ၼမ်ႉတဵင်းလုပ်ႇထူမ်ႈ ဝဵင်းလၢင်းၶိူဝ်းထႅင်ႈ

မိူဝ်ႈၼႆႉ ဝၼ်းတီႈ 08/11/2024 ယၢမ်းၵၢင်ၼႂ် ၼမ်ႉတဵင်း လူၼ်ႉၾင်ႇလုပ်ႇထူမ်ႈ ႁိူၼ်းယေးၵူၼ်းမိူင်း တီႈ ၶူင်ႈယၢၼ်း ၸွမ်းၾင်ႇတဵင်း ၼႂ်းပွၵ်ႉယွမ်ႇ ဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်းထႅင်ႈ ယွၼ်ႉၾူၼ်တူၵ်း ႁႅင်းထပ်းၵၼ်မႃး 3 ဝၼ်းယဝ်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းလၢင်းၶိူဝ်း ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၾူၼ်တူၵ်း ထပ်းၵၼ်မႃးၼႆႉ 3 ဝၼ်းယဝ်ႉ။ တႄႇဢဝ် ဝၼ်းတီႈ 6 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ၾူၼ်ယင်းပႆႇႁိူတ်ႇ။ ယၢမ်းလဵဝ် ၼမ်ႉတဵင်းလုပ်ႇထူမ်ႈ ၸွမ်းၼိူဝ်သဵၼ်ႈတၢင်းႁိမ်းၾင်ႇတဵင်းမူတ်းယဝ်ႉ။ ႁိူၼ်းယေး ၵူၼ်းဝၢၼ်ႈ တီႈၶူင်ႈယၢၼ်း ၸွမ်းပွၵ်ႉၵၢတ်ႇ ၸိူဝ်းၼႆႉၵေႃႈ လႆထူမ်ႈယဝ်ႉၶႃႈ။ ယၢမ်းလဵဝ် ၼမ်ႉတႄႇထူမ်ႈ ၶိုၼ်ႈမႃး လွႆးလွႆးယဝ်ႉ”- ဝႃႈၼႆ။

လိူဝ်ၼၼ်ႉ မိူၼ်ၼင်ႇ တၢင်းဝၢၼ်ႈပူးၵမ်ႇ၊ ဝၢၼ်ႈၼမ်ႉဢုၼ်ႇ ၸိူဝ်းၼၼ်ႉၵေႃႈ ၼမ်ႉလႆၶဝ်ႈထူမ်ႈ မိူၼ်ၵၼ်ယဝ်ႉ။

“ၼမ်ႉတဵင်းၼႆႉ မိူဝ်ႈဝႃး ဢမ်ႇၶိုၼ်ႈၶႃႈ ဢၼ်ၼမ်ႉၶိုၼ်ႈၼႆႉ တိုၵ်ႉတႄႇမႃး မိူဝ်ႈၼႆႉ ယၢမ်းၵၢင်ၼႂ်။ ၶၢဝ်းတၢင်းႁိုင်မွၵ်ႈ 2 ၸူဝ်ႈမူင်းၵူၺ်း ၼမ်ႉၼႆႉ ပေႃးယိုင်ႈၶိုၼ်ႈထူမ်ႈၸွမ်းတၢင်း၊ ၼႂ်းႁိူၼ်းယေး တီႈၶူင်ႈယၢၼ်း ၸွမ်းႁိမ်းၾင်ႇတဵင်း ၸိူဝ်းၼႆႉမႃးယဝ်ႉ။ တီႈဝၢၼ်ႈၼႃးၵူင်းၵေႃႈ မိူၼ်ၵၼ် ၼၼ်ႉတႄႉ ၼမ်ႉပၢၵ်ႇ လႆလုပ်ႈထူမ်ႈ”- ၵူၼ်းပိုၼ်ႉတီႈ ဝဵင်းလၢင်းၶိူဝ်း သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် လွင်ႈၼမ်ႉတဵင်း လူၼ်ႉၾင်ႇလုပ်ႇထူမ်ႈမႃး ၸိူင်ႉၼႆၶိုၼ်းၼႆႉ ယွၼ်ႉၽူႈမီးပုၼ်ႈၽွၼ်း ဢၼ်ပႂ်ႉတီႈတၢတ်ႇလူင် ၵဵင်းတွင်း ဢၼ်ႁဵတ်းဝႆႉၾၢႆၾႆးၾႃႉၼၼ်ႉ ၶဝ်ပွႆႇၼမ်ႉလူင်းမႃး ႁဵတ်းႁႂ်ႈၼမ်ႉတဵင်းယိုင်ႈ လုပ်ႇထူမ်ႈ – ဝႃႈၼႆ။

