သိုၵ်းမၢၼ်ႈ ထႅမ်ႁႅင်းသိုၵ်းၶိုၼ်ႈမိူင်းယႆ ၵူၼ်းပိုၼ်ႉတီႈမႆႈၸႂ် ၵူဝ်ပဵၼ်ပၢင်တိုၵ်း

တႄႇႁူဝ်လိူၼ်ၼူဝ်ႊဝႅမ်ႊပိူဝ်ႊၼႆႉမႃး သိုၵ်းမၢၼ်ႈ ထႅမ်ႁႅင်းသိုၵ်း ၶိုၼ်ႈမိူင်းယႆ ၸိုင်ႈတႆးပွတ်းႁွင်ႇ ၵူၼ်းပိုၼ်ႉတီႈမႆႈၸႂ် ၵူဝ်ပဵၼ်ပၢင်တိုၵ်း ႁိပ်ႈၼႅတ်ႈၵဵပ်းမၢၵ်ႇၶဝ်ႈတဝ်ႈၼမ်ႉ ၼႂ်းႁႆႈၼႂ်းသူၼ် ၵူဝ်ဢမ်ႇတၼ်းလႆႈ ဢဝ်ၶၢႆ။   

ၼႂ်းႁူဝ်လိူၼ်ၼူဝ်ႊဝႅမ်ႊပိူဝ်ႊ ဝူင်ႈထီႉ 1 ၼႆႉ သိုၵ်းမၢၼ်ႈသမ်ႉ ထႅမ်ႁႅင်းၶိုၼ်ႈမႃး တၢင်းမိူင်းယႆထႅင်ႈ။ ယွၼ်ႉၵူဝ်ပဵၼ်ပၢင်တိုၵ်းၵၼ်လႄႈ ၸဝ်ႈႁႆႈၸဝ်ႈၼႃး ၵူၼ်းမိူင်းယႆ တူင်ႉတိုၼ်ႇ ႁိပ်ႈၼႅတ်ႈဢဝ်မၢၵ်ႇၶဝ်ႈတဝ်ႈၼမ်ႉ ၼႂ်းသူၼ်ၼႂ်းႁႆႈ ႁင်းၽႂ်မၼ်း – ၵူဝ်ဢမ်ႇတၼ်းလႆႈဢဝ်ၶၢႆ။

ၼၢင်းယိင်း ဢႃယုမွၵ်ႈ 40 ပီ ၵူၼ်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၶဝ် ထႅမ်ဢဵၼ်ႁႅင်းၶဝ်ႈ မႃးတိၵ်းတိၵ်း မႃးႁၢင်ႈႁႅၼ်း ယူႇတီႈမိူင်းယႆ – တၢင်ႉယၢၼ်း ၸိူဝ်းၼႆႉ ဢဵၼ်ႁႅင်းၶဝ် မီးမွၵ်ႈ 3,000 ၸိူဝ်းၼႆႉ။ ၸဝ်းႁႆႈၸဝ်ႈ ၼႃးၶဝ် ဢွၼ်ၵၼ်ပၼ်ၾၢင်ႉၵၼ်  ႁႂ်ႈပၢတ်ႇၶဝ်ႈဝႆးဝႆး ပေႃးဢဝ်ၶဝ်ႈ ၼမ်ႉတၢင်းၵိၼ်ယဝ်ႉ ယႃႇႁႂ်ႈဢဝ်ဝႆႉ ႁႂ်ႈၶၢႆမူတ်းမူတ်း ၵူဝ်ပဵၼ်ပၢင်တိုၵ်း ပေႃးပဵၼ်ပၢင်တိုၵ်းမႃး ၵူဝ်သုမ်း”- ဝႃႈၼႆ။

