ၵဵဝ်ႇၵပ်းလူၺ်ႈ ဢမုၶတီး တဵၵ်းၸႂ်ႉၵိၼ်ႁႅင်းၵၢၼ် လုၵ်ႈဢွၼ်ႇသေ တဵၵ်းတဵင်ပူၼ်ႉပႅၼ်ႁဵတ်းႁၢႆႉ တေႃႇလုၵ်ႈဢွၼ်ႇ ၵူၼ်းမိူင်းမၢၼ်ႈ ၵေႃႉၼိုင်ႈၼၼ်ႉ ပလိၵ်ႈထႆး တီႉၺွပ်းၸဝ်ႈႁိူၼ်း၊ ၵူၼ်းယူႇၵႄႈၵိၼ်ၵၢင်(ၼၢႆးၼႃႈ) မၢၼ်ႈ ၵေႃႉၼိုင်ႈလႄႈ ထႆးၵေႃႉၼိုင်ႈ တီႈၸႄႈတွၼ်ႈၶျူၼ်ႊပူႊရီႊ မိူင်းထႆး။

ဝၼ်းတီႈ 14/11/2024 ၼႆႉ ပလိၵ်ႈထႆးပိုၼ်ၽၢဝ်ႇဝႃႈ – ၸဝ်ႈႁိူၼ်း ၸိုဝ်ႈၼၢင်းသၢဝ် ၽွၼ်းထိပ်ႉ ဢႃယု 65 ပီ ဢၼ် ၸၢင်ႈလုၵ်ႈဢွၼ်ႇ ၵူၼ်းမိူင်းမၢၼ်ႈ ဢႃယု 8 ၶူပ်ႇ မႃးၸႂ်ႉပၢႆတိၼ်ပၢႆမိုဝ်းသေ ပေႃႉထုပ်ႉႁဵတ်းႁၢႆႉလုၵ်ႈဢွၼ်ႇ ထိုင်တီႈမၢတ်ႇၸဵပ်း ပၢႆႈဢွၵ်ႇႁိူၼ်း – ပဵၼ်ၶၢဝ်ႇပဵၼ်ငၢဝ်း မိူဝ်ႈႁူဝ် ပီ 2024 ၼႆႉၼၼ်ႉ – ပလိၵ်ႈထႆး တီႉၺွပ်းမၼ်းၼၢင်းတီႈ ဝဵင်းပၢၼ်ႉသူၼ်။ လိူဝ်ၼၼ်ႉ တီႉလႆႈ ပႃး ၵူၼ်းၵၢင်(ၼၢႆးၼႃႈ) ၸၢဝ်းထႆး ၸိုဝ်ႈသမၢၼ် (ဢႃယု 50 ပီ) လႄႈ ၸၢဝ်းမၢၼ်ႈ ၼေႃႇထႃး ထႃးယီႇ ဢၼ်ဢဝ်လုၵ်ႈဢွၼ်ႇ သူင်ႇၶၢႆပၼ် ၸဝ်ႈႁိူၼ်း ၼၢင်းသၢဝ်ၽွၼ်းထိပ်ႉ။

ယၢမ်းလဵဝ် ၸိူဝ်းၶဝ်တင်းသၢမ် ထုၵ်ႇၵုမ်းၶင်ဝႆႉတီႈႁွင်ႈၶင်သေ ဢဝ်မႃးၵူတ်ႇထတ်းၶိုၼ်ႈ လုမ်းတြႃးၸႄႈတွၼ်ႈ ၶျူၼ်ႊပူႊရီႊဝႆႉသေ တေပၼ်တူတ်ႈတၢမ်ႇလူၺ်ႈပူၼ်ႉပႅၼ်ပၵ်းပိူင် ၸႂ်ႉၵိၼ် ႁႅင်းလုၵ်ႈဢွၼ်ႇ၊ ပေႃႉထုပ်ႉႁႅမ်လုၵ်ႈ ဢွၼ်ႇပူၼ်ႉတိၼ်ပူၼ်ႉမိုဝ်း၊ ပိူင်လူင်တၢင်းၽိတ်း ၵူၼ်းၵႃႉ ၵူၼ်းၸိူဝ်းၼႆႉ ၼႆပလိၵ်ႈ ပိုၼ်ၽၢဝ်ႇၼႂ်းၶၢဝ်ႇထႆး ဝႆႉၼင်ႇၼႆ။

လုၵ်ႈဢွၼ်ႇယိင်း ႁႅင်းၵၢၼ်ဢၼ်ၺႃးၸႂ်ႉၵိၼ်ႁႅင်းလၢႆၼႆႉ ၸိုဝ်ႈႁွင်ႉၼွင်ႉဢေး ဢႃယု 8 ပီ။ မိူဝ်ႈႁူဝ်ပီၼႆႉ ၼၢႆးၼႃႈ ၼေႃႇထႃးထႃးယီႇၼႆႉ လၢတ်ႈဝႃႈ တေၵဵပ်းလဵင်ႉၼႆသေ – ပၼ်ငိုၼ်းတီႈ ပေႃႈ မႄႈလုၵ်ႈဢွၼ်ႇသေ ဢဝ်တူဝ်လုၵ်ႈ ဢွၼ်ႇမႃး ၶၢႆၵိၼ်တီႈၼၢႆးၼႃႈ သမၢၼ်ၼႆႉသေထိုင်ၵႂႃႇၼႂ်း မိုဝ်း ၼၢင်းသၢဝ်ၽွၼ်းထိပ်ႉ။

ဝၢႆးလင် ၺႃးၸႂ်ႉၵိၼ်ႁႅင်းလၢႆ၊ ဢမ်ႇလဵင်ႉၶဝ်ႈဢိမ်ႇ၊ ပေႃႉထုပ်ႉႁဵတ်းႁၢႆႉႁႅင်းလႄႈ လုၵ်ႈဢွၼ်ႇ ဢမ်ႇၶၢမ်ႇလႆႈသေ ၸင်ႇလၵ်ႉပၢႆႈဢွၵ်ႇႁိူၼ်း မႃးၼွၼ်းၼႂ်းပႃႇႁဵဝ်ႈ။ ပွမ်ႈၸၼ်းတႃး မႃးႁၼ်သေ ၸႅင်ႈပလိၵ်ႈ ၊ ယၢမ်းလဵဝ်လုၵ်ႈဢွၼ်ႇၼၼ်ႉ ၸုမ်းၸွႆႈထႅမ်ပူၵ်းပွင်လုၵ်ႈဢွၼ်ႇၽၢၼ်ပေႃႈမႄႈ ဢဝ်ၵႂႃႇပူၵ်းပွင်လုမ်းလႃးဝႆႉယဝ်ႉ။

ဢၢင်ႈဢိင် – Matichon / CH3 Plus / Topnews