မိူဝ်ႈၼႆႉ ဝၼ်းတီႈ 17/11/2024 ယၢမ်ႈၵၢင်ဝၼ်း 12 မူင်း သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ် မႃးပွႆႇမၢၵ်ႇ တီႈဝၢၼ်ႈလူင် ၵိင်ႇၽႄၸႄႈဝဵင်းမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ 2 လုၵ်ႈ ၸၢၵ်ႇမၢၵ်ႇတိူဝ်ႉၺႃး ထဝ်ႈယိင်းမၢတ်ႇၸဵပ်း 2 ၵေႃႉ။

ၵူၼ်းၵျွၵ်ႉမႄး ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇၶိူင်ႈမိၼ် သိုၵ်းမၢၼ်ႈ မႃးပွႆႇၶႃႈ ဢေႃႈ ပဵၼ်မၢၵ်ႇၼမ်ႉၼၵ်း 300 ပွင်ႇ 2 လုၵ်ႈ ဢၼ်မႃးပွႆႇၼႆႉ။ ၸၢၵ်ႇမၢၵ်ႇတိူဝ်ႉၺႃး ထဝ်ႈယိင်း မၢတ်ႇၸဵပ်းၸွမ်း 2 ၵေႃႉ၊ ႁိူၼ်းယေး လူႉၵွႆၸွမ်းထႅင်ႈ ဢမ်ႇယွမ်း 3 လင်။ လွင်ႈၵူၼ်းလူႉတၢႆတႄႉ ပႆႇလႆႈ ငိၼ်းၶႃႈ”- ဝႃႈၼႆ။

မိူၼ်ၼႆ ၼင်ႇၵဝ်ႇ မိူဝ်ႈဝၼ်းတီႈ 16 ယၢမ်းၵၢင်ၶမ်ႈ ၼၼ်ႉၵေႃႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇသႂ်ႇ တီႈဝၢၼ်ႈလူင်ၸၢမ် ၸႄႈဝဵင်းၼွင်ၶဵဝ် ၸၢၵ်ႇမၢၵ်ႇတိူဝ်ႉ ၺႃးလုၵ်ႈဢွၼ်ႇလူႉတၢႆ 1 ၵေႃႉ မၢတ်ႇၸဵပ်း 3 ၵေႃႉ။ မိူဝ်ႈဝၼ်းတီႈ 12 ၼၼ်ႉသမ်ႉ မႃးပွႆႇတီႈႁိမ်းၵၢတ်ႇၼွင်ၶဵဝ် တူၵ်းသႂ်ႇ ႁၢၼ်ႉၶၢႆၼမ်ႉၼဵင်ႈၸဵမ်း “လၢၼ်းသၢၼ်း” တိူဝ်ႉၺႃး ၵူၼ်းမိူင်းလူႉတၢႆ 11 ၵေႃႉ ၼႆယဝ်ႉ။

မိူဝ်ႈဝၼ်းတီႈ 11 သမ်ႉ ၶိူင်ႈမိၼ် သိုၵ်းမၢၼ်ႈ ၼႆႉၵူၺ်း မႃးပွႆႇတီႈဝဵင်းမိူင်းၵုတ်ႈ တိူဝ်ႉၺႃးၵူၼ်းမိူင်း လူႉ တၢႆ 9 ၵေႃႉ ၼႆယဝ်ႉ။