ၽွင်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ယိုတ်းၵုမ်းလႆႈဝႆႉ ပၢင်ၵႃႉၶၢႆၸွမ်းလႅၼ်လိၼ် မိူင်းမၢၼ်ႈ – မိူင်းၶႄႇ ယူႇၼႆႉ ၸွမ် ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈၵႂႃႇ ၼႂ်းဝၼ်းတီႈ 05/11/2024 ၼႆႉဝႃႈ တေႁူမ်ႈၵၼ်တင်းမိူင်းၶႄႇသေ တိူဝ်း ႁဵတ်းသၢင်ႈၵၢၼ်မၼ်ႈၼိမ်တဵင်ႈ ၸွမ်းလႅၼ်လိၼ်ၵႂႃႇ ဝႃႈၼႆ။

လွင်ႈၼႆႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈၵႂႃႇ မိူဝ်ႈၽွင်းႁွတ်ႈထိုင်တီႈဝဵင်းၶုၼ်ႊမိင်ႊ မိူင်းၶႄႇသေ ႁူပ်ႉ ဢုပ်ႇၵၼ်တင်း Mr. Wang Ning ၽူႈၼမ်းၼႂ်း ၶွမ်ႊမတီႊပႃႊတီႊ ၸႄႈတွၼ်ႈယုၼ်ႊၼၼ်ႊ (ၽူႈၶဝ်ႈၸုမ်းၵေႃႇမတီႇငဝ်ႈငုၼ်း ပႃႇတီႇၶွမ်ႊမိဝ်ႊၼိတ်ႊ မိူင်းၶႄႇ)။

ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈဝႃႈ ပေႃးလႅၼ်လိၼ်မီးလွင်ႈၼိမ်တဵင်ႈၵွၼ်ႇ ၸင်ႇတေၸၢင်ႈ ႁဵတ်းသၢင်ႈ ၵၢၼ်ၵႃႉၶၢႆ ပၢႆးမၢၵ်ႈမီး။ လိူဝ်ၼၼ်ႉ ၽွင်းၶူင်းၵၢၼ်ၶႄႇ ၺႃးတိုၵ်းတေႃးတူဝ်ႈမိူင်းယူႇၼႆႉ မၼ်းၸၢႆးမွၵ်ႇထိုင် ႁႂ်ႈမိူင်း ၶႄႇ မႃးလူင်းတိုၼ်းလၢင်း ၼႂ်းၵၢၼ်ၽုၵ်ႇသွမ်ႈလဵင်ႉလူတူဝ်သတ်းလႄႈ ၵၢၼ်ႁူင်းၸၢၵ်ႈ ၸိူဝ်းၼႆႉ။

ၾၢႆႇမိူင်းၶႄႇသမ်ႉ ဢုပ်ႇဢူဝ်းၵႂႃႇ လွင်ႈၵၢၼ်ပၢႆးမၢၵ်ႈမီး ၼႂ်းၵႄႈၵၢင်မိူင်းမၢၼ်ႈလႄႈ ၸႄႈတွၼ်ႈယုၼ်ႊၼၼ်ႊ၊ တႃႇတေၽေႃႇၼမ်ႉၼႄတူဝ် လွင်ႈၶူင်းၵၢၼ် တိုၵ်းတေႃးၽဵဝ်ႈမူၺ်ႉ ၵၢၼ်ၽိတ်းမၢႆမီႈၶၢမ်ႈမိူင်း ဢၼ်တူၵ်းလူင်းလႆႈၸႂ် ၵၼ်ဝႆႉ ၸိူဝ်းၼၼ်ႉၼႆ သိုၵ်းမၢၼ်ႈ ပိုၼ်ၽၢဝ်ႇဝႆႉၼင်ႇၼႆ။

ၸုမ်း ISP – Myanmar  ပိုၼ်ၽၢဝ်ႇ ၼႂ်းလိူၼ်ဢွၵ်ႊထူဝ်ႊပိူဝ်ႊၼႆႉဝႃႈ ၼႂ်းၽႅၼ်ၵၢၼ်ယၼ်ႇသိုၵ်း 1027 ၼႆႉ သိုၵ်းမၢၼ်ႈ လႆႈသုမ်းပၢင်သဝ်းၵႃႉၶၢႆ ၸွမ်းလႅၼ်လိၼ် 9 ဢၼ် (ဢၼ်လႆႈငိုၼ်းၶဝ်ႈ 9 ပီႊလီႊယၼ်ႊ ဢမေႊရိၵၼ်ႊ တေႃႊလႃႊပၢႆ ၼႂ်းၶၢဝ်းတၢင်း ယိုတ်းဢႃႇၼႃႇမႃး 3 ပီပၢႆ) ၼႆႉ ဝႃႈၼႆ။

ၼႂ်းၼၼ်ႉပႃး ၵဵၵ်ႉ/လၢၼ်ႇ ၵႃႉၶၢႆတီႈလွႆၸေႊ၊ ၶျိၼ်းသူၺ်ႇႁေႃႇ (ဝဵင်းၼမ်ႉၽႃႈ) တင်း မူႇၸေႊ လႅၼ်လိၼ်တိတ်းၸပ်းမိူင်းၶႄႇ ၸိူဝ်းၼႆႉ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။