သိုၵ်းမၢၼ်ႈဢႅဝ်ႇႁႃ တီ့ၺွပ်းၵူၼ်းသူႇၵိၼ်ယႃႈမဝ်းၵမ်ၼႂ်းပိုၼ်ႉတီႈ ဝဵင်းလွႆလႅမ် ၸိုင်ႈတႆးပွတ်းၸၢၼ်းသေ ႁႂ်ႈပႂ်ႉၵဵတ်ႉလၢၼ်ႇ တၢင်းၶဝ်ႈ/ဢွၵ်ႇဝဵင်း ။
ႁၢင်လိူၼ်ဢွၵ်ႊထူဝ်ႊပိူဝ်ႊၼႆ့မႃး ၵူၼ်းသိုၵ်းမၢၼ်ႈ တူၵ်းသုမ်းတၢႆႁၢႆၼမ် ၊ သိုၵ်းမၢၼ်ႈႁႅင်းဢႄႇမႃးတိၵ်းတိၵ်းယဝ်ႉလႄႈ သိုၵ်းမၢၼ်ႈလိုပ်ႈလမ်းတီ့ၺွပ်းၵူၼ်းသူႇယႃႈမဝ်းၵမ်မႃးၾိုၵ်းၵၢၼ်သိုၵ်းသေ ၸႂ်ႉပႂ်ႉၵဵတ်ႉ/လၢၼ်ႇ တၢင်းၶဝ်ႈ-ဢွၵ်ႇဝဵင်း ၵူၼ်းၸၢႆးပိုၼ့်တီႈ လၢတ်ႈၽူႈတွႆႇႁွၵ်ႈၼင်ၼႆ ။
“ဢမ်ႇမီးၵူၼ်း တႃႇႁၢပ်ႇၵၢၼ်သိုၵ်း ယဝ့်လူး ၊ သိုၵ်းမၢၼ်ႈၶဝ် ႁႃၺွပ်းၵူၼ်းၶီႈလဝ်ႈၶီႈယႃႈ မႃးၾိုၵ်း ၵၢၼ် သိုၵ်း ၊ ၵူၼ်းတိတ်းလဝ်ႈတိတ်းယႃႈ ၵူႈပွၵ်ႈၼၼ်ႉ ယၢမ်းလဵဝ် ယိပ်းၵွင်ႈသေ ပႂ်ႉတီႈၵဵတ်ႉလၢၼ်ႇ တၢင်း ၶဝ်ႈတၢင်းဢွၵ်ႇဝဵင်း ။ ”- ဝႃႈၼႆ ။
သိုၵ်းမၢၼ်ႈပၼ်ၶီႈယႃႈ ယိပ်းၵွင်ႈသေ မႃးပႂ်ႉၵဵတ်ႉ/လၢၼ်ႇၸိူင်ႉၼႆ ယူႇတီႈၵူၼ်းမိူင်းသေ မႆႈၸႂ် ၵူဝ် ဢမ်ႇမီးလွင်ႈႁူမ်ႇလူမ်ႈ ၊ ၵူဝ်ၽူႈလၵ်ႉၵူၼ်းၸူၼ်ယိင်ႈၶႅၼ်းလိူင်ႇၼမ်လိူဝ်ၵဝ်ႇ၊ ၵူဝ်ၸိူဝ်းပႂ်ႉၵဵတ်ႉ/ လၢၼ်ႇၸိူဝ်းၼၼ်ႉ ယွၼ်းသိုၵ်း ထႆၵိၼ်ငိုၼ်းတီႈၸဝ်ႈၵႃးလႄႈ ၵူၼ်းၵႂႃႇတၢင်း ၼမ်မႃးလိူဝ်ၵဝ်ႇ ၵူၺ်းယဝ်ႉဝႃႈၼႆ။
လွင်ႈသိုၵ်းမၢၼ်ႈၵဵပ်းၵူၼ်းၼႂ်းပွၵ်ႉ/ယွမ်ႇ မႃးၾိုၵ်းၵၢၼ်သိုၵ်းၼႆႉ ဢမ်ႇမီးၽႂ်ၽွမ်ႉၸွမ်းႁၼ်လီလႄႈ ၸိူဝ်းၸၢင်ႈပၢႆႈၵေႃႈဢွၼ်ၵၼ်ပၢႆႈ။ ၸိူဝ်းဢမ်ႇၸၢင်ႈပၢႆႈၵေႃႈႁႃးႁွင်ႉၵႂႃႇၾိုၵ်းၵၢၼ်သိုၵ်းသေ သူင်ႇလူင်း ပိုၼ်ႉတီႈပၢင်တိုၵ်းၵမ်းလဵဝ်။ ၵွပ်ႈၼႆယၢမ်းလဵဝ် ၵၢင်ႉၵႄႇၵမ်ႈၼမ် ဢမ်ႇၸွမ်းၶေႃႈၸီႉသင်ႇသိုၵ်းမၢၼ်ႈ၊ ဢမ်ႇၵဵပ်းၵူၼ်းမႂ်ႇပၼ်သိုၵ်းမၢၼ်ႈယဝ်ႉလႄႈ သိုၵ်းမၢၼ်ႈၵႃႈလႆႈလူင်းပိုၼ်ႉတီႈႁႃၵူၼ်းမႂ်ႇႁင်းၵူၺ်း။ ႁၼ်ၽႂ်ၵေႃႈၵဵပ်း။ ယၢမ်းလဵဝ်ဢၼ်ၵဵပ်းလႆႈမႃးၵမ်ႈၼမ်ပဵၼ် ၶီႈယႃႈၶီႈၾိၼ်ႇ။
ပူႇၵၢင့်ၼႂ်းၸႄႈဝဵင်းလွႆလႅမ်လၢတ်ႈတီႈၽူႈတွႆႇႁွၵ်ႈဝႃႈ -“တီႈဝၢၼ်ႈႁဝ်းတႄ့ ၵူၼ်းၼုမ်ႇၵူၼ်းမႂ်ႇ ဢမ်ႇမီးယဝ်ႉ။ သဵင်ႈမူတ်းယဝ့် ။ ၸင်ႇဝႃႈ – ပေႃးၶဝ်ႁွင့်မႃးထႅင်ႈၵေႃႈ ႁဝ်းတေဢမ်ႇၸၢင်ႈၵႂႃႇႁွင့်ပၼ်တီႈလႂ်ယဝ့် ၊ ၵူၼ်းၸိူဝ်းၶဝ်ႁွင်ႉၵႂႃႇၸုပ်ႈဢွၼ်တၢင်းၼၼ်ႉ ဝၢႆးၾိုၵ်းပၼ်ယဝ်ႉ သူင်ႇၵႂႃႇ ၵႆဝႃႈၵႆ ။ သူင်ႇၵႂႃႇတၢင်း တိူင်းတၼၢဝ်းသီ ပုၼ်ႉလႂ်ဝႃႇ ၊ သူင်ႇၵႂႃႇတၢင်းတိူင်းၸႄႈၵႅင်းလႂ်ဝႃႇ ၊ တၢႆႁႃႉ လိပ်းႁႃႉ တႄႉၵေႃႈဢမ်ႇႁူႉ “- ဝႃႈၼႆ ။
ယူႇတီႈၵူၼ်းပိုၼ့်တီႈၵေႃႈ ပေႃးဢမ်ႇၶႂ်ႈၵႂႃႇႁဵတ်းသိုၵ်းမၢၼ်ႈတႄႉ လူဝ်ႇၾၢင်ႉလွင်ႈၵႂႃႇမႃးပႆ၊ ၵႆၽေးႁႂ်ႈဝႄႈၽေးဝႆႉ- ၼႆၵၢင်ႉၵႄႇၵူၼ်းလူင်ဝၢၼ်ႈဝဵင်းၶဝ် လၵ်ႉလွမ်ပၼ်ၾၢင်ႉၵူၼ်းမိူင်းဝဵင်းလွႆလႅမ် ပၢင်လူင်ဝႆႉၼင်ႇၼႆ။
ယၢမ်းလဵဝ်တီႈဝဵင်းလွႆလႅမ်ၼႆ့ သိုဝ့်ၵိၼ် ယႃႈမ ၼိုင်ႈမဵတ့် 300 ပျႃးထိုင် 450 ပျႃးၵူၺ်း ၊ ႁႃသိုဝ်ႉလႆႈၵူႈတီႈ ၊ ယႃႈမဝ်းၵမ် လိူင်ႇလႄႈသိုဝ်ႉၶၢႆထုၵ်ႇ ႁဵတ်းႁႂ်ႈၵူၼ်းၼုမ်ႇၵူၼ်းၵမ် တိတ်းယႃႈတိတ်းၾိၼ်ႇ ၊ ၸၢတ်ႈပၢၼ်လူႉသုမ်း။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ် )
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