ၸုမ်းသုၼ်ႇလႆႈသုၼ်ႇပဵၼ်ၵူၼ်း ၸၢတ်ႈၸိုင်ႈလုမ်ႈၾႃႉ လၢတ်ႈၵႂႃႇၼႂ်းဝၼ်းတီႈ 08/11/2024 ပူၼ်ႉမႃးၼႆႉဝႃႈ ယွၼ်ႉပၢင်တိုၵ်း တီႈထုင်ႉၵႃႊသႃႊ(Gaza) သေ ၼၢင်းယိင်းလႄႈ လုၵ်ႈဢွၼ်ႇ လူႉတၢႆႁိမ်းၸမ် 70% ဝႃႈၼႆ။

လွင်ႈၼၢင်းယိင်းလႄႈ လုၵ်ႈဢွၼ်ႇ လႆႈလူႉတၢႆၼႆႉ ၸၢတ်ႈၸိုင်ႈလုမ်ႈၾႃႉ လႆႈလဵပ်ႈႁဵၼ်းမႃးၸွမ်း တင်ႈတႄႇမိူဝ်ႈပၢင်တိုၵ်းပဵၼ်မႃးတီႈ ထုင်ႉၵႃႊသႃႊ လွင်ႈၼႆႉ ပဵၼ်ယွၼ်ႉ သိုၵ်းဢိတ်ႉသ်ရေႊ(Israel) ၶဝ်ႈတိုၵ်းႁႃႊမတ်ႉသ် (Hamas) ဝႃႈ ၼႆ။

ၸုမ်းၾၢႆႇပၢႆးယူႇလီ ပႃႊလႅတ်ႊသတၢႆႊတႄႉ ပိုၼ်ၽၢဝ်ႇဝႆႉဝႃႈ ၼႂ်းၶၢဝ်းတၢင်းပၢင်တိုၵ်း တီႈၵႃႊသႃႊ ပီပၢႆ (ၶၢဝ်းတၢင်း 13 လိူၼ်ပၢႆ) ၼႆႉ ၵူၼ်းမိူင်းလူႉတၢႆ 34,000 ပၢႆ ဝႃႈၼႆ။ လွင်ႈၼႆႉ မီးလွင်ႈပႅၵ်ႇပိူင်ႈ ၵၼ်တင်း ဢၼ်ၸၢတ်ႈၸိုင်ႈလုမ်ႈ ၾႃႉ ပိုၼ်ၽၢဝ်ႇဝႆႉ။

ၼႂ်းၵူၼ်းမိူင်း ၸိူဝ်းၺႃးပဵၼ်ပဝ်ႉမၢႆၵၢၼ်သိုၵ်းၼၼ်ႉ ယူႇတီႈ ၸၢတ်ႈၸိုင်ႈလုမ်ႈၾႃႉ လႆႈၸႅၵ်ႇၽႄဝႆႉ သႅၼ်းပၢၼ်၊ ၸၢႆးယိင်းသေ ပိူင်လူင်ႁၢႆးငၢၼ်းၼႄဝႆႉ လွင်ႈၼၢင်းယိင်းလႄႈ လုၵ်ႈဢွၼ်ႇ ၼႆယဝ်ႉ။

သိုၵ်းဢိတ်ႉသ်ရေႊ လၢတ်ႈဝႃႈ ယွၼ်ႉသိုၵ်းႁႃႊမတ်ႉသ် ဢဝ်ၵူၼ်းမိူင်းႁဵတ်းႁူဝ်ႉၶႄတူဝ်လႄႈ ၵူၼ်းမိူင်းၸင်ႇလႆႈ လူႉတၢႆၼမ်၊ လွင်ႈၼႆႉ ပုၼ်ႈၽွၼ်းမီးတီႈ သိုၵ်းႁႃးမတ်ႉသ် ဝႃႈၼႆ။ ၾၢႆႇသိုၵ်းႁႃႊမတ်ႉသ်ၵေႃႈ တုမ်ႉတွပ်ႇဝႆႉၶိုၼ်းဝႃႈ ဢမ်ႇလႆႈဢဝ်ၵူၼ်းမိူင်း၊ ႁိူၼ်းတိုၵ်းလႄႈ ႁူင်းယႃ ၸိူဝ်းၼႆႉ ႁဵတ်းႁူဝ်ႉတႃႇၶႄတူဝ် – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။