ဝၼ်းတီႈ 14-16/11/2024 ၼႆႉ ပဵၼ်ဝၼ်းၾိင်ႈထုင်းလွႆးၵထူင်း လွင်ႈၵွၵ်းၾႆး ပွႆးလိူၼ်သိပ်းသွင် ၾိင်ႈ ထုင်းယီႉပဵင်ႇ ၵူၼ်းမိူင်းထႆးလႄႈ ၽွင်းၶၢဝ်းလိူၼ်သိပ်းသွင် ၵူႈပီပူၼ်ႉမႃးတႄႉ တႃႇႁႂ်ႈလူတ်းယွၼ်ႇ ဢၼ် တေၸၢင်ႈပဵၼ်ၽေးတေႃႇသၢႆၵၢၼ်မိၼ်ၼႆသေ ၾၢႆႇတၢင်းတႃႈႁိူဝ်းမိၼ် မိူင်းၵဵင်းမႂ်ႇလႄႈ ၾၢႆႇၽွင်းငမ်း ႁူမ်ႈၵၼ် ပိုၼ်ၽၢဝ်ႇႁၢမ်ႈပွႆႇႁူင်းၾႆးမိၼ် တေႃႇထိုင်ၶၢဝ်းယၢမ်းလိုၵ်း။

ပီၼႆႉတႄႉ တင်ႈတႄႇဝၼ်းတီႈ 11/11/2024 မႃး ႁွင်ႈၵၢၼ်ၾၢႆႇၵၢၼ်မိၼ် ပိုၼ်ၽၢဝ်ႇဝႃႈ – ၼႂ်းဝၼ်းတီႈ 15 လႄႈ 16 လိူၼ်ၼူဝ်ႊဝႅမ်ႊပိူဝ်ႊၼႆႉ လႆႈလႅၵ်ႈလၢႆႈလႄႈ ယုၵ်ႉလိူၵ်ႈၵိုတ်းလိုဝ်ႈပႅတ်ႈထဵဝ်ႈမိၼ် 170 ထဵဝ်ႈ။ တႃႇႁႂ်ႈၽူႈဢႅဝ်ႇယဵမ်ႈတွင်ႈတဵဝ်းလႄႈ ၵူၼ်းမိူင်းၵဵင်းမႂ်ႇ တေၸၢင်ႈပွႆႇႁူင်းၾႆးမိၼ် ၸွမ်းၾိင်ႈထုင်းယီႉပဵင်ႇ လႆႈလွတ်ႈလွတ်ႈလႅဝ်းလႅဝ်း ဝႃႈ ၼႆ။

ၼႂ်းၵႃႈထဵဝ်ႈမိၼ်170 ထဵဝ်ႈၼႆႉ ဢၼ်လႆႈယုၵ်ႈလိူၵ်ႈၵိုတ်းလိုဝ်ႈ လွင်ႈၶိုၼ်ႈလူင်းပႅတ်ႈ မီး 74 ထဵဝ်ႈ။ ပဵၼ်ထဵဝ်ႈမိၼ် သၢႆၵၢၼ်မိၼ်ၼႂ်းမိူင်း 36 ထဵဝ်ႈလႄႈ ထဵဝ်ႈမိၼ်ၼွၵ်ႈမိူင်း 38 ထဵဝ်ႈ။ 

ဢၼ်လႅၵ်ႈလၢႆႈ ၶၢဝ်းယၢမ်းၶိုၼ်ႈလူင်း – လင်ၵၢင်ၶမ်ႈ 7 မူင်း သမ်ႉမီး 96 ထဵဝ်ႈ။ ပဵၼ်ထဵဝ်ႈမိၼ်ၼႂ်းမိူင်း 68 ထဵဝ်ႈလႄႈ ထဵဝ်ႈမိၼ်ၼွၵ်ႈမိူင်း 28 ထဵဝ်ႈ။   

လိူဝ်ၼၼ်ႉ တွၼ်ႈတႃႇ ၵူၼ်းဢွၵ်ႇတၢင်း ဢမ်ႇၵႂႃႇဢမ်ႇပဵၼ်ၼၼ်ႉသမ်ႉ လႆႈၶႂၢၵ်ႈ/ တႅၼ်း ထဵဝ်ႈမိၼ်ဝႆႉပၼ် 16 ထဵဝ်ႈ။ ပဵၼ်ထဵဝ်ႈမိၼ်ၼႂ်းမိူင်း 8 ထဵဝ်ႈလႄႈ ထဵဝ်ႈမိၼ်ၼွၵ်ႈမိူင်း 8 ထဵဝ်ႈ။

