ပူၼ်ႉမႃး ဝၼ်းတီႈ 14/11/2024 ၼႆႉ ၸွမ်ၽွင်းလူင်ၵဝ်ႇ ထၵ်ႊသိၼ်ႊ သျိၼ်ႊၼဝတ်း (ၵေႃႉပဵၼ်ပေႃႈ ၸွမ်ၽွင်းလူင် ၼၢင်းသၢဝ်ၽႄႊထွင်ႊထၢၼ်ႊ သျိၼ်ႊၼဝတ်း (ယၢမ်းလဵဝ်)) လူင်းႁႃသဵင် ၼႂ်းပိုၼ်ႉတီႈ ၸႄႈတွၼ်ႈဢူႇၻွၼ်ႊထႃႊ ၼီႊ မိူင်းထႆး တႃႇၶေႉၶဵင်ႇလႆႈတီႈၼင်ႈ ၽူႈၵွၼ်းၸႄႈတွၼ်ႈ ဢူႇၻွၼ်ႊထႃႊၼီႊ။

သိုဝ်ႇၶၢဝ်ႇထႆး ၶၢဝ်ႇသူတ်ႇ တႅမ်ႈတၢင်ႇဝႆႉဝႃႈ – ၸွမ်ၽွင်းလူင်ၵဝ်ႇ ထၵ်ႊသိၼ်ႊ ဢိၵ်ႇပႃးတင်း ၼွင်ႉယိင်း မၼ်းလႄႈ ၽွင်းလူင် – ၸုမ်းလူင်ပွင်ၸိုင်ႈ “ၽိူဝ်ႉထႆး ”ယၢမ်းလဵဝ် လၢႆလၢႆၵေႃႉ လူင်းပိုၼ်ႉတီႈ ၼႂ်းဝဵင်းပၢၼ်ႉတုင်း ၸႄႈတွၼ်ႈဢူႇ ၻွၼ်ႊထႃႊၼီႊ။ ၶဝ်ႈၼႂ်းၵၢတ်ႇ ၵိၼ်ၶဝ်ႈၼႂ် ၼႂ်းႁၢၼ်ႉတၢင်းၵိၼ် ၸိုဝ်ႈလိုဝ်းလင် တီႈၼိုင်ႈသေ ယုၵ်ႉမိုဝ်း တၵ်ႉ ၵူၼ်းမိူင်းၼႂ်းပိုၼ်ႉတီႈလႄႈ ၵူၼ်းမႃးၵိၼ်တၢင်းၵိၼ်ၼႂ်းႁၢၼ်ႉ – ဝႃႈၼႆ။

ထၵ်ႊသိၼ်ႊ ၸီႉၼႄသိူဝ်ႈမၼ်းၸၢႆး ဢၼ်ၼုင်ႈသႂ်ႇဝႆႉၼၼ်ႉသေ လၢတ်ႈၼႄၼၵ်းၶၢဝ်ႇလႄႈ ၵူၼ်းၼႂ်းႁၢၼ်ႉဝႃႈ – သိူဝ်ႈၽိုၼ်ၼႆႉ ပဵၼ်သိူဝ်ႈဢၼ်ယၢမ်ႈသႂ်ႇ ၽွင်းမၼ်းၸၢႆး ပဵၼ်ၸွမ်ၽွင်းလူင် မိူင်းထႆး – မၼ်းၸၢႆး ယၢမ်ႈသႂ်ႇပူၼ်ႉမႃး 20 ပီ။ သိူဝ်ႈတိုၵ်ႉလီယူႇလႄႈ တိုၵ်ႉသႂ်ႇလႆႈယူႇ တေႃႇထိုင်ဝၼ်းမိူဝ်ႈၼႆႉ။ သိူဝ်ႈၽိုၼ်ၼႆႉၵႅၼ်ႇၶႅင် ဢမ်ႇမေႃယွၵ်းၵွႆ။ ၵွပ်ႈၼႆ ၸင်ႇဢဝ်သၵ်ႉသေ ၼုင်ႈမႃးႁူပ်ႉထူပ်း ပီႈၼွင်ႉၵူၼ်းမိူင်း ၶိုၼ်း – မၼ်းၸၢႆးလၢတ်ႈၼင်ႇၼႆ။

လိူဝ်ၼၼ်ႉ မၼ်းၸၢႆးလၢတ်ႈထႅင်ႈဝႃႈ – ၶဝ်ႈၼႂ်မၼ်းၸၢႆး ဝၼ်းမိူဝ်ႈၼႆႉ တီႈႁၢၼ်ႉတၢင်းၵိၼ် တီႈၼႆႉတိုၵ်ႉ ၵိၼ်ဝၢၼ်ယူႇတေႃႇထိုင်ဝၼ်းမိူဝ်ႈၼႆႉ။ ဢမ်ႇလႆႈၵိၼ်မႃးႁိုင်ယဝ်ႉ – ဝႃႈၼႆ။ ပီ 2024 ၼႆႉ ၼႂ်းမိူင်းထႆး ဢၼ်မီး 77 ၸႄႈတွၼ်ႈ ၼႆႉ ၸတ်းႁဵတ်းပၢင်လိူၵ်ႈတင်ႈ ၽူႈၵွၼ်းၸႄႈတွၼ်ႈမီး 25 ၸႄႈတွၼ်ႈ။ (မၢင်ၸႄႈတွၼ်ႈ ဢမ်ႇပႆႇထိုင်ၶၢဝ်းယၢမ်းလႅၵ်ႈလၢႆႈၽူႈၵွၼ်း)။ ၸတ်းႁဵတ်းတင်ႈတႄႇ လိူၼ်မၢတ်ႊၶျ်မႃး။

ဢိင်ၼိူဝ် လွင်ႈတူဝ်ႈတၼ်းသေ ၸႄႈတွၼ်ႈၼိုင်ႈလႄႈ ၸႄႈတွၼ်ႈၼိုင်ႈ ဢမ်ႇၸတ်းမိူဝ်ႈၵၼ်။ တေၸတ်း တေႃႇထိုင်လိူၼ်တီႊသႅမ်ႊပိူဝ်ႊ တေမႃးၼႆႉ တင်းမူတ်းတေပဵၼ် 14 ၵမ်း။ တွၼ်ႈတႃႇၸႄႈတွၼ်ႈ ဢူႇၻွၼ်ႊထႃႊၼီႊတႄႉ တေၸတ်းၼႂ်းဝၼ်းတီႈ 24 လိူၼ်ၼူဝ်ႊဝႅမ်ႊပိူဝ်ႊၼႆႉ။