ဢမ်ႇမီးပၢင်တိုၵ်းၵေႃႈ သိုၵ်းမၢၼ်ႈပွႆႇမၢၵ်ႇ တီႈဝဵင်းၾၢႆၶုၼ် ၵူၼ်းမိူင်းမၢတ်ႇၸဵပ်း/ တၢႆ ႁိူၼ်းယေးၵွႆ

ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇတီႈဝၢၼ်ႈၵၢၼ်ႇလႃႉ ၸႄႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း လႅၼ်လိၼ်တႆး – ယၢင်းလႅင် မီးၵူၼ်းမၢတ်ႇၸဵပ်းလူႉတၢႆ။

ဝၼ်းတီႈ 08/11/2024 ယၢမ်းၵၢင်ၶမ်ႈ သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇတီႈဝၢၼ်ႈၵၢၼ်ႇလႃႉ ၵူၼ်းပၢႆႈၽေးသိုၵ်း လူႉတၢႆ 2 ၵေႃႉ ၊ မၢတ်ႇၸဵပ်းႁၢဝ်ႈႁႅင်း 1 ၵေႃႉ ႁိူၼ်းၵူၼ်းပိုၼ်ႉတီႈ လူႉၵွႆ 6 လင် ဝႃႈၼႆ။

ယွၼ်ႉသိုၵ်းမၢၼ်ႈ မႃးပွႆႇမၢၵ်ႇလႄႈ ယၢမ်းလဵဝ် ၵူၼ်းပိုၼ်ႉတီႈမႆႈၸႂ် ၵူဝ်သေ ၵၢင်ၶမ်ႈၵၢင်ၶိုၼ်းၵေႃႈ ဢမ်ႇႁတ်းၼွၼ်း ဝႃႈၼႆ။

ၵူၼ်းၸၢႆး ဢႃယု 30 ပၢႆ လၢတ်ႈၽူႈတွႆႇႁွၵ်ႈဝႃႈ -“တီႈဝၢၼ်ႈပဵၼ်ပၢင်တိုၵ်းၵေႃႈ ဢမ်ႇၸႂ်ႈ၊ သိုၵ်းမၢၼ်ႈ မႃးပွႆႇမၢၵ်ႇ၊ ၵူၼ်းပၢႆႈၽေးသိုၵ်း တၢႆ 2 ၵေႃႉ၊ မၢတ်ႇၸဵပ်းႁၢဝ်ႈႁႅင်း ၵေႃႉၼိုင်ႈ၊ ယၢမ်းလဵဝ် ၵူၼ်းဝၢၼ်ႈၵေႃႈ ဢမ်ႇပဵၼ်လပ်းပဵၼ် ၼွၼ်း ဢွၼ်ၵၼ်ၵူဝ်”- ဝႃႈၼႆ။

ဝၢၼ်ႈၵၢၼ်ႇလႃႉၼႆႉ ပဵၼ်ဝၢၼ်ႈဢၼ် မီးၸမ်ၼႂ်းၸႄႈဝဵင်းယွင်ႁူၺ်ႈ ႁိမ်းဝၢၼ်ႈလွႆလူင် ဢၼ်တိုၵ်ႉပဵၼ် ပၢင်တိုၵ်း ၵၼ်ၼႆႉ ဝႃႈၼႆ။ ၼႂ်းၵႄႈ ၸႄႈဝဵင်းပၢင်လွင်း – ၸႄႈဝဵင်းၾၢႆၶုၼ်ၼႆႉ သိုၵ်းမၢၼ်ႈတင်း ၸုမ်းၵႅတ်ႇၶႄ ၵူၼ်းမိူင်း PDF ယၢင်းလႅင် ၵႆႉပိုတ်းယိုဝ်းၵၼ် တင်ႈတႄႇ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ဝႃႈၼႆ။

ၵူၼ်းၸၢႆးဢႃယု သႅၼ်းပၢၼ်မွၵ်ႈ 40 ပီ ဢၼ်လႆႈပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ -“ၸႂ်ၵေႃႈ ဢမ်ႇလီသေဢိတ်း၊ ဝၢၼ်ႈဢမ်ႇပဵၼ်ပၢင်တိုၵ်းသင်ၵေႃႈ ဢမ်ႇႁူမ်ႇလူမ်ႈ ၵူၼ်းတင်းဝၢၼ်ႈ ႁိမ်းႁွမ်းဢၼ်ပၢႆႈၽေး သိုၵ်းမႃးယူႇဝႆႉတီႈ ဝၢၼ်ႈ ၵၢၼ်ႇလႃႉ မီးတင်းၼမ်၊ ဢၼ်သိုၵ်းမၢၼ်ႈ မႃးပွႆႇမၢၵ်ႇၸိူင်ႉၼႆ ပဵၼ်ဢၼ်ႁူၵ်ႉႁၢႆႉ ဢမ်ႇၸႂ်ႈတင်းႁဵတ်းၵူၼ်းယဝ်ႉ”- ဝႃႈ ၼႆ။

