တႄႇဢဝ် ဝၼ်းတီႈ 01 – 07/11/2024 ၶၢဝ်းတၢင်းၼိုင်ႈဝူင်ႈၼႆႉ ၸဝ်ႈၼႃႈတီႈထႆး တီႉၺွပ်းလႆႈ ၵူၼ်းမိူင်းမၢၼ်ႈ ၸိူဝ်းၶၢမ်ႈလႅၼ်လိၼ်သေ ၶဝ်ႈမိူင်းထႆး ဢမ်ႇမႅၼ်ႈတၢင်းၵၢၼ် 100 ပၢႆ – ဝႃႈၼႆ။

ဢၼ်တီႉၺွပ်းလႆႈၼႆႉ ပဵၼ်ၼႂ်းၸႄႈတွၼ်ႈၼၶွၼ်းသဝၼ် 38 ၵေႃႉ၊ ၸႄႈတွၼ်ႈသမုတ်ႇသႃၶွၼ်း 10 ၵေႃႉ၊ ၼႂ်းပႃႇထိူၼ်ႇႁိမ်း ရၼွင်း – ၶျွၼ်ႊပူႊရီႊ 9 ၵေႃႉ ၊ ၸႄႈတွၼ်ႈ ၵၼ်ႊၶျၼပူႊရီႊ 23 ၵေႃႉ ၊ ၸႄႈ တွၼ်ႈသမုတ်ႊပရႃႊၵၼ်ႊ 15 ၵေႃႉလႄႈ ၼႂ်းၸႄႈတွၼ်ႈတၢၵ်ႇ 12 ၵေႃႉ ႁူမ်ႈတင်းမူတ်း 107 ၵေႃႉ ၼႆ ယဝ်ႉ။

ၼႂ်းၵူၼ်း ၸိူဝ်းၺႃးတီႉၺွပ်းၼႆႉ မၢင်ၸိူဝ်း ၶၢမ်ႈလႅၼ်လိၼ် ၶဝ်ႈမိူင်းထႆး လူၺ်ႈဢမ်ႇမႅၼ်ႈတၢင်းၵၢၼ်၊ ၵမ်ႈၽွင်ႈ ယွၼ်ႉဢမ်ႇမီးဝတ်းဝႂ်သေ ၺႃးတီႉၺွပ်း ၽွင်းၸဝ်ႈၼႃႈတီႈထႆး လူင်းၵူတ်ႇထတ်း ၸွမ်းဢွင်ႈ တီႈႁဵတ်းၵၢၼ် ၸိူဝ်းၼၼ်ႉ – ဢူးမူဝ်းၵျူဝ်း ႁူဝ်ပဝ်ႈၸုမ်း (JACBA) လၢတ်ႈတီႈသိုဝ်ႇၶၢဝ်ႇ RFA ၼင်ႇၼႆ။

မိူၼ်ၼႆ ၼႂ်းဝၼ်းတီႈ 6 ၼႆႉ ၸဝ်ႈၼႃႈတီႈထႆး ၶဝ်ႈၵူတ်ႇထတ်း ၼႂ်းဢွင်ႈတီႈႁဵတ်းၵၢၼ် မွၵ်ႈ 30 တီႈ ၼႂ်း ၸႄႈတွၼ်ႈသမုတ်ႊပရႃႊၵၼ်ႊ မိူင်းထႆးသေ တီႉၺွပ်းလႆႈႁႅင်းၵၢၼ်ၵူႈမိူင်းမိူင်း 287 ၵေႃႉ ၊ ၼႂ်းၼၼ်ႉ ပႃး ႁႅင်းၵၢၼ်မိူင်းမၢၼ်ႈ ထႅင်ႈ 161 ၵေႃႉ ၊ ယွၼ်ႉၼၼ် ၼႂ်းႁူဝ်လိူၼ်ၼႆႉၵူၺ်း ၸဝ်ႈၼႃႈတီႈထႆး ၵူတ်ႇထတ်း တီႉၺွပ်းလႆႈ ႁႅင်းၵၢၼ်မိူင်းမၢၼ်ႈ မီး 250 ပၢႆ ဝႃႈၼႆ။

ၸွမ်းၼင်ႇ ပၵ်းပိူင်မၢႆမီႈၵၢၼ်ၵႃႉၶၢႆၵူၼ်း မိူင်းထႆးမီးဝႆႉၼၼ်ႉသေ တေၺႃးတၢမ်ႇၶွၵ်ႈ 1 – 2 ပီ ၊ ၸွမ်းၼင်ႇ ပၵ်းပိူင်မၢႆမီႈ ၵူၼ်းၶဝ်ႈဢွၵ်ႇမိူင်း မိူင်းထႆး(လဝၵ) သမ်ႉ တေၺႃးတၢမ်ႇၶွၵ်ႈ 1 လိူၼ်ပၢႆလႄႈ ထုၵ်ႇသူင်ႇ တူဝ်ပွၵ်ႈမိူင်းၶိုၼ်း။ ဢိင်ၼိူဝ်လွင်ႈတၢင်း ဢၼ်ၺႃးတီႉၺွပ်းၼႆႉသေ တၢမ်ႇတၢင်းၽိတ်းတေပိူင်ႈၵၼ်။

ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇမႃးၼႆႉ ယွၼ်ႉလွင်ႈတၢင်းၵူႈလွင်ႈလွင်ႈသေ ၵူၼ်းမိူင်းမၢၼ်ႈ ၸိူဝ်းပၢႆႈ ၶဝ်ႈၵႂႃႇ တၢင်းမိူင်းထႆး မီးတင်းၼမ်။ လွင်ႈၵၢၼ်ၵႃႉၶၢႆၵူၼ်း ၸိူဝ်းၼႆႉၵေႃႈ တိူဝ်းၼမ်ၶိုၼ်ႈမႃး။ ၼႂ်းလိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၼႆႉၵေႃႈ ႁႅင်းၵၢၼ် မိူင်းမၢၼ်ႈ ၺႃးတီႉၺွပ်းၼႂ်းမိူင်းထႆး 405 ၵေႃႉ။ ယူႇတီႈ ၽူႈမီးပုၼ်ႈၽွၼ်း မိူင်းမၢၼ်ႈ လႆႈႁပ်ႉဢဝ်ၶိုၼ်း တီႈလၢၼ်ႇလႅၼ်လိၼ်ၼႆ ႁွင်ႈၵၢၼ် ၽွင်းလူင် ၾၢႆႇပွင်ႇၶၢဝ်ႇၵပ်းသိုပ်ႇ သိုၵ်းမၢၼ်ႈ ပိုၼ်ၽၢဝ်ႇဝႆႉ ၼႂ်းဝၼ်းတီႈ 05/10/2024 ၼၼ်ႉၼင်ႇၼႆ။