ဝၢႆးၽႅၼ်ယၼ်ႇသိုၵ်း 1027 မႃးၼႆႉ ၶူဝ်းၵုၼ်ႇၶွင်ၵိၼ်ယႅမ်ႉ ၼမ်ႉမၼ်းၸိူဝ်ႉၾႆး ၸိူဝ်းၼႆႉ ပုင်ႈၶိုၼ်ႈပဵၼ်လၢႆပုၼ်ႈ ႁဵတ်းႁႂ်ႈတုမ်ႉတိူဝ်ႉ ၵူၼ်းမိူင်းလႃႈသဵဝ်ႈ ထူပ်းတၢင်းယၢပ်ႇၽိုတ်ႇႁႅင်း။
ဝၢႆးသိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈ တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တင်ႈတႄႇ ဝၼ်းတီႈ 03/10/2024 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ၶၢဝ်းတၢင်းလိူၼ်ပၢႆၼႆႉ ႁဵတ်းႁႂ်ႈၶၼ်ၶူဝ်းၵုၼ်ႇ ၶွင်ၵိၼ်ယႅမ်ႉ ၼမ်ႉမၼ်းၸိူဝ်ႉ ၾႆး ၸိူဝ်းၼႆႉ ပုင်ႈၶိုၼ်ႈႁႅင်း ယွၼ်ႉၵၢၼ်တေႃႉသူင်ႇ ရူတ်ႉၵႃး ၵႂႃႇမႃးယၢပ်ႇၽိုတ်ႇ။
ၵူၼ်းလႃႈသဵဝ်ႈ ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸူဝ်ႈၶဝ် ၵုမ်းဝဵင်းလႃႈသဵဝ်ႈမႃးၼႆႉ ၶၼ်ၶူဝ်းၵုၼ်ႇၼႆႉ ၶိုၼ်ႈၵူႈမဵဝ်း မိူၼ်ၼင်ႇ – မၢၵ်ႇၶိူဝ်သူမ်ႈ 1 ၸွႆႉ 8,000 ပျႃး ၵူႈပွၵ်ႈ 3,000 ပျႃး။ ၽၵ်းမီႇလႅင် 1 ၸွႆႉ 7,000 ပျႃး ၵူႈပွၵ်ႈ 4,000 ပျႃး။ ၽၵ်းမီႇၽိူၵ်ႇ 1 ၸွႆႉ 12,000 ပျႃး ၵူႈပွၵ်ႈ 9,000 ပျႃး။ ပေႃးသွၼ်ႇတူၺ်းၶၼ်မၼ်းၸိုင် ပုင်ႈ ၶိုၼ်ႈပဵၼ် ၼိုင်ႈပုၼ်ႈၼၼ်ႉၶႃႈယဝ်ႉ ၵွပ်ႈၼႆလႄႈ ႁဵတ်းႁႂ်ႈၵူၼ်း မိူင်းတုၵ်ႉၶႁႅင်းၶႃႈယဝ်ႉ”- ဝႃႈၼႆ။
လိူဝ်ၼၼ်ႉ မိူၼ်ၼင်ႇ ၼမ်ႉမၼ်းၸိူဝ်ႉၾႆးသႅၼ်း 95 ၼိုင်ႈလိတ်ႉလႂ် 6,500 ပျႃး ၵူႈပွၵ်ႈ 4500 ပျႃး။ ၼိူဝ်ႉမူ 1 ၸွႆႉ 33,000 ပျႃး ၵူႈပွၵ်ႈ 22,000 ပျႃး။ ပႃ 1 ၸွႆႉ 30,000 ပျႃး။ ၶဝ်ႈသၢၼ် 1 ထူင် 170,000 ပျႃး ၵူႈပွၵ်ႈ 130,000 ပျႃး။ ၶႆႇၵႆႇ 1 ၵၢပ်ႈ 30 လုၵ်ႈ 15,000 ပျႃးယဝ်ႉ။
