မိူင်းမၢၼ်ႈ ပိၵ်ႉဢိုတ်းဝႆႉ လွင်ႈပၼ်ၶႂၢင်ႉၶုတ်း ႁႄႈလိၼ် (မြေရှားသတ္တု)လႄႈ ၸဝ်ႈၵၢၼ်ပၢႆးမၢၵ်ႈမီးၶဝ် ၶၢတ်ႈလၢမ်းဝႆႉဝႃႈ ၵႃႈၶၼ် ႁႄႈလိၼ်လုမ်ႈၾႃႉ ၸၢင်ႈၶိုၼ်ႈသုင်ၼႆ – သိုဝ်ႇၶၢဝ်ႇ Global Times ႁၢႆးငၢၼ်းဝႆႉၼင်ႇၼႆ။

ႁႄႈလိၼ်(မြေရှားသတ္တု) ဢၼ်တေႃႉတၢင်ႇၶၢႆၸူး ၼႂ်းလွၵ်းၵၢတ်ႇလုမ်ႈၾႃႉ 50% ပၢႆၼႆႉ ပဵၼ်ဢၼ်ဢွၵ်ႇ ၼႂ်းမိူင်းမၢၼ်ႈ ႁႄႈလိၼ်ၼႆႉ ပဵၼ်သႅၼ်းဢၼ်ၶဝ်ႈပႃး ၼႂ်းၸုမ်းထၢတ်ႈႁႄႈ 17 သႅၼ်းသေ ဢဝ်ၸႂ်ႉတိုဝ်း ႁဵတ်းၾူၼ်း(smart phone) ၊ ၶွမ်ႊပိဝ်ႊတိူဝ်ႊ(computer)၊ ရူတ်ႉၵႃးၾႆးၾႃႉ၊ ၶိူင်ႈၾႆးၾႃႉ ဢၼ်ၵူၼ်းၸႂ်ႉ  တိုဝ်းလႄႈ ၶိူင်းယိပ်းၵွင်ႈၵၢင်ႇ ၸိူဝ်းၼႆႉ။

ႁႄႈလိၼ် ဢၼ်ဢွၵ်ႇၼႂ်းမိူင်းမၢၼ်ႈၼႆႉ မိူင်းၶႄႇႁပ်ႉသိုဝ်ႉသေ တေႃႉတၢင်ႇၶၢႆၶိုၼ်း တီႈၼႂ်းလွၵ်းၵၢတ်ႇ လုမ်ႈၾႃႉ။

ဢွင်ႈတီႈၶုတ်း ႁႄႈလိၼ် ဢၼ်မီးၼႂ်းပိုၼ်ႉတီႈပၢင်ဝႃႈ၊ ၸႄႈဝဵင်းၶျီႇၽူၺ်ႇ မိူင်းၶၢင်ၼႆႉ တႄႇပိၵ်းဢိုတ်း မႃး ၸဵမ်မိူဝ်ႁူဝ်လိူၼ်သႅပ်ႊထႅမ်ႊပိူဝ်ႊၼၼ်ႉ။ ဝၢႆးသေ မီးလွင်ႈၵူတ်ႇထတ်း ဢွင်ႈတီႈၶုတ်းႁႄႈလိၼ် 300 ပၢႆယဝ်ႉ တေပၼ်ၶႂၢင်ႉၶုတ်းၶိုၼ်းမိူဝ်ႈလႂ် ဢၼ်ဝႃႈၼၼ်ႉ ပႆႇလႆႈႁူႉၸွမ်း။

တႄႇဢဝ်လိူၼ်ၵျႅၼ်ႊၼိဝ်ႊရီႊထိုင် လိူၼ်သႅပ်ႊထႅမ်ႊပိူဝ်ႊ 2024 ၼႆႉ မိူင်းၶႄႇ ႁပ်ႉသိုဝ်ႉႁႄႈလိၼ် (Oxides) တီႈမိူင်းမၢၼ်ႈ သၢမ်မိုၼ်ႇတၢၼ်ႇပၢႆ (31,000) – Global Times ႁၢႆးငၢၼ်းဝႆႉၼင်ႇၼႆ။

ဢၢင်ႈဢိင် – VOA