ယၢမ်းလဵဝ် တီႈၸႄႈဝဵင်းလၢင်းၶိူဝ်းၼႆႉ ၾူၼ်တိုၵ်ႉတူၵ်းႁႅင်းယူႇလႄႈ ၵွပ်ႈၼႆ ၾၢင်ႉထိုင်ပၼ် ၵူၼ်းပိုၼ်ႉတီႈ ႁႂ်ႈဢွၼ် ၵၼ်ၶၢႆႉၶူဝ်းၶွင် ဝႆႉတီႈသုင်ၵၼ် ယွၼ်ႉၵူဝ်ၼမ်ႉတဵင်း ၵိုင်ႉၵၢင်ႉၼွင်းထူမ်ႈမႃး မိူၼ်မိူဝ်ႈပူၼ်ႉမႃးၼၼ်ႉ ၵူဝ်ဢမ်ႇတၼ်းလႆႈသင် – ၽူႈတူင်ႉၼိုင် တူင်ႇဝူင်းၵူၼ်း ဝဵင်းလၢင်းၶိူဝ်း ၵေႃႉၼိုင်ႈ ပၼ်ၾၢင်ႉဝႆႉၼင်ႇၼႆ။

ပီၼႆႉ တီႈဝဵင်းလၢင်းၶိူဝ်း ႁိူၼ်းယေးၵူၼ်းမိူင်း ၺႃးၼမ်ႉထူမ်ႈ ဢမ်ႇယွမ်း 3 ပွၵ်ႈယဝ်ႉ ႁိူၼ်းယေး ၺႃးၼမ်ႉထူမ်ႈမီး 3,215 လင်၊ ၵူၼ်းမိူင်းထူပ်းၽေးၼမ်ႉ 14,802 ၵေႃႉ။ ယဝ်ႉၵေႃႈ သူၼ်ႁႆႈၼႃးလူႉသုမ်းထႅင်ႈ 1,600 ဢေႊၶိူဝ်ႊ။

မိူၼ်ၼႆၼင်ႇၵဝ်ႇ မိူဝ်ႈၼႆႉ ဝၼ်းတီႈ 08/11/2024 ယၢမ်းၵၢင်ၼႂ် ၵႄးၼမ်ႉလၢတ်ႈ လုပ်ႇထူမ်ႈ ႁူင်းႁဵၼ်းၸၼ်ႉၵၢင်လႄႈ ႁိူၼ်းယေး ၵူၼ်းဝၢၼ်ႈ တီႈၶူင်ႈယၢၼ်း ၼႂ်းပွၵ်ႉ 1 ဝဵင်းၼမ်ႉၸၢင် ၸိုင်ႈတႆး ပွတ်းၸၢၼ်း။

တီႈဝဵင်းမွၵ်ႇမႆႇၵေႃႈ တႄႇဢဝ်ႁူဝ်လိူၼ်ၼႆႉမႃး ၵႄးၼမ်ႉလႃႈ၊ ၼမ်ႉယုမ်း၊ ၼမ်ႉပိင် ၸိူဝ်းၼႆႉ လူၼ်ႉၾင်ႇသေ လုပ်ႇထူမ်ႈထႅင်ႈ ၸွမ်းၼႂ်းပွၵ်ႉယွမ်ႇ၊ သဵၼ်ႈတႃႈသၢႆတၢင်းလႄႈ ႁိူၼ်းယေး ၸိူဝ်းၼႆႉထႅင်ႈ။ ပီၼႆႉ ၼမ်ႉထူမ်ႈ တီႈဝဵင်းမွၵ်ႇမႆႇ ဢမ်ႇယွမ်း 6 ပွၵ်ႉယဝ်ႉ ဝႃႈၼႆ။

ၸုၸုၸၢၼ်ႇ ၽူႈလူင်ႉလႅၼ်ႇၾၢႆႇၾိင်ႈၾႃႉရႃႇသီႇ ပိုၼ်ၽၢဝ်ႇဢွၵ်ႇမႃး မိူဝ်ႈၼႆႉ ဝၼ်းတီႈ 8 ဝႃႈ – လင်သွင် ဝၼ်းၼႆႉ ၾူၼ်တူၵ်း တီႈၼႂ်းမိူင်းတႆးၼႆႉ တေႁိူတ်ႇမူတ်းယဝ်ႉသေ မူၺ်တေတူၵ်းၼမ်ယဝ်ႉ ဝႃႈၼႆ။