ၵဵဝ်ႈၵပ်းလွင်ႈၼႆႉသေ ဢၼ်ႁၢမ်ႈၵူၼ်းမိူင်းပွႆႇႁူင်းၾႆးမိၼ်တႄႉ ႁႂ်ႈယၢၼ်ၵႆၵၼ် တၢင်းၶူင်ႇႁိူဝ်းမိၼ် – ၾၢႆႇတၢင်းၼႃႈ 18 ၵီႊလူဝ်ႊမီႊတႃႊလႄႈ ၼႃႈတၢင်းလင်ၵေႃႈ ႁၢင်ႇယၢၼ် 18 ၵီႊလူဝ်ႊမီႊတႃႊ။

လိူဝ်ၼၼ်ႉ ၾၢႆႇတၢင်းၶိူင်ႈမိၼ်လူင်းလႄႈ ၶိုၼ်ႈၼၼ်ႉၵေႃႈ ႁႂ်ႈႁၢင်ႇယၢၼ် 4 ၵီႊလူဝ်ႊမီႊတႃႊၼင်ႇၵၼ် – ၶေႃႈႁၢမ်ႈၸိူဝ်းၼႆႉတႄႉ ဢမ်ႇလႅၵ်ႈလၢႆႈ ဝႃႈၼႆ။

တႃႇႁႂ်ႈမီး လွင်ႈလွတ်ႈၽေးသၢႆၵၢၼ်မိၼ်ၶိုၼ်ႈလူင်းတႄႉ ၸုမ်းၾၢႆႇလွင်ႈမူတ်းသႂ်ႇလႄႈ ၾၢႆႇႁူမ်ႇလူမ်ႈ တေပၼ်ႇလဵပ်ႈၽဵဝ်ႈၵဵပ်းယုၵ်းယၢၵ်းလႄႈ ၵူတ်ႇထတ်းလွင်ႈၶႅမ်ႉလႅပ်ႈ လုၵ်ႉတီႈၼိုင်ႈဝၼ်း 8 ၵမ်းလႄႈ ၶိုၼ်ႈပဵၼ် 10 ၵမ်း – ပိုၼ် ၽၢဝ်ႇဝႆႉၼင်ႇၼႆ။

ၼႂ်းၶၢဝ်းတၢင်း 3-4 ပီမႃးၼႆႉ ယွၼ်ႉပိူဝ်ႈတၢင်းပဵၼ်ၶူဝ်ႊဝိတ်ႉ-19 ၽႄႈလၢမ်းတူဝ်ႈလုမ်ႈၾႃႉသေ မိူင်းထႆး ၵေႃႈ လႆႈၵိုတ်းလွင်ႈႁဵတ်းပွႆး ဢၼ်ၵူၼ်းၸၢင်ႈၶွၼ်ႈတုမ်ၵၼ်။ ၸင်ႇႁႃလႆႈႁဵတ်းပွႆးယႂ်ႇ လၢမ်းလူင်ၶိုၼ်း ၼႂ်းၶၢဝ်းတၢင်းပီ သွင်ပီ ၼႆႉၵူၺ်း။

ပၢႆးမၢၵ်ႈမီးတႄႉ ပႆႇၸၢင်ႈၽိုၼ်ႉတင်ႈတူဝ်ၶိုၼ်း တေႃႇထိုင်ယၢမ်းလဵဝ်။ ၼႂ်းပီၼႆႉသမ်ႉ ၵူၼ်းမိူင်းၵဵင်းမႂ်ႇ ထူပ်းၽေးၼမ်ႉထူမ်ႈ ႁၢဝ်ႈႁႅင်းသုတ်း ၼႂ်းပိုၼ်းလႄႈ ယိင်ႈၶႅၼ်းႁဵတ်းႁႂ်ႈတုမ်ႉတိူဝ်ႉ ၵၢၼ်ႁႃၵိၼ်လဵင်ႉ တွင်ႈၵူၼ်းမိူင်း။

ဢၢင်ႈဢိင် – Chiang Mai International Airport-CNX