ယၢမ်းလဵဝ် ၵူၼ်းမူႇၸေႊ ယၢပ်ႇၽိုတ်ႇႁႅင်း လႆႈဢဝ်ရူတ်ႉၵႃး ၶဝ်ႈထႅဝ်ပႂ်ႉသိုဝ်ႉၼမ်ႉမၼ်းၸိူဝ်ႉၾႆး ယွၼ်ႉပၢမ်ႉၼမ်ႉမၼ်း လႆႈတတ်းမၵ်းၼမ်ႉမၼ်းၶၢႆ။
တႄႇဢဝ် ႁၢင်လိူၼ်ဢွၵ်ႊထူဝ်ႊပိူဝ်ႊ 2024 ၼႆႉမႃး ပၢမ်ႉၼမ်ႉမၼ်းၸိူဝ်ႉၾႆး မၢင်ပၢမ်ႉ လႆႈတတ်းမၵ်း မၼ်းၶၢႆပၼ် ၵူၼ်းဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ႁဵတ်းႁႂ်ႈၵူၼ်းမိူင်းထူပ်းတၢင်း ယၢပ်ႇၽိုတ်ႇႁႅင်း တႃႇလႆႈ ၼမ်ႉမၼ်းၵႂႃႇၸႂ်ႉတိုဝ်း ၼႆယဝ်ႉ။
ၵူၼ်းမူႇၸေႊ ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢပ်ႇတႄႉဢေႃႈ။ လႆႈၶဝ်ႈထႅဝ်သေ ပႂ်ႉတၢင်းႁိုင် တေလႆႈသႂ်ႇဢမ်ႇလႆႈသႂ်ႇတႄႉ ဢမ်ႇႁူႉၶႃႈ။ သင်လႆႈမႃးၵေႃႈ ဢမ်ႇလႆႈတဵမ်ထၢင်။ ဢၼ်ႁဝ်းၶႃႈ လႆႈၵႂႃႇၶပ်ႉသေ သႂ်ႇၼႆႉ လႆႈဢဝ်ၵႃးၵႂႃႇၵူၺ်း။ ၼမ်ႉမၼ်းႁဝ်း ပေႃးသဵင်ႈၵႂႃႇ ၵႃႈႁိုဝ်ယဝ်ႉ။ ပေႃးဢဝ်ပုင်း ၵႂႃႇသႂ်ႇသမ်ႉ ဢမ်ႇလႆႈ။ ႁဝ်းတေလႆႈ ဢဝ်ၵႃးႁဝ်း ၵႂႃႇၶဝ်ႈထႅဝ်သေ သႂ်ႇမႃးဢဝ် ၸိူင်ႉၼၼ်ၵူၺ်း”- ဝႃႈၼႆ။
ဢိင်ၼိူဝ် လွင်ႈၼႆႉ ၸဝ်ႈပၢမ်ႉၶဝ် တတ်းမၵ်းၼမ်ႉမၼ်းၸၢၵ်ႈသေ ၶၢႆပၼ်ၵူၼ်းမိူင်း ၸိူင်ႉၼႆၼႆႉ မီးမႃး ၶၢဝ်းတၢင်းၼိုင်ႈဝူင်ႈယဝ်ႉ။ တႃႇတေလႆႈၸႂ်ႉၼမ်ႉမၼ်းၵႂႃႇ ၵူႈဝၼ်းၼၼ်ႉ ၵူၼ်းမိူင်း လႆႈၶဝ်ႈထႅဝ်သေပႂ်ႉသိုဝ်ႉလႄႈ ယွၼ်ႉဝႃႈၶၢဝ်း ၼႆႉသမ်ႉ ပဵၼ်ၽွင်းၵူၼ်းမိူင်းလူဝ်ႇႁဵတ်းၼႃးႁဵတ်းသူၼ် ၼႆယဝ်ႉ။
“သိုၵ်းမၢၼ်ႈ တေဢမ်ႇပၼ်ၶၢႆၼမ်ႁႃႉ တႃႇၶၢႆၼိုင်ႈဝၼ်းၼိုင်ႈဢိတ်းသမ်ႉ ပၼ်ၶၢႆယူႇ ၵူၺ်းၶဝ်ဢမ်ႇၶၢႆ ပၼ်ၼမ်ၶႃႈ။ ၶဝ်သႂ်ႇပၼ် ရူတ်ႉၶိူင်ႈ 1 လမ်း 5 ႁဵင်ပျႃး။ ၵႃးသမ်ႉ 2 မိုၼ်ႇပျႃး။ ရူတ်ႉၵႃး ၵမ်ႈၼမ် မႃးၶပ်ႉသေ ဢမ်ႇလႆႈသႂ်ႇ ၼမ်ႉမၼ်းၵေႃႈမီး။ ၼမ်ႉမၼ်းဢၼ်ၶဝ်သႂ်ႇပၼ်ႁဝ်းၼၼ်ႉ ႁေႃႈၵႂႃႇမႃး ဝၼ်းသွင် ဝၼ်းၵေႃႈ မူတ်းယဝ်ႉၶႃႈ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။
ၼႂ်းဝဵင်းမူႇၸေႊၼႆႉ မီးပၢမ်ႉၼမ်ႉမၼ်းယူႇ လၢႆပၢမ်ႉ။ ၵူၺ်းၵႃႈ ဢၼ်ပိုတ်ႇႁၢၼ်ႉသေ ၶၢႆပၼ်ၵူၼ်းမိူင်းသမ်ႉ မီးမွၵ်ႈ 5 ပၢမ်ႉၵူၺ်း။ ၸဝ်ႈရူတ်ႉၵႃး ဢၼ်ၵႂႃႇၶဝ်ႈထႅဝ်သေ ပႂ်ႉသိုဝ်ႉၼမ်ႉမၼ်းၵေႃႈ ၼိုင်ႈဝၼ်းၼႆႉ ဢမ်ႇယွမ်း 300 လမ်း။
ယၢမ်းလဵဝ် ၼမ်ႉမၼ်းၸိူဝ်ႉၾႆးၼႆႉ ဢမ်ႇၵုမ်ႇထူၼ်ႈတႃႇၵူၼ်းမိူင်းၸႂ်ႉတိုဝ်း၊ ယွၼ်ႉၼၼ် ႁဵတ်းႁႂ်ႈၵူၼ်းမိူင်းလႄႈ ၸဝ်ႈသူၼ်ၸဝ်ႈၼႃးၶဝ် ထူပ်းလွင်ႈယၢပ်ႇၽိုတ်ႇတင်းၼမ်။
