တပ်ႉၸုမ်းၵႅတ်ႇၶႄၸိူဝ်ႉၸၢတ်ႈ ယၢင်းလႅင် KNDF ပိုၼ်ၽၢဝ်ႇဢွၵ်ႇမႃး ၼႂ်းဝၼ်းတီႈ 11/11/2024 ၼႆႉဝႃႈ သိုၵ်းမၢၼ်ႈ ယိုတ်းမိူင်း တီႉၺွပ်းၵႂႃႇ ၵူၼ်းမိူင်း မွၵ်ႈ 200 ၵေႃႉ ၼႂ်းၸႄႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း ဝႃႈၼႆ။

ယွၼ်ႉသင်လႄႈ သိုၵ်းမၢၼ်ႈ တီႉၺွပ်းၵႂႃႇဢၼ်ဝႃႈၼၼ်ႉတႄႉ ပႆႇမီးၽႂ်ယိုၼ်ယၼ်။ ဝၼ်းၼၼ်ႉ သိုၵ်းမၢၼ်ႈ တီႉၺွပ်းၵႂႃႇၵူၼ်းမိူင်း ၸိူဝ်းပၢတ်ႇၶဝ်ႈယဝ်ႉသေ ပွၵ်ႈမႃးၶိုၼ်းဝၢၼ်ႈ ၼႂ်းဢိူင်ႇၵုင်းၸူင် ၸႄႈဝဵင်းၾၢႆၶုၼ်၊ ဢၼ်တီႉၺွပ်း ၵူၼ်းမိူင်းၵႂႃႇၼႆႉ ပဵၼ်သၢႆသိုၵ်းမၢၼ်ႈ ဢၼ်ထူဝ်းသိုၵ်းၶဝ်ႈမႃး ၼႂ်းၸႄႈဝဵင်းၾၢႆၶုၼ်။

ယၢမ်းလဵဝ် ၺႃးတီႉၺွပ်းဝႆႉတီႈ ႁူင်းလဵၼ်ႈႁႅင်း ၸႄႈဝဵင်းပၢင်လွင်းၼႆ တႃႇဢေႇၸူဝ်း ၽူႈပွင်ႇၶၢဝ်ႇ တပ်ႉသိုၵ်းယၢင်းလႅင် KNDF တွပ်ႇဝႆႉတီႈသိုဝ်ႇၶၢဝ်ႇၼင်ႇၼႆ။

သၢႆသိုၵ်းမၢၼ်ႈ ဢၼ်ထူဝ်းသိုၵ်း ၶဝ်ႈမႃးၼႂ်းၸႄႈဝဵင်းၾၢႆၶုၼ်ၼႆႉ ၶဝ်ႈသွၵ်ႈတဝ် ၼႂ်းႁိူၼ်းယေး ၵူၼ်းမိူင်း တီႈဝၢၼ်ႈ ဢိူင်ႇ မိူၼ်ၼင်ႇ ဝၢၼ်ႈၼမ်ႉၽႃမူ၊ ပၢင်ၸူင်၊ လွႆၵဵင်ႈ၊ ဝၢၼ်ႈမႂ်ႇ ဢိၵ်ႇပႃးထႅင်ႈ လၢႆလၢႆဝၢၼ်ႈ ဢၼ်မီးၼႂ်းၵႄႈဝဵင်းပၢင်လွင်းတင်း ဝဵင်ၾၢႆၶုၼ်။

လိူဝ်ၼၼ်ႉ ၽဝ်ႁိူၼ်းယေးၵူၼ်းမိူင်း၊ ဢွင်ႈတီႈ ဢမ်ႇပဵၼ်ပၢင်တိုၵ်းၵေႃႈ သိုၵ်းမၢၼ်ႈ ၵႆႉလၢမ်းယိုဝ်း ၶိူင်ႈၵွင်ႈယႂ်ႇ ႁဵတ်းႁႂ်ႈၵူၼ်းမိူင်း မၢတ်ႇၸဵပ်းလူႉတၢႆ။

ၼႂ်းႁူဝ်လိူၼ်ၼႆႉၵူၺ်း ယွၼ်ႉသိုၵ်းမၢၼ်ႈ လၢမ်းယိုဝ်းၵွင်ႈလူင်၊ ၸႂ်ႉၶိူင်ႈတရူၼ်းပွႆႇမၢၵ်ႇသေ ၵူၼ်း မိူင်းၺႃးၸၢၵ်ႇမၢၵ်ႇ လူႉတၢႆ 6 ၵေႃႉ ပႃးလုၵ်ႈဢွၼ်ႇ ၵေႃႉၼိုင်ႈ။ လိူဝ်ၼၼ်ႉ မၢတ်ႇၸဵပ်းထႅင်ႈဢမ်ႇယွမ်း 5 ၵေႃႉ။ ယွၼ်ႉပၢင်တိုၵ်း တီႈ ၸႄႈဝဵင်းပၢင်လွင်း၊ ၾၢႆၶုၼ်ၼႆႉသေ ၵူၼ်းမိူင်းၼပ်ႉႁူဝ်မိုၼ်ႇ လႆႈငိူင်ႉပၢႆႈၽေးသိုၵ်းဝႆႉၼႆ ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉၼင်ႇၼႆ။

ဢၢင်ႈဢိင် – Kantarawaddy Times