သဵၼ်ႈတၢင်းလူႉ ၶူဝ်ၵွႆ ပႆႇမႄးယဝ်ႉတူဝ်ႈ ၵူၼ်းမိူင်းသၢတ်ႇ တိုၵ်ႉယၢပ်ႇတႃႇ တေႃႉၶူဝ်းၵုၼ်ႇၵႂႃႇမႃး

ၼမ်ႉၼွင်းလုပ်ႇထူမ်ႈႁၢဝ်ႈႁႅင်း ၼႂ်းလိူၼ်သႅပ်ႊထႅမ်ႊပိူဝ်ႊပူၼ်ႉမႃး ႁဵတ်းႁႂ်ႈႁိူၼ်းယေးလႄႈ တိူၵ်ႇႁႆႈ လွၵ်းၼႃးၵူၼ်းမိူင်းသၢတ်ႇ လူႉၵွႆၼမ်။ သဵၼ်ႈတႃႈသၢႆတၢင်းၵေႃႈ ၶၢတ်ႇၵွႆ၊ ၶူဝ်ၶၢမ်ႈၼမ်ႉၵေႃႈၵွႆလႄႈ ရူတ်ႉၵႃးတၢင်ႇၵုၼ်ႇ ဢမ်ႇၸၢင်ႈတေႃႉၶူဝ်းၵႂႃႇမႃး။ ၵၢၼ်တေႃႉသူင်ႇ တၢင်းတႃႈၶီႈလဵၵ်းလႄႈသင် တၢင်းမိူင်းတူၼ်လႄႈသင် ၵိုတ်းၶၢတ်ႇမူတ်း။ တေႃႇထိုင်ယၢမ်းလဵဝ် တိုၵ်ႉမႄးၵုမ်းၵေႃႇပႆႇယဝ်ႉပႆႇတူဝ်ႈ။ 

ၶူဝ်ၼမ်ႉၵူၵ်း ဢၼ်မီးၼႂ်းဝၢၼ်ႈသၢႆးၶၢဝ် ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ ဢၼ်လူႉၵွႆ ယွၼ်ႉၼမ်ႉၼွင်းထူမ်ႈၼၼ်ႉ ၵူၼ်းပိုၼ်ႉတီႈ ၶိုၼ်းမႄးၵုမ်းၵေႃႇဝႆႉႁင်းၵူၺ်း တႃႇၸႂ်ႉတိုဝ်းၸူဝ်ႈၶၢဝ်းသေ ယၢမ်းလဵဝ်ၵေႃႈ ၶိုၼ်းလၼ်ႇတူၵ်းလူႉၵွႆထႅင်ႈ မိူဝ်ႈဝၼ်းတီႈ 17/10/2024 မီးၵူၼ်းမၢတ်ႇၸဵပ်းၸွမ်း ၼိုင်ႈၵေႃႉ။

မိူဝ်ႈလဵဝ်တႄႉ ၾၢႆႇသဵၼ်ႈတႃႈသၢႆတၢင်း တိုၵ်ႉဢွၼ်ၵၼ်ဢဝ်ၶိူင်ႈလဵၵ်းဢၼ်မႂ်ႇမႃး မႄးသၢင်ႈၶိုၼ်း။ ဢၼ်မႄးယဝ်ႉၵႂႃႇ ၵမ်းဢွၼ်တၢင်းၼၼ်ႉၵေႃႈ လဵၵ်းသႄႈမႆႉႁၢဝ်း ၶဝ်ဢဝ်ဢၼ်ၵဝ်ႇ(ဢၼ်ယၢမ်ႈၸႂ်ႉလၢႆတီႈ) မႃးႁဵတ်းၶိုၼ်းၵူၺ်းလႄႈ ၸင်ႇလူမ်ႉငၢႆႈ၊ ႁူးသႄႈမၼ်း ၸိူဝ်းၼႆႉၵေႃႈ ႁေႃၵိၼ်မူတ်းယဝ်ႉလႄႈ ဢမ်ႇၵႅၼ်ႇၶႅင်။

