူႈၸၢႆး တင်း2 ၵေႃႉ။ ပဵၼ်ၵူဝ်ႇဢွင်ႇသၢၼ်း ဢႃယု 43 ပီ။ တီႈတူဝ်တၢႆ မီးႁွႆးမၢၵ်ႇ ၵွင်ႈဝႆႉတီႈၵွၵ်းႁူဝ်လႄႈ တီႈပုမ်။ တီႈမိုဝ်းၾၢႆႇၶႂႃၵေႃႈ မီးႁွႆးမၢတ်ႇၸဵပ်းဝႆႉ။ မိုဝ်းထိုဝ်၊ ငိုၼ်းၽွင်ႈ လႄႈ ဝတ်းဝႂ်ႁႅင်းၵၢၼ် ဢိၵ်ႇပႃးတင်း ဝတ်းဝႂ် ႁေႃႈရူတ်ႉႁေႃႈၵႃးတႄႉ တိုၵ်ႉၵိုတ်းဝႆႉ တီႈတူဝ်တၢႆ ယူႇ။
တူဝ်တၢႆ ထႅင်ႈၵေႃႉၼိုင်ႈသမ်ႉ ယၢၼ်ၵႆၵၼ်တင်း တူဝ်တၢႆၵူဝ်ႇဢွင်ႇသၢၼ်း မွၵ်ႈ 300 လႃ။ ၸိုဝ်ႈႁွင်ႉ ၸေႃးၸေႃး။ ၺႃးပေႃႉထုပ်ႉႁဵတ်းႁၢႆႉဝႆႉ ပဵၼ်လိူတ်ႈပဵၼ်ယၢင်။ သဵၼ်ႈတၢင်းဢၼ်ၶႃသွင်ၵေႃႉ ၺႃးၶႃႈတၢႆၼၼ်ႉ ရူတ်ႉၵႃးယႂ်ႇဢမ်ႇပေႃးၵႂႃႇ။ ပဵၼ်သဵၼ်ႈတၢင်းရူတ်ႉၶိူင်ႈလႄႈၵူၼ်းပႆၵူၺ်းလႄႈ လႅပ်ႈတေပဵၼ်ၵူၼ်းႁူႉၸၵ်းၵၼ်ၵူၺ်း ပလိၵ်ႈလၢတ်ႈၼင်ႇၼႆ။
ႁႅင်းၵၢၼ်ၸိူဝ်းၼႆႉ ပဵၼ် ၵူၼ်းႁဵတ်းၵၢၼ် တီႈၸႄႈတွၼ်ႈသမုတ်ႇသႃၶွၼ်း။ ၶႃဢွၵ်ႇႁိူၼ်းၵႂႃႇ ၸွမ်းၵၼ် မိူဝ်ႈဝၼ်းတီႈ 13/11/2024 ယၢမ်းၵၢင်ၶမ်ႈ။
ပလိၵ်ႈတႄႉလၢတ်ႈဝႃႈ ပႆႇတီႉလႆႈၵေႃႉၶႃႈႁႅမ်ၶဝ်။ တိုၵ်ႉၵူတ်ႇထတ်းတူၺ်းၸွမ်းၵွင်ႈထၢႆႇ CCTV ယူႇ။ တေၶတ်းၸႂ် တီႉၺွပ်းၵူၼ်းပူၼ်ႉပႅၼ်ၶႃႈႁႅမ်ႁႂ်ႈလႆႈ – သိုဝ်ႇၶၢဝ်ႇ Bangkok Post ဢွၵ်ႇဝႆႉၼင်ႇၼႆ။
