သိုၵ်းမၢၼ်ႈလႄႈ လူင်ပွင်ၸိုင်ႈမိူင်းၶႄႇ ႁူမ်ႈၵၼ်သေ သင်ႇႁၢမ်ႈရူတ်ႉၵႃး တၢင်ႇၶူဝ်းၵုၼ်ႇ ၸိူဝ်းၶဝ်ႈဢွၵ်ႇတီႈလၢၼ်ႇလႅၼ်လိၼ် ဢၼ်မီးၼႂ်းၼႃႈလိၼ်ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၵုမ်းဝႆႉ မိူၼ်ၼင်ႇ ၵဵတ်ႉ/ လၢၼ်ႇ လွႆၸႄႈ ၼႂ်းၼႃႈတီႈ KIA လႄႈ ၵဵတ်ႉ/ လၢၼ်ႇ ၼႂ်းၼႃႈလိၼ် ဝႃႉ- ၵဝ်ႈၵၢင်ႉၵုမ်း။

ၶႄႇတႄႇသင်ႇႁၢမ်ႈ လၢၼ်ႇၸိူဝ်းၼႆႉ တင်ႈတႄႇ လိူၼ်ဢွၵ်ႊထူဝ်ႊပိူဝ်ႊပူၼ်ႉမႃး ထိုင်မႃး ဝၼ်းတီႈ 11/11/2024 KIA ၸင်ႇၶိုၼ်းသင်ႇႁၢမ်ႈရူတ်ႉၵႃး တၢင်ႇၶူဝ်းၵုၼ်ႇ မိူင်းမၢၼ်ႈ ဢၼ်တေဢဝ် ၶဝ်ႈမိူင်းၶႄႇ ဝႃႈၼႆ။

ၸဝ်ႈရူတ်ႉၵႃး ၵူၼ်းမိူင်းၶၢင် ၵေႃႉၼိုင်ႈ လၢတ်ႈဝႃႈ -“ၶူဝ်းၵုၼ်ႇ ဢၼ်ၵူၼ်းမိူင်းႁဝ်း တေဢဝ်ၶူဝ်းမိူင်းၶႄႇ ၶဝ်ႈမႃးလႄႈသင်။ ဢၼ်တေဢဝ်ၶူဝ်းမိူင်းႁဝ်း ဢွၵ်ႇၵႂႃႇၶၢႆၸိူဝ်းၼႆႉလႄႈသင် ဢမ်ႇၸၢင်ႈဢဝ်ၶဝ်ႈ/ ဢွၵ်ႇ လီလီ။ ၶႄႇႁၢမ်ႈဝႆႉ။ မိူၼ်ၼင်ႇဝႃႈ သိုၵ်းမၢၼ်ႈလႄႈၶႄႇ ႁူမ်ႈၵၼ် ဢိုတ်းႁႅတ်ႉ ၶူဝ်းၵုၼ်ႇၶဝ်ႈဢွၵ်ႇၼႂ်းၼႃႈ တီႈသိုၵ်းၶၢင် သိုၵ်းၸၢဝ်းၶိူဝ်းၵုမ်းၵမ်ၼၼ်ႉယဝ်ႉ”- ဝႃႈၼႆ။

