ၶႄႇသင်ႇဢိုတ်းႁၢမ်ႈၵဵတ့်လႅၼ်လိၼ် ၶႄႇ- မၢၼ်ႈ လႄႈ ၶူဝ်းၵုၼ်ႇမိူင်းၶႄႇ ဢၼ်တေၶဝ်ႈမႃး  မိူင်းတႆးပွတ်းႁွင်ႇၼၼ့်  ၵိုတ်းၶၢတ်ႇဝႆႉ ၊ ယၢမ်းလဵဝ် ၶၼ်ၵုၼ်ႇ ၼႂ်းၸိုင်ႈတႆးပွတ်းႁွင်ႇ  ၶိုၼ်ႈသုင်ႁႅင်း   ။

တီႈၵဵတ့်လၢၼ်ႇဢၼ်ၸုမ်းသိုၵ်းဢူၺ်းလီသၢမ်ၸုမ်းၵုမ်းၵမ်ဝႆ့ၼၼ့် ၶႄႇသင်ႇႁၢမ်ႈဢဝ် ၶူဝ်းၵုၼ်ႇၶဝ်ႈဢွၵ်ႇၵႃႉၶၢႆတေႃႇၵၼ် ၊ ဢၼ်ပၼ်ဢဝ်ၵုၼ်ႇၶဝ်ႈဢွၵ်ႇၼႆႉ မီး 3 ဢၼ်ၼႂ်းၸႄႈဝဵင်းမူႇၸေႊၵူၺ်း ၊ ၶူဝ်းၸႂ်ႉသွႆၵေႃႈၵႃႈယႂ်ႇ ၶူဝ်းၵိၼ်ယမ်ႉၵူႈဝၼ်းၵေႃႈၵႃႈယႂ်ႇ  ။

ၼၢင်းယိင်း ဢႃယု 30 ပီ  ၵူၼ်းမိူင်းဝဵင်းလႃႈသဵဝ်ႈလၢတ်ႈၽူႈတွႆႇႁွၵ်ႈဝႃႈ-“ ယၢမ်းလဵဝ် မၢၵ်ႇၶိူဝ်သူမ်ႈ ၼိုင်ႈၸွႆႉ  8000 ၊ 9000  ပျႃး။ 1ၸွႆႉ မီးမွၵ်ႈ 30 လုၵ်ႈၵူၺ်း ၊ ၶႆႇၵႆႇၵေႃႈ ၼိုင်ႈလုၵ်ႈ ၶၢႆ  500 ၊ 600 ပျႃး ယဝ့် ။ၶၼ်ၵုၼ်ႇ ၶိုၼ်ႈၵူႈမဵဝ်း ” ဝႃႈၼႆ ။

မိူၼ်ၼင်ၼႆ တီႈဝဵင်းသႅၼ်ဝီၵေႃႈ ၶၼ်ၵုၼ်ႇၶိုၼ်ႈႁႅင်းလႄႈ ၵူၼ်းပိုၼ့်တီႈ ယၢပ်ႇၸႂ်တႃႇႁႃၵိၼ်လဵင့်တွင့်၊ ငဝ်းလၢႆးၵၢၼ်သိုၵ်း ဢမ်ႇပႆႇၼိမ်၊ ပႆႇၸၢင်ႈၵႂႃႇႁဵတ်းၵၢၼ်သင်   ဝႃႈၼႆ ။  

သိုၵ်းတဢၢင်း TNLA ၵဵပ်းၶွၼ်ႇတီႈဝၢၼ်ႈ ဢီႇၼၢႆး ဝဵင်းလႃႈသဵဝ်ႈ၊ သိုၵ်းၵဝ်ႈၵၢင့် MNDAA သမ့်  ၵဵပ်းၶွၼ်ႇတီႈၶူဝ်ၼမ့်ပွင်ႈ ဝဵင်းလႃႈသဵဝ်ႈဝႆ့ၼႆ ၵူၼ်းပိုၼ့်တီႈလၢတ်ႈၼင်ၼႆ ။

ၼၢင်းယိင်းၵူၼ်း ဝဵင်းလႃႈသဵဝ်ႈလၢတ်ႈၽူႈတွႆႇႁွၵ်ႈဝႃႈ -“တီႈဝၢၼ်ႈဢီႇၼၢႆးၼႆ့ၵဵပ်း ၶွၼ်ႇၵႃးၼိုင်ႈလမ်း 1 မိုၼ်ႇပျႃး ။  3 ဝၼ်းၼိုင်ႈပွၵ်ႈ ။ တီႈၶူဝ်ၼမ့်ပွင်ႈတႄ့ ၵဝ်ႈၵၢင့်ၶဝ် ဢမ်ႇဝႃႈ ပဵၼ်ၶွၼ်ႇသင်တႄ့တႄ့ ၊ ပၼ်ဝႂ်သေ ယွၼ်း 1 မိုၼ်ႇ ။ တီႈၸွမ်းတၢင်းတႄ့ သိုၵ်းမၢၼ်ႈ လႄႈ  သိုၵ်း SSPP ၵဵပ်း ” – ဝႃႈၼႆ ။

