ၵူၼ်းမိူင်းသီႇပေႃႉ ၵႂႃႇႁႃႁဵပ်း – ဢႅဝ်ႇထိူၼ်ႇသေ ယဵပ်ႇၺႃးမၢၵ်ႇမႅင်းၾင်လိၼ် လူႉတၢႆထင်တီႈ 1 ၵေႃႉ မၢတ်ႇၸဵပ်း 2 ၵေႃႉ။
ပူၼ်ႉမႃး ဝၼ်းတီႈ 01/11/2024 ၼၼ်ႉ ၵူၼ်းဝၢၼ်ႈၵုင်းၸူင် ၽူႈၸၢႆး 2 ၵေႃႉ ၵႂႃႇႁႃႁဵပ်းၼႂ်းထိူၼ်ႇသေ ယဵပ်ႇၺႃး မၢၵ်ႇမႅင်းၾင်လိၼ် ၼႂ်းၼၼ်ႉ တႃႇၵေႃႉၼိုင်ႈ ထိုင်တီႈၶႃပုတ်း ၶွၼ်ၼိုင်ႈ ဝႃႈၼႆ။
မိူၼ်ၼႆၼင်ႇၵဝ်ႇ မိူဝ်ႈႁၢင်လိူၼ်ဢွၵ်ႊထူဝ်ႊပိူဝ်ႊ ပူၼ်ႉမႃးၼၼ်ႉၵေႃႈ ၽူႈၸၢႆး ၵေႃႉၼိုင်ႈ ထူပ်းႁၼ်မၢၵ်ႇမႅင်းသေ ဢဝ်မႃးမိတ်ႈမၼ်းၸၢႆးတွႆႇသႂ်ႇ ထိုင်မၢၵ်ႇတႅၵ်ႇတိူဝ်ႉသႂ်ႇ လူႉတၢႆထင်တီႈ။
ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 1 ၼႆႉ ၽူႈၸၢႆး 2 ၵေႃႉ ၵႂႃႇႁႃႁဵပ်းသေ ယဵပ်ႇ ၺႃးမၢၵ်ႇမႅင်း။ ၼႂ်းၼၼ်ႉ ၵေႃႉၼိုင်ႈ ထိုင်တီႈၶႃပုတ်းၶွၼ်ၼိုင်ႈ။ မိူဝ်ႈႁၢင်လိူၼ်ပူၼ်ႉၼၼ်ႉ မီးၽူႈၸၢႆး ၵေႃႉၼိုင်ႈ ၵဵပ်းလႆႈမၢၵ်ႇ တီႈႁိမ်းႁိူၼ်းမၼ်းၸၢႆးသေ ဢဝ်မိတ်ႈတွႆႇသႂ်ႇ တႅၵ်ႇတိူဝ်ႉမၼ်းၸၢႆး လူႉတၢႆထင်တီႈ။ ယွၼ်ႉမီးၶၢဝ်ႇ ဢွၵ်ႇမႃးၸိူင်ႉၼႆသေ ၵူၼ်းပၢႆႈၽေးသိုၵ်း ၵႂႃႇမီးဝႆႉတၢင်ႇတီႈၼၼ်ႉ ဢမ်ႇႁတ်းပွၵ်ႈမႃးႁိူၼ်း ၵူဝ်ယဵပ်ႇၺႃးမၢၵ်ႇၶႃႈဢေႃႈ”- ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 23/09/2024 ၼၼ်ႉ ယူႇတီႈ တပ်ႉသိုၵ်းတဢၢင်း TNLA ယိုတ်းၵုမ်းလႆႈ တပ်ႉသိုၵ်းမၢၼ်ႈ ၶလ ယ 23 တီႈဝဵင်းသီႇပေႃႉၼႆႉသေ ဝၢႆးၼၼ်ႉမႃး ၵူၼ်းမိူင်း ၸိူဝ်းပၢႆႈၽေးသိုၵ်းဝႆႉၼၼ်ႉ ဢမ်ႇႁတ်းပွၵ်ႈႁိူၼ်း ၵူဝ်ယဵပ်ႇ ၺႃးမၢၵ်ႇမႅင်း ၼႆယဝ်ႉ။