ယၢမ်းလဵဝ် တိုၵ်ႉမႄးတိုၵ်ႉသၢင်ႈသေ ထႅင်ႈၶၢဝ်းတၢင်း 10 ဝၼ်းၼႆႉၵေႃႈ တေၸၢင်ႈလတ်းတႆႇယဝ်ႉ။ ၵူၺ်းၵႃႈ ယွၼ်ႉ ဢမ်ႇၸႂ်ႈ ၶူဝ်ဢၼ်ၵႅၼ်ႇၶႅင်ပဵင်းၶူဝ် ဢၼ်ၵူၼ်ႇပင်းလူႉၵွႆၵႂႃႇၼၼ်ႉလႄႈ ရူတ်ႉၵႃး ဢၼ်တၢင်ႇၶူဝ်းၵုၼ်ႇၼၵ်း ဢမ်ႇ ၸၢင်ႈလတ်းတႆႇၼႆ ၵူၼ်းမိူင်းသၢတ်ႇ ၵေႃႉၼိုင်ႈ လၢတ်ႈၼႄဝႆႉၼင်ႇ ၼႆ –

“ၵႃးလူင်ၼႆႉ ပေႃးပဵၼ်ၵႃးပဝ်ႇတႄႉ တေၶၢမ်ႈလႆႈယူႇ၊ ပေႃးတၢင်ႇၵုၼ်ႇတႄႉ တေဢမ်ႇလႆႈၼင်ႇၵဝ်ႇ၊ ပဵၼ်ၶူဝ်လဵၵ်းသေတႃႉ ၸူဝ်ႈၶၢဝ်းၵူၺ်းၼင်ႇၵဝ်ႇ။ ပေႃးဢမ်ႇႁဵတ်းၶူဝ်ႁႂ်ႈၶိူင်ႇၶမ်ႉမိူၼ် မိူဝ်ႈၶူဝ်ႇၵဝ်ႇ ၼၼ်ႉတႄႉ တေဢမ်ႇၸၢင်ႈဢဝ်ၵႃးတၢင်ႇၵုၼ်ႇလတ်းၶၢမ်ႈ”- ဝႃႈၼႆ။

ၶူဝ်သၢႆးၶၢဝ်ၼႆႉ လူႉၵွႆၵူၼ်ႇပင်းၵႂႃႇ မိူဝ်ႈၼႂ်းၵၢင်လိူၼ်သႅပ်ႊထႅမ်ႊပိူဝ်ႊ ၶၢဝ်းၼမ်ႉၼွင်းထူမ်ႈ ႁၢဝ်ႈႁႅင်းၼၼ်ႉသေ ဝၼ်းတီႈ 27/09/2024 ၼႆႉ ႁွင်ႈၵၢၼ်ၾၢႆႇႁဵတ်းၶူဝ် (တံတားဦးစီးဌာန) ၶိုၼ်းမႃးမႄးသၢင်ႈဝႆႉ။ ၵူၺ်းၵႃႈ ပႆႇတၼ်းယဝ်ႉတူဝ်ႈသေ လၼ်ႇတူၵ်းၵူၼ်ႇပင်းလူႉၵွႆ။ ယၢမ်းလဵဝ်တႄႉ တိုၵ်ႉမႄးသၢင်ႈ ၶိုၼ်း။ တၢင်းယၢဝ်းၶူဝ်ၼႆႉ တေမီးယူႇမွၵ်ႈ 150 ထတ်း။

ပိူင်လူင်မၼ်း ၶူဝ်ၼႆႉ ၵူၼ်းမိူင်းၸႂ်ႉတိုဝ်းတႃႇတေႃႉၶူဝ်းၵုၼ်ႇ။ ၵူၺ်းၵႃႈ ၶူဝ်လဵၵ်း ဢၼ်တိုၵ်ႉသၢင်ႈမႂ်ႇ ယူႇၼႆႉၵေႃႈသမ်ႉ ဢမ်ႇၸႂ်ႈသႅၼ်းဢၼ်ႁပ်ႉၼၵ်းလႆႈလႄႈ သင်ဝႃႈ ယဝ်ႉတူဝ်ႈၵႂႃႇၵေႃႈ ရူတ်ႉၵႃး တၢင်ႇ ၶူဝ်းၼၵ်း တေဢမ်ႇၸၢင်ႈတႆႇလတ်းလႆႈလႄႈ ၵူၼ်းမိူင်း ၵႃႈတေလႆႈႁႃတိုဝ်ႉတၢင်း ဢဝ်ၶူဝ်းၶၢမ်ႈၼမ်ႉ ထႅင်ႈယူႇ ၵူၼ်းမိူင်းသၢတ်ႇ သိုပ်ႇလၢတ်ႈၼႄ ၼင်ႇၼႆ –

