တႄႇဝၼ်းတီႈ 06/11/2024 ယၢမ်းၵၢင်ၼႂ် 4 မူင်း ၾူၼ်တူၵ်းထပ်းၵၼ်ဢမ်ႇထၢတ်ႇ ၼမ်ႉယိုင်ႈၶိုၼ်ႈသုင် 2 မဵတ်ႉပၢႆ ၵူၼ်းၼႂ်းပိုၼ်ႉတီႈၼွင်ႁၢႆးယႃႈ မႆႈၸႂ် ၵူဝ်ထူပ်းၽေးၼမ်ႉထႅင်ႈ ဝႃႈၼႆ။

ၼၢင်းယိင်း ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ၾူၼ်တူၵ်းဢမ်ႇထၢတ်ႇလႄႈ မႆႈၸႂ်ၵူဝ်ၼမ်ႉယိုင်ႈၶိုၼ်ႈ သုင်ႁႅင်းထူမ်ႈႁိူၼ်းယေး  မိူၼ်မိူဝ်ႈလိူၼ်ပူၼ်ႉမႃးဢေႃႈ၊ ၼမ်ႉတႄႇၶိုၼ်ႈမိူဝ်ႈဝၼ်းတီႈ 6 ၵၢင်ၼႂ် 4 မူင်း၊ တေႃႈလဵဝ် ၼမ်ႉ ၶိုၼ်ႈပေႃးမီး 5-6 (ပေႇ) ထတ်းယဝ်ႉ ၵူၼ်းၼႂ်းဝၢၼ်ႈဢွၼ်ၵၼ်လၢမ်းၶၢတ်ႈဝႃႈ ပေႃး ၾူၼ် တေတူၵ်းထိုင် ဝၼ်းတီႈ 8 တႄႉ ၼမ့်တေၶိုၼ်ႈထႅင်ႈမွၵ်ႈ 2 ထတ်း။ တေႃႈလဵဝ် တိုၵ်ႉဢွၼ်ၵၼ်ပႂ်ႉ တူၺ်းငဝ်းလၢႆးမၼ်းဝႆႉယူႇ”- ဝႃႈၼႆ။

ၽွင်းလိူၼ်သႅပ်ႊထႅမ်ႊပိူဝ်ႊ (ထူၼ်ႈ 9) ၼမ်ႉထူမ်ႈသုင်ႁႅင်းၼႂ်းၼွင်ႁၢႆးယႃႈ ႁိုင်လိူၼ်ပၢႆ။ သုမ်ႉသွင်းႁိူၼ်းယေး ၸူမ် ၼမ်ႉႁိုင်လႄႈ ၾင်ႉ၊ မွင်သႃး။ ယၢမ်းလဵဝ် ၵူၼ်းၼႂ်းပိုၼ်ႉတီႈ ၼွင်ႁၢႆးယႃႈ ဢွၼ်ၵၼ်ပႂ်ႉတူၺ်းငဝ်းလၢႆးၼမ်ႉသေ မႆႈ ၸႂ်ဝႆႉ ဝႃႈၼႆ။

ၼမ်ႉထူမ်ႈႁိုင်ဝႆႉလႄႈ တေႃႇထိုင်ယၢမ်းလဵဝ် ပိုၼ်ႉလိၼ်ၵူမ်ႇဢုင် ယူၼ်ႈဝႆႉ။ ႁိူၼ်းယေး ၸိူဝ်းၺႃးၼမ်ႉထူမ်ႈ ဢမ်ႇပေႃးမၼ်ႈၵိုမ်းယဝ်ႉ။ ပေႃးလူမ်းႁႅင်း ႁိူၼ်းပေႃးၶွၼ်းဝႆ။ ၵူၼ်းပိုၼ်ႉတီႈ လႆႈသိုဝ်ႉလိၼ်မၢၵ်ႇ ႁိၼ်မႃးထူမ်။

 ၼၢင်းယိင်း ဢၼ်ယၢမ်ႈၺႃးၽေး ၼမ်ႉထူမ်ႈၼမ်ႉၼွင်း လၢတ်ႈၽူႈတွႆႇႁွၵ်ႈဝႃႈ -“ယွၼ်ႉလိၼ်ဢူၼ်ႈ လိၼ်ယူၼ်ႈသေလႄႈ ပေႃးလူမ်းထူဝ်းပတ်ႉ ႁႅင်းၵေႃႈ ႁိူၼ်းၶွၼ်းဝႆ မိူၼ်တေၵူၼ်ႇပင်းယဝ်ႉၶႃႈ။ ၵႃႈလႆႈ ၵႂႃႇသိုဝ်ႉလိၼ်မၢၵ်ႇႁိၼ်မႃးထူမ်သႂ်ႇၼႂ်းဝၢင်းႁိူၼ်းၶႃႈဢေႃႈ။ ၶီႈလိၼ်ၵေႃႈၵႃႈယႂ်ႇ။ တႃႇႁိူဝ်း 1 လမ်းၼႆႉ 1 မိုၼ်ႇပျႃးဝႃႇ။ တိုၵ်းၺႃးၼမ်ႉထူမ်ႈယဝ်ႉၵူၺ်းလႄႈ ငိုၼ်းၵေႃႈဢမ်ႇမီး။ တႃႇၵိၼ်ပေႃးယၢပ်ႇယူႇယဝ်ႉ။ တေ ဢမ်ႇသိုဝ်ႉလိၼ်ထူမ်ၵေႃႈ သမ်ႉၵူဝ်ႁိူၼ်း ၵူၼ်ႇ။ တေႁဵတ်းႁိုဝ် ပေႃးဢမ်ႇႁူႉယဝ်ႉ”- ဝႃႈၼႆ။