ၵူၼ်းပိုၼ်ႉတီႈ ပၢႆႈၽေးသိုၵ်း မႃးယူႇတီႈ ဢၼ်ဢမ်ႇပဵၼ်ပၢင်တိုၵ်းသေတႃႉ သိုၵ်းမၢၼ်ႈ လၢမ်းလိမ်းပွႆႇ မၢၵ်ႇၸိူင်ႉၼႆ ဢမ်ႇၸၢင်ႈပၢႆႈၵႂႃႇတင်းလႂ်ယဝ်ႉ ၵႃႈလႆႈၾၢင်ႉယူႇၵိၼ်ဝႆႉၵူၺ်းယဝ်ႉၼႆ – ၵူၼ်းပိုၼ်ႉတီႈ သိုပ်ႇလၢတ်ႈထႅင်ႈၼင်ႇၼႆ။

ၼႂ်းလိူၼ်ဢွၵ်ႊထူဝ်ႊပိူဝ်ႊၼႆႉၵေႃႈ သိုၵ်းမၢၼ်ႈ ၽဝ်ႁိူၼ်းၽဝ်ယေးၸိူဝ်းဢၼ်ဢမ်ႇမီးၵူၼ်းယူႇသဝ်း ဢၼ်မီးတီႈပွၵ်ႉၼမ်ႉႁူး ၼႂ်းဝဵင်းၾၢႆၶုၼ်၊ ၾႆးမႆႈႁိူၼ်းယေးၵူၼ်းမိူင်း ၸိူဝ်းမီးႁိမ်းၸမ် ႁူင်းယႃ ၸိူဝ်းၼၼ်ႉ- လူႉသုမ်းၵႂႃႇတင်းၼမ်။

ပၢင်တိုၵ်း ဢၼ်ပဵၼ်ယူႇၸွမ်းၼႂ်းၵႄႈ လႅၼ်လိၼ်တႆး – ယၢင်းလႅင်ၼႆႉ ၶဝ်ႈၸိုဝ်ႈဝႃႈ သိုၵ်းမၢၼ်ႈလႄႈ သိုၵ်းၵႅတ်ႇၶႄ ၵူၼ်းမိူင်းယၢင်းလႅင် ပိုတ်းယိုဝ်းၵၼ် ဝႃႈၼႆသေတႃႉ ဢၼ်ယူႇၾၢႆႇသိုၵ်းမၢၼ်ႈသေ ၶဝ်ႈပၢင်တိုၵ်းတႄႉ ပဵၼ်ၸုမ်းပျီႇတူႉၸိတ်ႉပဢူဝ်း PNO ဢၼ်လုၵ်ႉတၢင်းမိူင်းတႆး ပွတ်းၸၢၼ်းၼႆႉ ထႅမ်ႁႅင်းၵႂႃႇ – ၵူၼ်းပၢင်လွင်း ၵေႃႉၼိုင်ႈ ထတ်းသၢင်ႁၼ်ထိုင်ဝႆႉ ၼင်ႇၼႆ။

ၸွမ်းသၢပ်ႇဝဵင်းပၢင်လွင်း – မိူင်းပၢႆး – ၾၢႆၶုၼ် ၸိူဝ်းၼႆႉ ပၢင်တိုၵ်း တိုၵ်ႉသိုပ်ႇပဵၼ်ၶိူဝ်းယႂ်း ၵူၼ်းမိူင်းၼပ်ႉ ႁူဝ်ႁဵင် လႆႈပၢႆႈၽေးသိုၵ်း။ မၢင်ၸိူဝ်း ဢမ်ႇၸၢင်ႈပၢႆႈၵႂႃႇၵႆလႄႈ ပၢႆႈယူႇၸွမ်းၾင်ႇၼမ်ႉၽီလူးသေ ၽုၵ်ႇၶဝ်ႈ၊ ႁဵတ်းသူၼ် ႁႃၵိၼ်လဵင်ႉတွင်ႉဝႆႉၵေႃႈမီး။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)