“လွင်ႈယၢပ်ႇၽိုတ်ႇတႄႉ ဢမ်ႇၸၢင်ႈဝႃႈႁိုဝ်ယဝ်ႉ ၵၢၼ်ဢမ်ႇမီး ငိုၼ်းႁႃယၢပ်ႇ ၶၼ်ၶူဝ်းၵုၼ်ႇ ၶိုၼ်ႈၵူႈဢၼ်။ ၵွပ်ႈၼႆလႄႈ မီးသင်ၵေႃႈ ၵိၼ်ၼၼ်ႉၵူၺ်း ၼင်ႇႁိုဝ် တေဢမ်ႇလႆႈဢွၵ်ႇငိုၼ်းၼၼ်ႉ။ တၢၼ်ႇသိုဝ်ႉၼမ် သိုဝ်ႉဢေႇ ႁဵတ်းၸိူင်ႉၼၼ်ဢဝ်။ ဢမ်ႇႁူႉဝႃႈ တေပဵၼ်ႁိုဝ်ၵႂႃႇ ၶၢဝ်းတၢင်းၼႃႈၼႆႉ”- ၵူၼ်းမိူင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၵႃႈႁႅင်း ၵူၼ်းႁဵတ်းၵၢၼ် ၸွမ်းလၢႆးဝၼ်း ၼိုင်ႈၵေႃႉလႂ် တေႃႇဝၼ်း 15,000 ပျႃး ၵႃႈႁႅင်းပၢတ်ႇၶဝ်ႈ၊ ပုမ်ႇၶဝ်ႈ 20,000 ပျႃး။ ၵူႈပီတႄႉ 10,000 ပျႃး ။ လွင်ႈၼႆႉၵေႃႈ ႁဵတ်းႁႂ်ႈၸဝ်ႈၼႃးၶဝ် ထူပ်းတၢင်းယၢပ်ႇ ယွၼ်ႉလႆႈၸၢင်ႈၵႃႈ။ ပီ ၼႆႉသမ်ႉ မၢၵ်ႇၶဝ်ႈတဝ်ႈၼမ်ႉ ဢမ်ႇဢွၵ်ႇလီ ယွၼ်ႉဢမ်ႇလႆႈလုမ်းလႃး တူၺ်းထိုင်လႆႈလီတဵမ်ထူၼ်ႈ ၵုမ်ႇလႆႈပၢႆႈၽေးသိုၵ်းၵူၺ်း – ၸဝ်ႈၼႃး တီႈဝဵင်းလႃႈသဵဝ်ႈလၢတ်ႈ။
ဢိင်ၼိူဝ် ၶၼ်ၶူဝ်းၵုၼ်ႇ ၶွင်ၵိၼ်ယႅမ်ႉၶိုၼ်ႈၼႆႉ ယွၼ်ႉဝႃႈ ၽၵ်းမီႇလႅင် ၸိူဝ်းၼႆႉသမ်ႉ လႆႈတေႃႉဢဝ် တၢင်းမိူင်းမၢၼ်ႈ မႃးၶၢႆ၊ မၢၵ်ႇၶိူဝ်ႈသူမ်ႈသမ်ႉ လုၵ်ႉဢွင်ႇပၢၼ်းမႃး။ ၼမ်ႉမၼ်းၸိူဝ်ႉၾႆးသမ်ႉ လုၵ်ႉတၢင်းၵေးသီး၊ မိူင်းသူႈ မႃးၶၢႆ ၼႆႉသမ်ႉ လႆႈသႂ်ႇပုင်းပီႇပႃႇ – ပုင်းလိူင် ၸိူဝ်းၼၼ်ႉသေ တၢင်ႇမႃးၶၢႆၵူၺ်း ဝႃႈၼႆ။
ထႅင်ႈၾၢႆႇၼိုင်ႈၵေႃႈ တႄႇဢဝ် ႁၢင်လိူၼ်ဢွၵ်ႊထူဝ်ႊပိူဝ်ႊၼၼ်ႉမႃး ၾင်ႇမိူင်းၶႄသမ်ႉ ပိၵ်ႉဢိုတ်း ၽၵ်းတူမိူင်း ၸွမ်းလႅၼ်လိၼ်တႆး – ၶႄႇ ႁၢမ်ႈၶူဝ်းၵုၼ်ႇ ၶွင်ၵိၼ်ယႅမ်ႉ တေႃႉၶဝ်ႈမႃးၶၢႆတၢင်းၾင်ႇၼႆႉထႅင်ႈ ၵွပ်ႈၼႆလႄႈ ႁဵတ်းႁႂ်ႈၵူၼ်းဝဵင်းလႃႈသဵဝ်ႈ တုၵ်ႉၶ ၵူၺ်း ဢမ်ႇၵႃး ၵူၼ်းၼႂ်းမိူင်းတႆး ပွတ်းႁွင်ႇ ၸိူဝ်းၼႆႉ လၢႆၸႄႈဝဵင်းၵေႃႈ ထူပ်းတၢင်းယၢပ်ႇၽိုတ်ႇႁႅင်းထႅင်ႈ ၼႆယဝ်ႉ။