ယွၼ့်လႆႈပၼ် ၶွၼ်ႇၼမ်လၢႆ ၵႃႈၼမ်ႉမၼ်းရူတ်ႉၵႃး ၵႃႈယႂ်ႇလႄႈ ၸင်ႇလႆႈတၢင်ႇၶၼ်ၵုၼ်ႇၶၢႆသုင် ၼႆၵူၼ်းၵႃႉလၢတ်ႈၼင်ႇၼႆ။

“ယွၼ့်ပဵၼ်သိုၵ်းသိူဝ်လႄႈ ပေႃးႁႃၵိၼ်လဵင့်တွင့်ယၢပ်ႇၸႂ်ယူႇယဝ့် ၊ ယၢမ်းလဵဝ်သမ့် ၸုမ်းယဝ့်ၸုမ်းမႃးၵဵပ်းၶွၼ်ႇလႄႈ ၵူၼ်းပိုၼ့်တီႈၶႅၼ်းလႆႈယၢပ်ႇၸႂ်ႁႅင်း ။ ၵူၼ်းၽုၵ်ႇသွမ်ႈႁႃၵိၼ်ၵေႃႈၵၢၼ်တေႃ့သူင် မၢၵ်ႇၶဝ်ႈတဝ်ႈၼမ့်ၶၢႆ ယၢပ်ႇၸႂ် လႄႈ ၶၼ်ၵုၼ်ႇၸင်ႇၶိုၼ်ႈၵူႈဢၼ် ”- ဝႃႈၼႆ ။

ၵဵတ်ႉလၢၼ်ႇလႅၼ်လိၼ်ၶႄႇ-မၢၼ်ႈ ဢၼ်သိုၵ်းၸၢဝ်းၶိူဝ်းၵုမ်းၵမ်ဝႆႉၼႆႉ ၶႄႇသင်ႇႁၢမ်ႈ ဢဝ်ၶူဝ်းၵုၼ်ႇၶဝ်ႈဢွၵ်ႇ တင်ႈတႄႇလိူၼ်ၵျူႊလၢႆႊမႃႊ။   

ဝၢႆးသေ မိူင်းၶႄႇ ၸီႉသင်ႇ ႁႄႉႁၢမ်ႈတေႃႉၵုၼ်ႇၶၢမ်ႈလႅၼ်လိၼ်ယဝ်ႉ ၵူၼ်းမိူင်း ၸိူဝ်းယူႇဝႆႉ ၼႂ်းဢွင်ႈတီႈသိုၵ်းၸၢဝ်း ၶိူဝ်းၵုမ်းၵမ် မိူၼ်ၼင်ႇ ဢွင်ႈတီႈသိုၵ်းဝႃႉ၊ သိုၵ်းၵဝ်ႈၵၢင်ႉလႄႈ သိုၵ်းတဢၢင်း ၵုမ်းၵမ် ဝႆႉၸိူဝ်းၼၼ်ႉ ၵူၼ်းမိူင်းလႆႈ ႁိမ်ၵၼ်သိုဝ်ႉ ၼမ်ႉမၼ်းၸၢၵ်ႈ တႃႇၸႂ်ႉလွင်ႈၵႂႃႇမႃး ၼႆယဝ်ႉ။

ယၢမ်းလဵဝ် ၸွမ်းလႅၼ်လိၼ် မၢၼ်ႈ – ၶႄႇၼႆႉ ၵဵတ်ႉ/ လၢၼ်ႇ ဢၼ်တေႃႉသူင်ႇၵႃႉၶၢႆၶူဝ်းၵုၼ်ႇယႂ်ႇ ၶႄႇသင်ႇပိၵ်ႉဝႆႉ မီး 8 ၵဵတ်ႉ၊ လိူဝ်သေၼၼ်ႉ ၵူတ်ႇထတ်းၶဵင်ႈၶႅင်သေ ၸင်ႇပၼ်တေႃႉၶဝ်ႈ – ဢွၵ်ႇၼႆ ႁွင်ႈၵၢၼ် ၾၢႆႇတေႃႉသူင်ႇၵႃႉၶၢႆ ၸႄႈမိူင်းယုၼ်ႊၼၼ်ႊ မိူင်းၶႄႇ ပိုၼ်ၽၢဝ်ႇဝႆႉၼင်ႇၼႆ။

တႅမ်ႈ -ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ် )