ၸဝ်ႈၼႃႈတီႈထႆး ၶဝ်ႈၵူတ်ႇထတ်း ၼႂ်းသူၼ်မၢၵ်ႇဢုၼ် တီႈၸႄႈဝဵင်းမႁႃၶျၢႆႊ ၸႄႈတွၼ်ႈသမုတ်ႊသႃႊၶွၼ် မိူင်းထႆးသေ တီႉၺွပ်းၵႂႃႇ ႁႅင်းၵၢၼ်မိူင်းမၢၼ်ႈ 10 ၵေႃႉ ဝႃႈၼႆ။
ႁႅင်းၵၢၼ်ၸိူဝ်းၼၼ်ႉ မီးဝတ်းဝႂ်တဵမ်ထူၼ်ႈယူႇသေတႃႉ ၽွင်းမိူဝ်ႈၶၢႆႉၵၢၼ် ယွၼ်ႉဢမ်ႇမီးဝႂ် ၵမ်ႉၸဝ်ႈၵၢၼ်တဵမ်ထူၼ်ႈလႄႈ ၺႃးၸဝ်ႈၼႃႈတီႈထႆး တီႉၺွပ်းၵုမ်းတူဝ်ဝႆႉ မိူဝ်ႈဝၼ်းတီႈ 04/11/2024 ၼႆႉ ၼင်ႇၼႆ။
သင်ဝႃႈ ဝတ်းဝႂ်ဢမ်ႇတဵမ်ထူၼ်ႈသေ ယူႇသဝ်းႁဵတ်းၵၢၼ်ၼႂ်းမိူင်းထႆးၸိုင် ၸွမ်းၼင်ႇ ပၵ်းပိူင်မိူင်းထႆး ၸၢင်ႈပူင်တူတ်ႈတၢမ်ႇၶွၵ်ႈလႆႈ 45 ဝၼ်း။ ဝၢႆးၼၼ်ႉ တေၺႃးသူင်ႇမႃးၶိုၼ်းမိူင်းမၢၼ်ႈၼႆ ဢူးမူဝ်းၵဵဝ်း ႁူဝ်ပဝ်ႈ ၵေႃႇမတီႇ ၾၢႆႇတူင်ႉၼိုင် ႁႅင်းၵၢၼ်မိူင်းမၢၼ်ႈ ၼႂ်းမိူင်းထႆး လၢတ်ႈဝႆႉတီႈသိုဝ်ႇၶၢဝ်ႇ RFA ၼင်ႇၼႆ။
မိူၼ်ၼႆ ပူၼ်ႉမႃး မိူဝ်ႈဝၼ်းတီႈ 1 ၼႆႉၵေႃႈ ၸဝ်ႈၼႃႈတီႈထႆး ၵူတ်ႇထတ်းတီႉၺွပ်းလႆႈ ႁႅင်းၵၢၼ်မိူင်းမၢၼ်ႈ 38 ၵေႃႉ ဢၼ်ၶၢမ်ႈလႅၼ်လိၼ်သေ ၶဝ်ႈၵႂႃႇမိူင်းထႆး လူၺ်ႈဢမ်ႇၸႂ်ႈတၢင်းၵၢၼ် ဝႃႈၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ယွၼ်ႉပၼ်ႁႃၵူႈလွင်ႈလွင်ႈသေ ၵူၼ်းမိူင်းမၢၼ်ႈ ၶဝ်ႈၵႂႃႇၼႂ်းမိူင်းထႆး လူၺ်ႈဢမ်ႇၸႂ်ႈတၢင်းၵၢၼ်ၼၼ်ႉ တိူဝ်းၼမ်မႃး ၸိူဝ်းၺႃးၸဝ်ႈၼႃႈတီႈထႆး ၵူတ်ႇထတ်းတီႉၺွပ်းၵေႃႈ ၼမ်လိူင်ႇမႃးၼႆ ၽူႈၸွႆႈထႅမ် ႁႅင်းၵၢၼ်မိူင်းမၢၼ်ႈၶဝ် လၢတ်ႈဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