ဝၼ်းတီႈ 14/10/2024 ယၢမ်းဝၢႆးဝၼ်း ၼၼ်ႉၵေႃႈ တပ်ႉသိုၵ်းမၢၼ်ႈ ၶလယ 23 ႁူမ်ႈလူၺ်ႈ ၽူႈမီးၸၼ်ႉ ပႃးၵွင်ႈ ၸေးမိုဝ်းသေ ဢိၵ်ႇတင်းလုၵ်ႈလၢင်းမေးၼၢင်း (မုင်ႉႁေႃႁိူၼ်း) ၶဝ် တႃႇရူတ်ႉၵႃး 10 လမ်းပၢႆ ႁူဝ်ၵူၼ်း 400 ပၢႆ လုၵ်ႉတၢင်းဝဵင်းသီႇပေႃႉ ထွႆမႃးတၢင်းဝဵင်းမိူင်းယႆ။

ၸၢႆးၼုမ်ႇ ဢႃယု သႅၼ်းပၢၼ် 30  ပီ ၵူၼ်းမိူင်းယႆၵေႃႈ ယိုၼ်ယၼ်လၢတ်ႈတီႈၽူႈတွႆႇႁွၵ်ႈဝႃႈ သိုၵ်းမၢၼ်ႈၶဝ်ႈမႃးဝဵင်းမိူင်းယႆ ၼမ်တႄႉ ဝႃႈၼႆ။  

“တီႈမိူင်းယႆၼႆႉၵေႃႈ မိူဝ်ႈဢွၼ်တၢင်း ဢမ်ႇပေႃးမီးၼမ် တေႃႈလဵဝ်မီးၼမ်မႃး ငိၼ်းဝႃႈတႄႉ ပႆႇငိၼ်းတူင်ႉၼိုင်သင် ယူႇယူႇမႃးၼိုင်ႈပွၵ်ႈၼိုင်ႈဢိတ်း ၵႃးၶဝ်ႈၵေႃႈၶဝ်ႈ ဢွၵ်ႇၵေႃႈဢွၵ်ႇ မၢင်ပွၵ်ႈၵႂႃႇတၢင်းၸၢၼ်း ၶဝ် လႅၵ်ႈၵူၼ်းၵၼ်ႁႃႉဢမ်ႇႁူႉ မၢင်ပွၵ်ႈဢွၵ်ႇၵႂႃႇၵႃးပဝ်ႇ မၢင်ပွၵ်ႈတၢင်ၵူၼ်းမႃး ၵႆႉမီး ၸိူင်ႉၼႆဢေႃႈ” – ဝႃႈၼႆ။

ၽႅၼ်ယၼ်ႇသိုၵ်း 1027 ၼႆႉ ၼႂ်းမိူင်းတႆး ပွတ်းႁွင်ႇ ဢၼ်ၸုမ်းဢူၺ်းလီ ဢမ်ႇပႆႇယိုတ်းလႆႈၼႆႉ ၵိုတ်းဝဵင်းမူႇၸေႊ – မိူင်းယႆ ၵူၺ်းယဝ်ႉ။ ၵူၼ်းမိူင်းတႄႉဝႃႈ – ၵူဝ်ႁႃၵိၼ်လဵင်ႉတွင်ႉယၢပ်ႇလႄႈ ဢမ်ႇၶႂ်ႈႁႂ်ႈပဵၼ်ပၢင်တိုၵ်း ဝႃႈၼႆ။

ၵူၼ်းၸၢႆး ဢႃယုမွၵ်ႈ 30 ပီ ၸဝ်ႈသူၼ်ဢွႆႈ ဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈမႆႈၸႂ်တႄႉ ဢမ်ႇၶႂ်ႈႁႂ်ႈပဵၼ်ပၢင်တိုၵ်း ၵူၼ်းမိူင်းႁႃၵိၼ်ယၢပ်ႇ ဢမ်ႇၶႂ်ႈႁႂ်ႈပဵၼ်ပၢင်တိုၵ်းပၢင်သိုၵ်းၵၼ် ၶႂ်ႈႁႂ်ႈၵူၼ်းမိူင်း လႆႈပွင်ပၢႆးပၺ်ႇၺႃႇလုၵ်ႈလၢင်းသေ ပေႃးပဵၼ်ပၢင်တိုၵ်းမႃး ႁူင်းႁဵၼ်း ၸိူဝ်းၼႆႉၵေႃႈ လႆႈၵိုတ်းပႅတ်ႈ” – ဝႃႈၼႆ။

