ပွႆးႁူင်းၾႆးမိၼ် လိူၼ်သိပ်းသွင် တီႈဝဵင်းလူင်တူၼ်ႈတီး ပီၼႆႉ သိုၵ်းမၢၼ်ႈ သင်ႇႁႂ်ႈၸုမ်းပျီႇတူႉၸိတ်ႉလႄႈ ၵူၼ်းဝၢၼ်ႈ ဢဝ်ႁူမ်ႇလူမ်ႈၼႅၼ်ႈၼႃ ဝႃႈၼႆသေတႃႉ ဝၼ်းပိုတ်ႇပၢင်ၼၼ်ႉၵူၺ်း ရူတ်ႉၶိူင်ႈႁၢႆ 20 လမ်းပၢႆ ဝႃႈၼႆ။
ဝၼ်းတီႈ 11/11/2024 ၶမ်ႈပိုတ်ႇပၢင်ပွႆးၼၼ်ႉ မီးပလိၵ်ႈမၢၼ်ႈ၊ သိုၵ်းမၢၼ်ႈ ၊ ပလိၵ်ႈၾၢႆႇၵုမ်းရူတ်ႉၵႃး ၵူတ်ႇထတ်း ရူတ်ႉၵႃး ၶဝ်ႈပွႆးႁၢဝ်ႈႁႅင်း၊ ပေႃးဢမ်ႇမီးဝႂ် License ဢမ်ႇပၼ်ၶဝ်ႈၼႆသေတႃႉ ဢမ်ႇႁပ်ႉပုၼ်ႈၽွၼ်း တႃႇတေဢမ်ႇႁၢႆ ၼၼ်ႉပႃး ၼၢင်းယိင်း ၵူၼ်းမိူင်းဝဵင်းတူၼ်ႈတီး လၢတ်ႈၽူႈတွႆႇႁွၵ်ႈၼင်ႇၼႆ။
“ဝၼ်းပိုတ်ႇပၢင်ပွႆးၼၼ်ႉၵူၺ်း ရူတ်ႉၶိူင်ႈႁၢႆ 20 လမ်းပၢႆ။ ဢဝ်ၵႂႃႇဝႆႉတီႈဢၼ်ႁပ်ႉၾၢၵ်ႇရူတ်ႉၶိူင်ႈၼၼ်ႉ ယူႇၵေႃႈယင်းတိုၵ်ႉႁၢႆယူႇ။ ၵူၼ်းၵေႃႈၵိုၼ်း။ ဢႅပ်ႇငိုၼ်းဝႃႇ၊ မိုဝ်းထိုဝ်ဝႃႇ ႁၢႆၼမ်။ ဝၢၼ်ႈမိူင်းလူႉၸိူင်ႉၼႆ ၵူၼ်းၵေႃႇၵၢၼ်ႁၢႆႉၶဝ် ဢဝ်တိုဝ်ႉတၢင်းသေ လၵ်ႉၸၵ်ႉၶုတ်ႈၶူဝ်းၶွင်ပိူၼ်ႈ” – ဝႃႈၼႆ။
တီႈႁပ်ႉၾၢၵ်ႇရူတ်ႉၶိူင်ႈၼၼ်ႉ မၢၵ်ႇႁူဝ်ရူတ်ႉၶိူင်ႈၵေႃႈ ႁၢႆၼမ်။ ၵူၼ်းၸိူဝ်းပႂ်ႉၵဵပ်းငိုၼ်း ၵႃႈၸွတ်ႇရူတ်ႉလႄႈ ၵူၼ်းပႂ်ႉႁူမ်ႇလူမ်ႈ ဢမ်ႇႁပ်ႉပုၼ်ႈၽွၼ်းသင်၊ ၵူၼ်းလၵ်ႉရူတ်ႉၶိူင်ႈၵေႃႈ ဢမ်ႇတီႉၺွပ်းလႆႈ – ၵူၼ်းပိုၼ်ႉတီႈလၢတ်ႈၼင်ႇၼႆ။
ယၢမ်းလဵဝ် တီႈဝဵင်းတူၼ်ႈတီးၼႆႉ ၼွၵ်ႈလိူဝ် ၵူၼ်းပိုၼ်ႉတီႈယဝ်ႉ မီးပီႈၼွင်ႉၵူၼ်းမိူင်းတႆး ပွတ်းႁွင်ႇပၢႆႈၽေးသိုၵ်းသိူဝ် မႃးသွၼ်ႈယူႇသဝ်းဝႆႉ။ ၵူၼ်းမိူင်းမၢၼ်ႈ တူင်ႈပဵင်းၵေႃႈ မႃးၶဝ်ႈပွႆးႁူင်းၾႆးမိၼ် ၵိုၼ်းၶွၼ်ႈ။ ၸဝ်ႈၼႃႈတီႈ ၽူႈမီးပုၼ်ႈ ၽွၼ်း ၵူတ်ႇထတ်း ဝႂ်လၢႆႊသိၼ်ႊ(မၢႆၾၢင်) License ရူတ်ႉ/ၵႃး ႁၢဝ်ႈႁႅင်း။ ၸိူဝ်းဢမ်ႇမီးဝႂ်လၢႆႊသိၼ်ႊ လႆႈပၼ်ငိုၼ်းတူတ်ႈတၢမ်ႇ ၼိုင်ႈလမ်း ဢမ်ႇယွၼ်း 30 သႅၼ်ပျႃး – ဝႃႈၼႆ။
