မိူဝ်ႈၼႆႉ ဝၼ်းတီႈ 05/11/2024 ယၢမ်းဝၢႆးဝၼ်း 2 မူင်း မၢၵ်ႇလူင်တူၵ်းတီႈ ပွၵ်ႉၸၢၼ်း  1 လုၵ်ႈ ၊ တီႈဝၢၼ်ႈၼမ်ႉလုၵ်း 1 လုၵ်ႈ ၊တီႈဝဵင်းၼမ်ႉလၼ်ႈ ၸိုင်ႈတႆးပွတ်းႁွင်ႇ။

ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“မိူဝ်ႈဝၢႆးဝၼ်း 2 မူင်း မၢၵ်ႇလူင်တူၵ်းတိူဝ်ႉ လုၵ်ႈဢွၼ်ႇယိင်း ၵေႃႉၼိုင်ႈ ဢႃယု 10 ၶူပ်ႇလႄႈ ၵူၼ်းၸၢႆးလူင် ၵေႃႉၼိုင်ႈ မၢတ်ႇၸဵပ်း တေႃႈလဵဝ်သူင်ႇယူတ်းယႃတူဝ်ဝႆႉတီႈႁူင်းယႃဝႆႉ၊ ပဵၼ်မၢၵ်ႇၸုမ်းလႂ်ယိုဝ်းမႃးတႄႉ ဢမ်ႇႁူႉ”- ဝႃႈၼႆ။

သိုၵ်းၵဝ်ႈၵၢင်ႉလႄႈ သိုၵ်းမၢၼ်ႈ ၽႃႇၺႃးသၢႆသိုၵ်းၵၼ် တီႈဢၼ်ယၢၼ်ၵႆၵၼ်တင်း ဝဵင်းၼမ်ႉလၼ်ႈ 7 လၵ်းၼၼ်ႉသေပဵၼ်ပၢင်တိုၵ်းၵၼ်ဝႆႉလႄႈ ၸင်ႇယိုဝ်းမၢၵ်ႇလူင်ၶဝ်ႈမႃးၼႂ်းဝၢၼ်ႈ ၵူၼ်းပိုၼ်ႉတီႈလၢတ်ႈၼင်ႇၼႆ။

မိူဝ်ႈဝၼ်းတီႈ 29/09/2024 ယၢမ်းၵၢင်ၶမ်ႈ 9 မူင်းၶိုင်ႈသိုၵ်းမၢၼ်ႈလႄႈ သိုၵ်းၵဝ်ႈၵၢင်ႉ MNDAA ပဵၼ်ပၢင်တိုၵ်းၵၼ် တီႈဝၢၼ်ႈၼႃးမၢၵ်ႇၶေႃလႄႈ ဝၢၼ်ႈၵွင်းႁၵ်ႉ ၽွင်းၼၼ်ႉၵေႃႈ ယိုဝ်းၺႃးၵူၼ်းမိူင်းၽွင်းတိုၵ်ႉၶီႇၵႃးပၢႆႈ။ မၢတ်ႇၸဵပ်း တၢႆ 2 ၵေႃႉ ဝႃႈၼႆ။

ယၢမ်းလဵဝ် တီႈၼႂ်းဝဵင်းၼမ်ႉလၼ်ႈ ပၢင်တိုၵ်းဢမ်ႇပဵၼ်သေတႃႉ ၼႂ်းဝဵင်းသီႇပေႃႉ – လႃႈသဵဝ်ႈၼႆႉ ဝၢႆးသိုၵ်းၵဝ်ႈၵၢင်ႉ MNDAA တင်း သိုၵ်းတဢၢင်း TNLA ပဵၼ်ပၢင်တိုၵ်း ၵၼ်တင်းသိုၵ်းမၢၼ်ႈယဝ်ႉ သိုၵ်းတင်းသွင်ၾၢႆႇ တူင်ႉၼိုင်ၵႂႃႇမႃးဝႆႉ။ မိူၼ်ၼင်ႇ ႁိမ်းႁွမ်းဝဵင်းၼမ်ႉလၼ်ႈၵေႃႈ ၾၢႆႇသိုၵ်းမၢၼ်ႈ လိူဝ်သေၵႆႉယိုဝ်း ၵွင်ႈလူင်ၵႂႃႇၵူႈႁူးၵူႈတၢင်းယဝ်ႉ။ ထႅမ်ႁႅင်းသိုၵ်း ၶဝ်ႈၵုမ်းၼႂ်း ပိုၼ်ႉတီႈ။ ယွၼ်ႉၼၼ် ၵူၼ်းမိူင်းၶဝ်မႆႈၸႂ် လွင်ႈႁူမ်ႇလူမ်ႈသၢႆၸႂ်ၸဝ်ႈၵဝ်ႇ ၽွင်းဢွၵ်ႇတႃႈ ဢွၵ်ႇတၢင်း ႁဵတ်းႁႆႈႁဵတ်းသူၼ် ၸိူဝ်းၼႆႉ ဝႃႈၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)