ၼႂ်းၸႄႈဝဵင်းမိူင်းယႆၼႆႉ ပဵၼ်ပိုၼ်ႉတီႈ သိုၵ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး တူင်ႉၼိုင် ၵုမ်းၵမ်ၼႆသေတႃႉ ၸူဝ်ႈၽႅၼ်ယၼ်ႇသိုၵ်း 1027 ၼႆႉ ဢိင်ၼိူဝ် သိုၵ်းၵဝ်ႈၵၢင်ႉ MNDAA ယိုတ်းလႆႈ တိူင်းသိုၵ်းယမၶ လႃႈသဵဝ်ႈသေ သိုၵ်းမၢၼ်ႈ လႃႈသဵဝ်ႈလႄႈ လုၵ်ႈလၢင်းၼၢင်းမေး ထွႆထွၼ်လူင်းၵႂႃႇ ယူႇသဝ်းဝႆႉ ၼႂ်းၸႄႈဝဵင်းမိူင်းယႆ။ သိုၵ်းၵဝ်ႈၵၢင်ႉ MNDAA ၵေႃႈ ၵႂႃႇတူင်ႉၼိုင် ယူႇသဝ်းဝႆႉၸွမ်း ႁိမ်းၶွပ်ႇၸႄႈဝဵင်း မိူင်းယႆ – ၼမ်ႉလၼ်ႈ – သီႇပေႃႉ ၸိူဝ်းၼႆႉဝႆႉ။

ၵူၼ်းၸမ်ၸႂ် SSPP/ SSA ၼႂ်းၸႄႈဝဵင်းမိူင်းယႆတႄႉ လၢမ်းၶၢတ်ႈလၢတ်ႈဝႃႈ ဝၢႆးၾူၼ်သဵင်ႈၼႆႉ သဵင်ၵွင်ႈၸၢင်ႈတႅၵ်ႇ ဝႃႈၼႆသေတႃႉ လွင်ႈၼႆႉ ယူႇတီႈၽူႈတွႆႇႁွၵ်ႈသေ ၶတ်းၸႂ်ၵပ်းၸူး ၽူႈၶၢၼ်ပၢၵ်ႇ SSPP ယူႇသေတႃႉ တိတ်းတေႃႇဢမ်ႇလႆႈလႄႈ ဢမ်ႇၸၢင်ႈယိုၼ်ယၼ် လၢတ်ႈၸိူင်ႉႁိုဝ်။

သိုၵ်းၵဝ်ႈၵၢင်ႉၼႆႉ ၵုမ်းလႆႈ တပ်ႉၶလယ 67 တီႈႁိမ်းဝၢၼ်ႈႁူဝ်ယ ၸႄႈဝဵင်းမိူင်းယႆ တင်း ၶလယ 147 တီႈဝၢၼ်ႈၼွင် ၵေႃႈလူင် ၸႄႈဝဵင်းသီႇပေႃႉ လီငၢမ်း မိူဝ်ႈလိူၼ်သႅပ်ႊထႅမ်ႊပိူဝ်ႊ ပူၼ်ႉမႃး။ ယၢမ်းလဵဝ် သိုၵ်းၵဝ်ႈၵၢင်ႉၼႆႉ မႃးႁွတ်ႈၽႅဝ် ႁိမ်းဝဵင်းၼမ်ႉလၼ်ႈ ၸိူဝ်းၼႆႉဝႆႉလႄႈ သိုၵ်းမၢၼ်ႈၵေႃႈ ၵမ်းၵမ်း ယိုဝ်းၵွင်ႈလူင် ၵႂႃႇၵူႈႁူးၵူႈတၢင်း။ ၵူၼ်းမိူင်းဝဵင်းၼမ်ႉလၼ်ႈတႄႉ ဢမ်ႇႁတ်းယူႇလႄႈ လႆႈပၢႆႈၽေးသိုၵ်းဝႆႉ ပႆႇၸၢင်ႈ ပွၵ်ႈၶိုၼ်းႁိူၼ်းယေးၽႂ်မၼ်း။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)