ပၢင်ပွႆးႁူင်းၾႆးမိၼ် လိူၼ်သိပ်းသွင်ဝဵင်းတူၼ်ႈတီး ၶမ်ႈဝၼ်းတီႈ 13/11/2024 ၼၼ်ႉ ပလိၵ်ႈတီႉ ၵူၼ်းၸၢႆး 4 ၵေႃႉ လႄႈ ငိုၼ်းမၢင်မိုၼ်ႇ ဢၼ်ပွမ် တင်းၼမ်တင်းလၢႆ။
ၵူၼ်းၸၢႆး 4 ၵေႃႉ ဢၼ်ယိပ်းငိုၼ်းပွမ်ၼႆႉ ပဵၼ်ၵူၼ်းတၢင်းဝဵင်းသူၺ်ႇၺွင်ႇ၊ ပလိၵ်ႈတီႉလႆႈၶဝ် ၽွင်းၶဝ်တိုၵ်ႉၶဝ်ႈၵိၼ်တၢင်းၵိၼ် တီႈဝဵင်းမႂ်ႇဢေးတႃႇယႃႇ၊ ၽွင်းၼၼ်ႉ ၼႂ်းမိုဝ်းၶဝ်မီးမၢင်မိုၼ်ႇပွမ် 50 မၢင် ဝႃႈၼႆ။
ၼၢင်းယိင်း ၵူၼ်းမိူင်းဝဵင်းတူၼ်ႈတီးၵေႃႉၼိုင်ႈလၢတ်ႈဝႃႈ – ၽွင်းပွႆးႁူင်းၾႆးမိၼ်ၼႆႉ ၵူၼ်းၶၢႆၶူဝ်းဢွၼ် ၵၼ်လၢတ်ႈဝႃႈ လႆႈမၢင်မိုၼ်ႇပွမ် ၼႆၼမ်လႄႈ ၶၢဝ်ႇမၼ်းလၢမ်းၽႄႈမွၵ်ႈ 2 ဝၼ်း ၸင်ႇမီးၶၢဝ်ႇပလိၵ်ႈ တီႉလႆႈ ၵူၼ်းၸၢႆး 4 ၵေႃႉ ဢၼ်ယိပ်းမၢင်မိုၼ်ႇပွမ် – ဝႃႈၼႆ။
ၶဝ် 4 ၵေႃႉၼႆႉ တႃႇ 3 ၵေႃႉပဵၼ် မျၢတ်ႉတူႇ၊ ဢွင်ႇသီႇႁ၊ ထုၼ်းရႃႇၸႃႇ ယူႇဝဵင်းသူၺ်ႇၺွင်ႇလႄႈ ထႅင်ႈၵေႃႉ ၼိုင်ႈပဵၼ် တိၼ်ႉၸေႃႇဢူး ယူႇဝဵင်းပျေႃႇပွႆႇ မိူင်းမၢၼ်ႈတူင်ႈပဵင်း- ယၢမ်းလဵဝ်တႄႉ ၵူတ်ႇထတ်း ထဵတ်ႈထၢမ်သေတီႉၺွပ်းၶဝ်ဝႆႉတီႈႁူင်းပလိၵ်ႈ ဢေးတႃႇယႃႇ ဝႆႉ- ပလိၵ်ႈမၢၼ်ႈလၢတ်ႈၼင်ႇၼႆ။
ပၢင်ပွႆးႁူင်းၾႆးမိၼ်ဝဵင်းတူၼ်ႈတီးၼႆႉတႄႇမႃးၸဵမ်မိူဝ်ႈဝၼ်းတီႈ 11 ၊ တေၸတ်းတေႃႇထိုင်ဝၼ်းတီႈ 17 ၼူဝ်ႊဝႅမ်ႊပိူဝ်ႊၼႆႉ။ ဢိင်ၼိူဝ်လွင်ႈၼႆႉသေ ၼႂ်းပွႆးၵမ်းၼႆႉ ၸိူဝ်းၶဝ်ၸၢႆႇငိုၼ်းပွမ်ၵႂႃႇၵႃႈႁိုဝ်ယဝ်ႉ။ ၸၢႆႇသင်တီႈၽႂ်လၢႆလၢႆၼႆၼၼ်ႉ ၵူၼ်းၶၢႆၶူဝ်းၼႂ်းဝဵင်းတူၼ်ႈတီး ဢွၼ်ၵၼ်မႆႈၸႂ်ယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