မိူဝ်ႈၼႆႉ ဝၼ်းတီႈ 13/11/2024 ယၢမ်းၵၢင်ၼႂ်မွၵ်ႈ 10 မူင်း မီးၸုမ်းဢမ်ႇႁူႉၾၢႆႇ ၽူႈၸၢႆး 4 ၵေႃႉ သွၼ်ႉရူတ်ႉၶိူင်ႈ မႃး ၸွမ်းသွင်လမ်း ၶဝ်ႈၸူၼ်ၼႂ်းႁၢၼ်ႉၶၢႆၾူၼ်း First Rate ဢၼ်ပိုတ်ႇဝႆႉတီႈပွၵ်ႉပႃႇလႅင် ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး ၵူၼ်းႁဵတ်းၵၢၼ်တီႈႁၢၼ်ႉၶၢႆၾူၼ်းၼၼ်ႉ ၺႃးယိုဝ်းတၢႆ ၵေႃႉၼိုင်ႈ။

ၵူၼ်းဝဵင်းတႃႈၶီႈလဵၵ်း ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မီးၵူၼ်းႁၢႆႉ ၶဝ်ႈၸူၼ် ၼႂ်းႁၢၼ်ႉၶၢႆၾူၼ်း ၼွင်ႉပႂ်ႉၶႃႈႁဝ်းဢေႃႈ။ ၵူၼ်းႁၢႆႉၼၼ်ႉ ၶႃႈႁႅမ်ပႃး ၵူၼ်းႁဵတ်းၵၢၼ် တီႈႁၢၼ်ႉၶၢႆၾူၼ်းၼၼ်ႉ လူႉတၢႆ ၵေႃႉၼိုင်ႈၶႃႈ”- ဝႃႈၼႆ။

ဢိင်ၼိူဝ် လွင်ႈၼႆႉ တီႈသိုဝ်ႇၶၢဝ်ႇ Tachileik News Agency ဢွၵ်ႇဝႆႉတႄႉ မီးၽူႈၸၢႆး 4 ၵေႃႉ ယိပ်းၵွင်ႈၸေးမိုဝ်းသေ ၶဝ်ႈၸူၼ်။ လႆႈၵႂႃႇၾူၼ်းသႅၼ်း iphone 20 လုၵ်ႈပၢႆ ၵူၼ်းႁဵတ်းၵၢၼ် ဢၼ်လႆႈလူႉတၢႆၵႂႃႇၼၼ်ႉ ၸိုဝ်ႈႁွင်ႉ မွင်ႇႁဵင်းမႅတ်ႉတူႇ ဢႃယု 20 ပၢႆ ဝႃႈၼႆ။

ၵူၼ်းတႃႈၶီႈလဵၵ်း ၽူႈယိင်း ဢႃယုမွၵ်ႈ 40 ပီ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “တီႈတႃႈၶီႈလဵၵ်းၼႆႉ ၵူၼ်းမိူင်းၵႆႉ ၺႃးၸူၼ်၊ ၸဵမ်ႁၢၼ်ႉၶၢႆၾူၼ်း၊ ႁၢၼ်ႉၶၢႆၶမ်း၊ ႁၢၼ်ႉၶၢႆၶူဝ်းၵုၼ်ႇ ၸိူဝ်းၼႆႉ။ လွင်ႈၼႆႉ ၵူၼ်းမိူင်းၵႂႃႇတိူင်ႇလၢတ်ႈတီႈပလိၵ်ႈမၢၼ်ႈၵေႃႈ ၶဝ်ဢမ်ႇတီႉၺွပ်းလႆႈ တူဝ်ၵူၼ်းႁၢႆႉမႃးသေပွၵ်ႈ။ ယူႇတီႈ ႁဝ်းၶႃႈႁူႉတႄႉ ၼႂ်းၸုမ်းၵူၼ်းႁၢႆႉ ၵူၼ်း ၸူၼ်ၼၼ်ႉ ပႃးဝႆႉသိုၵ်းမၢၼ်ႈ၊ ပလိၵ်ႈမၢၼ်ႈ ၶဝ်ဝႆႉၼႆၶႃႈဢေႃႈ။ ၵွပ်ႈၼႆလႄႈ ၶဝ်ဢမ်ႇတီႉၺွပ်းလႆႈတူဝ်ၵူၼ်းႁၢႆႉ ၼၼ်ႉ လႆႈသေပွၵ်ႈၼၼ်ႉယဝ်ႉ” – ဝႃႈၼႆ။

ဝဵင်းတႃႈၶီႈလဵၵ်းၼႆႉ ပဵၼ်ဝဵင်းလႅၼ်လိၼ်ၵေႃႈၸႂ်ႈ ယဝ်ႉၵေႃႈ ပဵၼ်ဝဵင်းၵူၼ်းၵိုၼ်းငိုၼ်းၶွၼ်ႈ ၵူၼ်းလုၵ်ႉ တၢင်ႇတီႈသီႇလႅၼ်မႃးယူႇသဝ်း ႁဵတ်းၵၢၼ်ပၢႆးမၢၵ်ႈမီးၵေႃႈၼမ်။ ဝၢႆးသိုၵ်းမၢၼ်ႈ ယိုတ်းမိူင်း မႃးၶၢဝ်းတၢင်း 3 ပီပၢႆၼႆႉ ႁဵတ်းႁႂ်ႈဝၢၼ်ႈမိူင်းဢမ်ႇၼိမ်သဝ်း၊ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ၊ ပၢင်တေႃႇလွင်း ယႃႈမဝ်း ၵမ် လိူင်ၼမ်သေဢမ်ႇၵႃး ယိင်ႈၶႅၼ်း ႁဵတ်းႁႂ်ႈၽူႈလၵ်ႉၸၵ်ႉၶုတ်ႈ လိူင်ႇၼမ်ႁႅင်းထႅင်ႈ ၼႆယဝ်ႉ။