ၸၢႆးၼုမ်ႇ ၽူႈၶဝ်ႈပွႆး ဢၼ်ၺႃးၸူၵ်းၸၼ်လၵ်ႉၾူၼ်း(မိုဝ်းထိုဝ်) ၵႂႃႇၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ– “ မိုဝ်းထိုဝ် iphone 15 ၶႃႈ ႁၢႆၵႂႃႇၼႂ်းဝၢင်းႁူင်းၾႆးမိၼ်ၼၼ်ႉယဝ်ႉ။ ၽွင်းပိူၼ်ႈပွႆႇႁူင်းၾႆးမိၼ်၊ သႂ်ႇဝႆႉ ၼႂ်းထွင်းသိူဝ်ႈၵေႃႈ တၼ်း ႁၢႆၵႂႃႇမိူဝ်ႈလႂ်ဢမ်ႇႁူႉ၊ ပေႃးတူၵ်းတႄႉ တၢၼ်ႇႁူႉတူဝ်ယူႇ။ ၵူၼ်းလၵ်ႉၵေႃႈ လႅတ်းၼႃႇ”- ဝႃႈၼႆ။
ၽွင်းငဝ်းလၢႆးၵၢၼ်မိူင်းယုင်ႈ ပၢင်တိုၵ်းလိူင်ႇ တူဝ်ႈမိူင်းယၢမ်းလဵဝ် သိုၵ်းမၢၼ်ႈ သင်ႇႁႂ်ႈၸတ်းပွႆးႁူင်းၾႆး မိၼ် ဝၼ်းတီႈ 09-15/11/2024။ ၵူၺ်းၵႃႈ ၽွင်းၼၼ်ႉ ၾူၼ်တူၵ်းဢမ်ႇထၢတ်ႇ ၾႃႉဢမ်ႇပၢင်ႇလႄႈ ဢမ်ႇၸၢင်ႈပွႆႇႁူင်းၾႆးမိၼ်။ ၸင်ႇၸီႉသင်ႇလႅၵ်ႈလၢႆႈဝၼ်းပွႆး ႁႂ်ႈႁဵတ်းၼႂ်းဝၼ်းတီႈ 11-17/11/2024 ၼႆယဝ်ႉ။
ပွႆးႁူင်းၾႆးမိၼ် ဝဵင်းတူၼ်ႈတီး ဢၼ်ၸတ်းႁဵတ်းမႃး ၶၢဝ်းလိူၼ်သိပ်းသွင် ၵူႈပီၼႆႉ ၸိုဝ်ႈလိုဝ်းလင် တူဝ်ႈလုမ်ႈၾႃႉမႃး ပၢၼ်သိုပ်ႇပၢၼ် ၸဵမ်ပၢၼ်ၸဝ်ႈၾႃႉမိူင်းတႆးႁိူင်း။ ၽွင်းငဝ်းလၢႆး ဝၢၼ်ႈမိူင်းလီၼၼ်ႉ – ပဵၼ် ပၢင်ပွႆးဢၼ်ႁဵတ်းႁႂ်ႈငိုၼ်းၶဝ်ႈ ၸိုင်ႈမိူင်းၼမ်သုတ်း ဢၼ်ၼိုင်ႈၼႆၵေႃႈ ဝႃႈလႆႈ။ ၵူၺ်းၵႃႈ ၸူဝ်ႈသိုၵ်း မၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး ၼႆႉ ၵူၼ်းမိူင်းဢမ်ႇမီးတၢင်းသိူဝ်း တႃႇၸတ်းႁဵတ်းပွႆးၾိင်ႈထုင်း။ ၵူၺ်းၵႃႈ ၺႃးသိုၵ်းမၢၼ်ႈ တဵၵ်းႁႂ်ႈႁဵတ်းပွႆး။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