မိူဝ်ႈဝၼ်းတီႈ 23/10/2024 ၼၼ်ႉ ၵူၼ်းၵႃႉမိူင်းၶႄႇ မႃးႁေႃႈရူတ်ႉၵႃးတၢင်ႇၵူၺ်ႈ မွၵ်ႈ 40 လမ်း လုၵ်ႉတၢင်းမိူင်းမၢၼ်ႈ ဢၢၼ်းဢဝ်ၶၢမ်ႈလၢၼ်ႇ လွႆၸႄႈ။ ၸိူင်ႉၼၼ်တႄႉ မိူင်းၶႄႇသမ်ႉ ပၼ်ႁဵတ်းယူႇ။ ၵူၺ်း ၵႃႈ ပေႃးတေဢဝ်ၶူဝ်းၵုၼ်ႇ မိူင်းၶဝ်ၶဝ်ႈမႃးမိူင်းမၢၼ်ႈတႄႉ ၶဝ်ႁၢမ်ႈ။ ပိူင်လူင်ၶႄႇႁၢမ်ႈၼႆႉ ပဵၼ်ၵဵတ်ႉ/ လၢၼ်ႇ ဢၼ်မီးၼႂ်းၼႃႈလိၼ် KIA – MNDAA – UWSA – NDAA ၶဝ်ၵုမ်းၵမ်ယိုတ်းလႆႈဝႆႉ။ ၵူၺ်းၵႃႈ ပေႃး မီးၶူဝ်းဢၼ်မိူင်းၶႄႇ ၶႂ်ႈလႆႈတႄႉ တူဝ်ၶႄႇၶဝ်ႈမႃးႁေႃႈရူတ်ႉၵႃး တၢင်ႇၶူဝ်းၵုၼ်ႇ ဢဝ်ၶဝ်ႈမိူဝ်းမိူင်းၶဝ် – ၵူၼ်းပိုၼ်ႉတီႈ လၢတ်ႈၼင်ႇၼႆ။

တီႈလႅၼ်လိၼ်မိူင်းၶၢင် ဢၼ်သိုၵ်းၶၢင် KIA ၵုမ်းလႆႈဝႆႉၼႆႉ မီးၵဵတ်ႉလၢၼ်ႇ လၢႆႇၸႃႇ၊ မၢႆႇၵျႃႇယၢင်ႇ၊ ပၢင်ဝႃႈ၊ လွႆၸႄႈ၊ ၽီမေႃ ၸိူဝ်းၼႆႉ မီးမွၵ်ႈ 8 တီႈ။ ၵူၺ်းၵႃႈ ဢိင်ၼိူဝ်မိူင်းၶႄႇ ႁဵတ်းၸိူင်ႉၼႆသေ ၾၢႆႇတၢင်း သိုၵ်းၶၢင် KIA တႄႇပႆႇဢွၵ်ႇမႃးပိုၼ်ၽၢဝ်ႇသင် ပဵၼ်တၢင်းၵၢၼ်။

လွင်ႈၼႆႉ ၶႅပ်းႁၢင်ႈဢၼ်သိုၵ်းၶၢင် KIA ၶိုၼ်းႁႄႉရူတ်ႉၵႃးတၢင်ႇၶူဝ်းၵုၼ်ႇ တၢင်းမိူင်းၶၢင် တေၶဝ်ႈမိူင်းၶႄႇသေ ၵူတ်ႇထတ်းထဵတ်ႈထၢမ် ဝႆႉယူႇ။

ၵူၼ်းၵႃႉမိူင်းၶၢင်လၢတ်ႈဝႃႈ – ဢၼ်ၶႄႇလႄႈ သိုၵ်းမၢၼ်ႈႁဵတ်းၼႆႉ ၶႂ်ႈမိပ်ႇငႅၼ်း ၸုမ်းယိပ်းၵွင်ႈၵၢင်ႇ ဝႃႈၼႆသေတႃႉ တုမ်ႉတိူဝ်ႉပႃး ၵူၼ်းမိူင်းၵမ်းသိုဝ်ႈ၊ ၵွပ်ႈၼႆ မိူင်းၶႄႇၼႆႉ ပဵၼ်ၽူႈၵမ်ႉယၼ် ပၼ်ႁႅင်းသိုပ်ႇသၢႆၸႂ် ၸဝ်ႈဢႃႇၼႃႇ သိုၵ်းမၢၼ်ႈၼႆၵေႃႈ ဝႃႈလႆႈ – သိုဝ်ႇၶၢဝ်ႇ People Spring ဢွၵ်ႇဝႆႉၼင်ႇၼႆ။