“ပေႃးၼမ်ႉဢေႇ ယွမ်းၵႂႃႇယဝ်ႉတႄႉ တေဢဝ်ၵႃးဝူၵ်း မႃးတၵ်းမၢၵ်ႇႁိၼ် ၶပ်ႉသေ ႁႂ်ႈၵႃးလူင်ပေႃး လတ်းၵႂႃႇလႆႈၼႂ်း ၼမ်ႉ။ ပေႃးၸိူင်ႉၼၼ် တေတၢင်ႇၵုၼ်ႇလႆႈယူႇ။ ပေႃးတေဝႃႈ ၸၢင်ႈၵူၼ်းတေႃႉၶၢမ်ႈ ၼမ်ႉၼႆ မၼ်းတေသဵင်ႈတိုၼ်းလၢင်းမၼ်းၼမ်။ ပေႃးၶၢမ်ႈၼမ်ႉၼႆႉ တေလႆႈၶျႃးၵုၼ်ႇသေ ပေႃးတေႃႉၶၢမ်ႈယဝ်ႉ သမ်ႉတေလႆႈတေႃႉတၢင်ႇၶိုၼ်း မၼ်းတေလႆႈသဵင်ႈၼမ်ၼႃႇ။ ယွၼ်ႉၼၼ် တေလႆႈသဵၼ်ႈ တၢင်းၵူၺ်းၶေႃၶေႃ ႁႂ်ႈမၼ်းၵႂႃႇၼႂ်းၼမ်ႉလႆႈ။ ပေႃးၼမ်ႉယွမ်းယဝ်ႉတႄႉ မၼ်းၵေႃႈ ၵႂႃႇလႆႈငၢႆႈယူႇ”- ဝႃႈၼႆ။

ၸဵမ်မိူဝ်ႈၶူဝ်ၵွႆ သဵၼ်ႈတၢင်းၶၢတ်ႇလၢႆၾၢႆႇၼႆႉသေ ၵုၼ်ႇၵႃႉတၢင်းၶၢႆ ၵမ်ႈၼမ်ၵေႃႈ ဢမ်ႇၸၢင်ႈၶဝ်ႈထိုင် ၼႂ်းဝၢၼ်ႈၼႂ်းဝဵင်း ၵူၼ်းမိူင်းသၢတ်ႇ ၵိၼ်းၸႂ်ႁႅင်းဝႆႉ။ ၵမ်ႈၼမ် ၶူဝ်းၵုၼ်ႇ ဢၼ်တေႃႉ မႃးတၢင်းတႃႈၶီႈလဵၵ်း ၸိူဝ်းၼၼ်ႉၵေႃႈ မႃးတိူၵ်ႈတီႈၾင်ႇၼမ်ႉၵူၵ်းၼၼ်ႉသေ ႁႃလၢႆးတၢင်းၽႂ်မၼ်း တႃႇၶၢမ်ႈၼမ်ႉလႆႈ။ ၵမ်ႈၼမ်တႄႉ လႆႈၸၢင်ႈၵူၼ်းတေႃႉတၢင်ႇပူင်ႈၶၢမ်ႈၼမ်ႉပၼ် ။

ပီ 2024 ၼႆႉ ၼႂ်းၸိုင်ႈတႆးပွတ်းဢွၵ်ႇၼႆႉ ဢမ်ႇလႆႈထူပ်းၽေး သိုၵ်းသိူဝ် မိူၼ်ၼင်ႇ ၸိုင်ႈတႆး ပွတ်းၸၢၼ်း – ပွတ်းႁွင်ႇသေတႃႉ ၵူၺ်းလႆႈထူပ်းၽေးၼမ်ႉလုပ်ႇထူမ်ႈႁၢဝ်ႈႁႅင်း။ ထိုင်မိူဝ်ႈလဵဝ် တႃႇတေ ပၼ်ႇၵၢၼ်လႆႈၶိုၼ်းမိူၼ်ၵဝ်ႇပႆႇၸၢင်ႈ။ တေၽုၵ်ႇသွမ်ႈၵေႃႈ ပႆႇငၢႆႈ တေၵႃႉၶၢႆၵေႃႈ သဵၼ်ႈတႃႈသၢႆတၢင်းပႆႇလီ။ ၶၢဝ်းၵိၼ်ၶၢဝ်းလူႇ ပီၼႆႉ ၵူၼ်းမိူင်းဢမ်ႇၸၢင်ႈၸူမ်းၵိၼ်ၸူမ်းလူႇတႄႉတႄႉ ယွၼ်ႉႁႃငိုၼ်းယၢပ်ႇ။