ဝၼ်းတီႈ 02/11/2024 တီႈတင်းဝၢၼ်ႈၵၼူႉ(ကနု)၊ ဝၢၼ်ႈၵၢၼ်ႇလႃႉ (ကံလှ) လူမ်းပတ်ႉလႄႈ လင်ႁိူၼ်း လူႉၵွႆႇၵႂႃႇမွၵ်ႈ 40 လင်ၼႆ မၼ်းၼၢင်းသိုပ်ႇလၢတ်ႈထႅင်ႈ ၼင်ႇၼႆ။

“တေႃႈလဵဝ် ၼႂ်းၼွင် တၢင်းၵႂႃႇတၢင်းမႃးယၢပ်ႇၸႂ်ၼႃႇ၊ တၢင်းလိၼ်ၵေႃႈ ဢမ်ႇလႆႈ၊ တၢင်းၼမ်ႉၵေႃႈ ဢမ်ႇလႆႈ တၢင်းဝၢၼ်ႈၵၼူႉ၊ ၵၢၼ်ႇလႃႉ လူမ်းထွင်း လင်ႁိူၼ်းလူႉၵွႆပဵၼ် 40 ၊ ႁိူၼ်းမၢင်လင်ၵေႃႈ ၸွမ်ႁိူၼ်းပိဝ်ၸွမ်း။ မၢင်လင်ၵေႃႈ ပိဝ်တင်းလင်။ ပဵၼ်ဢၼ်ယၢပ်ႇၸႂ်လၢႆလၢႆ”- ဝႃႈၼႆ။

ႁူဝ်လိူၼ်ၼူဝ်ႊဝႅမ်ႊပိူဝ်ႊၼႆႉသမ်ႉ ၵႄးၼမ်ႉလႃႈ၊ ၼမ်ႉယုမ်း၊ ၼမ်ႉပိင် လူၼ်ႉၾင်ႇၼွင်းထူမ်ႈ ၼႂ်းဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်းထႅင်ႈ ႁဵတ်းႁႂ်ႈတုမ်ႉတိူဝ်ႉႁိူၼ်းယေးလႄႈ သူၼ်ႁႆႈၼႃးၵူၼ်းမိူင်း ဝႃႈၼႆ။ 

ၵူၼ်းမိူင်း ဢွၼ်ၵၼ်မႆႈၸႂ် ၶဝ်ႈတႃႇၵိၼ်ပီၼႃႈပီလိုၼ်း။ သင်ဝႃႈ ၼမ်ႉတိုၵ်ႉထူမ်ႈၸိူင်ႉၼႆထႅင်ႈၸိုင် တေၸၢင်ႈႁဵတ်း ႁႂ်ႈတူၼ်ႈၶဝ်ႈၼဝ်ႈလူႉသုမ်း၊ တႃႇတေၽုၵ်ႇသွမ်ႈတၢင်ႇဢၼ်ၵေႃႈ တေၸၢင်ႈ ထူပ်းတၢင်း ယၢပ်ႇၽိုတ်ႇၼမ် ဝႃႈၼႆ။

ဢူးဝိၼ်းၼၢႆႇ ၽူႈလူင်ႉလႅၼ်ႇ ၾၢႆႇလၢမ်းၶၢတ်ႈ ၾိင်ႈၾႃႉရႃႇသီႇ ပိုၼ်ၽၢဝ်ႇဝႆႉဝႃႈ – ဝၼ်းတီႈ 7/11/2024 ၼႂ်းဝူင်ႈၼႆႉ ၾူၼ်တူၵ်းႁႅင်းၼႂ်းၸိုင်ႈတႆးပွတ်းၸၢၼ်း။ ၼမ်သုတ်းပဵၼ်တီႈၼွင်ႁၢႆးယႃႈ။ လိူဝ်ၼၼ်ႉ   တီႈ ၵၢတ်ႇလေႃႉ၊ တီႈတူၼ်ႈတီး ၸိူဝ်းၼႆႉၵေႃႈ တူၵ်းႁႅင်း။ တၢင်းဝဵင်းႁူဝ်ပူင်း မိူင်းပွၼ် – လွႆလႅမ် – ပၢင်လူင် -ၼမ်ႉၸၢင် – မိူင်းၼၢႆး – လၢင်းၶိူဝ်း ၵေႃႈ ၾူၼ်တူၵ်းဢမ်ႇထၢတ်ႇ 2 ဝၼ်း။ ႁဵတ်းႁႂ်ႈ မႄႈၼမ်ႉၵႄးၼမ်ႉ ၼွင်းလူၼ်ႉၾင်ႇ ၶဝ်ႈဝၢၼ်ႈၶဝ်ႈသူၼ်ထႅင်ႈ။ 

ၽွင်းၾူၼ်တူၵ်းထပ်းၵၼ် ဢမ်ႇထၢတ်ႇၼႆႉ ႁႅင်းလူမ်းမႆႈၵေႃႈ လူတ်းယွမ်းလူင်း။ ၵတ်းလိူဝ်ႁႅင်းလႄႈ ၵူၼ်းထဝ်ႈ ၵူၼ်းၵႄႇ သမ်ႉပေႃးဢမ်ႇၶႂ်ႈတူင်ႉၶႂ်ႈၼိုင် ၵူၼ်းမိူင်းၼၢႆးလႄႈ လၢင်းၶိူဝ်း လၢတ်ႈၼင်ႇၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)