ယၢမ်းလဵဝ် ၵူၼ်းဝဵင်းသီႇပေႃႉ ၵမ်ႈၽွင်ႈ တိုၵ်ႉဢွၼ်ၵၼ် ပၢႆႈသွၼ်ႈဝႆႉၸွမ်းၼႂ်းထိူၼ်ႇၵေႃႈ မီးဝႆႉလႄႈ ယွၼ်ႉဝႃႈ ၵူဝ်သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇသေ ဢမ်ႇႁတ်းပွၵ်ႈႁိူၼ်းယေးၵၼ် – ၵူၼ်းပၢႆႈၽေးသိုၵ်းလၢတ်ႈ။
“ၵူၼ်းပၢႆႈၽေးသိုၵ်း ပႆႇႁတ်းပွၵ်ႈမႃးၶိုၼ်းၼႂ်းဝဵင်းၶႃႈ ၵူဝ်မၢၵ်ႇသိုၵ်းမၢၼ်ႈ တူၵ်းသႂ်ႇၶႃႈဢေႃႈ။ ၵွပ်ႈၼႆလႄႈ ၵူၼ်းပၢႆႈ ၽေး သိုပ်ႇယူႇၼႂ်းထိူၼ်ႇထႅင်ႈ။ ယဝ်ႉၵေႃႈ လႆႈငိၼ်းၶၢဝ်ႇ ၵူၼ်းမိူင်းယဵပ်ႇၺႃးမၢၵ်ႇမႅင်းထႅင်ႈသေ ယိုင်ႈၶႅၼ်း ဢမ်ႇႁတ်းပွၵ်ႈမႃးယဝ်ႉ။ မၢၵ်ႇမႅင်း ဢၼ်တိုၵ်ႉၵိုတ်းၶမ်ဝႆႉယူႇ ၼႂ်းပိုၼ်ႉတီႈ ၸိူဝ်းၼၼ်ႉ ပႆႇမီးၸုမ်းလႂ်မႃးၽဵဝ်ႈသိမ်းပၼ်”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၵူၼ်းမိူင်းသီႇပေႃႉ ဢွၼ်ၵၼ်ပၢႆႈသွၼ်ႈဝႆႉ တီႈဝတ်ႉဝႃးၽႃသိူဝ်ႇ မိူၼ်ၼင်ႇ – တီႈဝတ်ႉယေႇႁေႃႇ၊ ဝတ်ႉၽူဝ်းတေႃႇလႄႈ ဢိၵ်ႇထႅင်ႈလၢႆဝတ်ႉ။ ယဝ်ႉၵေႃႈ ယၢပ်ႇၽိုတ်ႇလိူဝ်ႁႅင်းဝႆႉ ၶွင်ၵိၼ်ယႅမ်ႉ ၸိူဝ်းၼႆႉ။
မိူၼ်ၼႆ ၼင်ႇၵဝ်ႇ ၵူၼ်းမိူင်းလႃႈသဵဝ်ႈ၊ ၵျွၵ်ႉမႄးလႄႈ သီႇပေႃႉ ၸိူဝ်းၼႆႉ ပၢႆႈႁွတ်ႈထိုင်ဝႆႉ ဝဵင်းၵေးသီး ႁူဝ်ၵူၼ်း 500 ပၢႆ မီးၶၢဝ်းတၢင်း 3 လိူၼ်ပၢႆယဝ်ႉ။ ယၢမ်းလဵဝ် ယၢပ်ႇၽိုတ်ႇဝႆႉ ၶွင်ၵိၼ်ယႅမ်ႉလႄႈ ၽႃႁူမ်ႇၶူဝ်းၼွၼ်း ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