ပီၼႆႉ တီႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း ၺႃးၼမ်ႉလုပ်ႈထူမ်ႈ ဢမ်ႇယွမ်း 6 ပွၵ်ႈယဝ်ႉ ႁဵတ်းႁႂ်ႈၵူၼ်းမိူင်း ထူပ်းတၢင်းယၢပ်ႇၽိုတ်ႇႁႅင်း။

ႁူဝ်လိူၼ်ၼူဝ်ႊဝႅမ်ႊပိူဝ်ႊ 2024 ၼႆႉ ၵႄးၼမ်ႉလႃႈ၊ ၼမ်ႉယုမ်း၊ ၼမ်ႉပိင် လူၼ်ႉၾင်ႇၼွင်းထူမ်ႈ ၼႂ်းဝဵင်းမွၵ်ႇမႆႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်းထႅင်ႈ ႁဵတ်းႁႂ်ႈတုမ်ႉတိူဝ်ႉႁိူၼ်းယေးလႄႈ သူၼ်ႁႆႈၼႃးၵူၼ်းမိူင်း ဝႃႈၼႆ။

ၵူၼ်းပိုၼ်ႉတီႈ ဝဵင်းမွၵ်ႇမႆႇ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉၾူၼ်တူၵ်းထပ်းၵၼ် လၢႆဝၼ်းသေ ႁဵတ်းႁႂ်ႈၵႄးၼမ်ႉလႃႈ၊ ၼမ်ႉယုမ်း၊ ၼမ်ႉပိင် လူၼ်ႉၾင်ႇၼွင်းထူမ်ႈ တၢင်းဝၢၼ်ႈၵုၼ်ၵႅင်း၊ သေးတၢၼ်းလႄႈ မူၺ်ႇတေႃႇ ၸိူဝ်းၼႆႉ။ ၼမ်ႉၼႆႉ ထူမ်ႈၽႅဝ်ၼႂ်းႁိူၼ်းယေးၵူၼ်းမိူင်း ၸိူဝ်းတီႈၶူင်ႈယၢၼ်း။ ဢၼ်ထူမ်ႈႁႅင်းၼႆႉ တေမီး 6 ပွၵ်ႈ ပႃးၼႆယဝ်ႉ။ ယၢမ်းလဵဝ် ၾူၼ်ၵေႃႈ တိုၵ်ႉတူၵ်းယူႇ ၵူၼ်းမိူင်းတႄႉမႆႈၸႂ် ၵူဝ်ၼမ်ႉထူမ်ႈ ႁႅင်းထႅင်ႈ မိူၼ်ၵူႈပွၵ်ႈၼၼ်ႉဢေႃႈ”- ဝႃႈၼႆ။

ၵူၼ်းဝဵင်းမွၵ်ႇမႆႇတႄႉ ဢွၼ်ၵၼ်မႆႈၸႂ် ၵဵဝ်ႇလူၺ်ႈၼမ်ႉထူမ်ႈပွၵ်ႈၼႆႉ ယွၼ်ႉၵူဝ်ၼွင်းထူမ်ႈ ႁၢဝ်ႈႁႅင်း မိူၼ်မိူဝ်ႈၵူႈပွၵ်ႈ။ ႁိူၼ်းယေးၵူၼ်းမိူင်း ဢၼ်ၺႃးၼမ်ႉလုပ်ႈထူမ်ႈပွၵ်ႈၼၼ်ႉ မၢင်ၸိူဝ်း ယင်းပႆႇၸၢင်ႈၽဵဝ်ႈၶီႈ ၵူမ်ႇၶီႈငႂ်ႈယဝ်ႉမူတ်း ဝႃႈ ၼႆ။

“မၢင်ၵေႃႉ ၶဝ်လႆႈမႃးၶၢတ်ႈယူႇၼိူဝ်ၵုင်းဝႆႉ မိူဝ်ႈလိူၼ်ပူၼ်ႉမႃးၼၼ်ႉ ပႆႇႁတ်းလူင်းမိူဝ်းၶိုၼ်း ယွၼ်ႉၾူၼ် ပႆႇမူတ်း ၵမ်ႈၽွင်ႈတႄႉ လူင်းမိူဝ်းၶိုၼ်းယဝ်ႉ။ ၵမ်ႈၽွင်ႈတႄႉ ၽဵဝ်ႈယဝ်ႉလၢင်ႉယဝ်ႉ ပွၵ်ႈမိူဝ်းယူႇ ယင်းပႆႇႁိုင် ပေႃးတေလႆႈၽဵဝ်ႈထႅင်ႈသိမ်းထႅင်ႈယဝ်ႉ။ ယွၼ်ႉဝႃႈ ၶီႈၵူမ်ႇၶီႈငႂ်ႈမၼ်း ထူမ်ႈၼမ်။ ယွၼ်ႉပဵၼ်မႃးၸိူင်ႉၼႆ မီးမႃးလၢႆပွၵ်ႈလၢႆၵမ်းယဝ်ႉလႄႈ လူဝ်ႇမီးဝႆႉဝိရိယသေ ၶၢႆႉၶူဝ်းဝႆႉတီႈသုင်ၵူၺ်းယဝ်ႉ။ ဢၼ်တေလႆႈမႆႈၸႂ်တႄႉ ၵူဝ်လိၼ်ၵူၼ်ႇပင်းၼၼ်ႉၵူၺ်းယဝ်ႉ”- ၵူၼ်းပိုၼ်ႉတီႈ ဝဵင်းမွၵ်ႇမႆႇ သိုပ်ႇလၢတ်ႈၼႄၼင်ႇၼႆ။

တႄႇဢဝ် လိူၼ်သႅပ်ႊထႅမ်ႊပိူဝ်ႊ 2024 ၼၼ်ႉမႃး ၼမ်ႉလုပ်ႈထူမ်ႈ တီႈဝဵင်းမွၵ်ႇမႆႇၼႆႉ ႁၢၼ်ႉတေႃႇထိုင်ယၢမ်းလဵဝ်မီး 6 ပွၵ်ႈယဝ်ႉ။ ယွၼ်ႉၼမ်ႉလုပ်ႈထူမ်ႈၼႆႉသေ ႁဵတ်းႁႂ်ႈၵူၼ်းမိူင်းလူႉသုမ်း ၶူဝ်းႁိူၼ်းယေးလႄႈ သူၼ်ႁႆႈၼႃး ၸိူဝ်းၼႆႉထႅင်ႈ တင်းၼမ်။

ယွၼ်ႉၼၼ် ၵူၼ်းမိူင်း ဢွၼ်ၵၼ်မႆႈၸႂ် ၶဝ်ႈတႃႇၵိၼ်ပီၼႃႈပီလိုၼ်း သင်ဝႃႈ ၼမ်ႉတိုၵ်ႉထူမ်ႈၸိူင်ႉၼႆ ထႅင်ႈၸိုင် တေ ၸၢင်ႈႁဵတ်းႁႂ်ႈတူၼ်ႈၶဝ်ႈၼဝ်ႈလူႉသုမ်း၊ တႃႇတေၽုၵ်ႇသွမ်ႈတၢင်ႇဢၼ်ၵေႃႈ တေၸၢင်ႈ ထူပ်းတၢင်းယၢပ်ႇၽိုတ်ႇၼမ် ဝႃႈၼႆ။