ႁိူၼ်းယေးၵူၼ်းမိူင်းပၢင်လွင်း ၺႃးၾႆးမႆႈဢမ်ႇယွမ်း 3 ဝၢၼ်ႈ ၵူၼ်းမိူင်းႁၢမ်းတီႈယူႇၵိၼ်

ႁိူၼ်းယေးၵူၼ်းဝၢၼ်ႈ ၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ၺႃးၾႆးမႆႈလူႉသုမ်း ဢမ်ႇယွမ်း 3 ဝၢၼ်ႈ ႁဵတ်း ႁႂ်ႈၵူၼ်းမိူင်းႁၢမ်းႁႅၵ်းတီႈယူႇ။ ၸဝ်ႈႁိူၼ်းသမ်ႉ ပၢႆႈဝႄႈမူၵ်းသွၼ်ႈဝႆႉတၢင်ႇတီႈ ၸဵမ်မိူဝ်ႈ ၶၢဝ်းပၢင်တိုၵ်း ပဵၼ်ႁႅင်းလႄႈ ဢမ်ႇမီးၸဝ်ႈႁိူၼ်းယူႇပႂ်ႉ။ ယၢမ်းလဵဝ် ၵူၼ်းဝၢၼ်ႈ တေပွၵ်ႈမိူဝ်းတူၺ်း ၵေႃႈဢမ်ႇႁတ်း လႆႈၵူဝ်ၽေးၵွင်ႈၽေးမၢၵ်ႇ။

ႁူဝ်လိူၼ်ၼူဝ်ႊဝႅမ်ႊပိူဝ်ႊ 2024 ၼႆႉၵူၺ်း ဝၢၼ်ႈသေႃလမ်၊ ဝၢၼ်ႈႁူဝ်ဝူဝ်း၊ ဝၢၼ်ႈလွႆၵဵင်ႈ၊ ဝၢၼ်ႈလိၼ်ၶၢၼ် ၸိူဝ်းယူႇ ၸွမ်းၶႅပ်ႇဝဵင်းပၢင်လွင်း ၸိုင်ႈတႆးပွတ်းၸၢၼ်း တိတ်းၸပ်းလႅၼ်လိၼ်တႆး – ယၢင်းလႅင် ၺႃးၾႆးမႆႈလူႉသုမ်းၼမ် မၢင်ၸိူဝ်းၵေႃႈဝႃႈ ၺႃးၸုတ်ႇၽဝ် မၢင်ၸိူဝ်းၵေႃႈဝႃႈ ၺႃးမၢၵ်ႇလူင် သိုၵ်းမၢၼ်ႈတူၵ်းသႂ်ႇလႄႈ ၾႆးမႆႈ။

ၸဵမ်မိူဝ်ႈ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဢွၼ်ၼမ်းတပ်ႉသိုၵ်း ယိုတ်းဢႃႇၼႃႇၸိုင်ႈမိူင်းမႃးၼႆႉ ပၢင်တိုၵ်းပဵၼ်တူဝ်ႈၸိုင်ႈမိူင်း။ တီႈလႅၼ်လိၼ်တႆး – ယၢင်းလႅင်ၵေႃႈ ပၢင်တိုၵ်းသိုၵ်းသိူဝ်တႅၵ်ႇၼၼ်ႈ။

သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ပိုတ်းယိုဝ်း တပ်ႉၽွမ်ႉႁူမ်ႈလုၵ်ႉၽိုၼ်ႉ မိူင်းယၢင်းလႅင် မႃးၶိူဝ်းယႂ်းသေ ၾၢႆႇသိုၵ်းမၢၼ်ႈသမ်ႉ ၸႂ်ႉၶိူင်ႈမိၼ်တိုၵ်းၸွႆႈ၊ ပွႆႇမၢၵ်ႇလူင်ၸွႆႈလႄႈ တင်းသွင်ၾၢႆႇမီးလွင်ႈ တူၵ်းသုမ်းၼမ်၊ ႁိူၼ်းယေး ၵူၼ်းမိူင်းၵေႃႈ ၺႃးမၢၵ်ႇလူင်တူၵ်းသႂ်ႇ ၾႆးမႆႈလူႉၵွႆၸွမ်းၼမ်။

လွင်ႈၾႆးမႆႈႁိူၼ်းယေး ၵူၼ်းမိူင်းတီႈၼႂ်းၸႄႈဝဵင်းပၢင်လွင်းၼႆႉ ပဵၼ်မႃးယူႇၶိူဝ်းယႂ်းသေတႃႉ လွင်ႈၵပ်းသိုပ်ႇၵပ်းသၢၼ် ယၢပ်ႇၽိုတ်ႇလႄႈ ၵူၼ်းတၢင်းၼွၵ်ႈ ဢမ်ႇမီးတိုဝ်ႉတၢင်းလႆႈႁူႉၸွမ်း။ ၵူၼ်းၸၢႆး ယူႇဝဵင်းပၢင်လွင်း ၵေႃႉၼိုင်ႈ လၢတ်ႈ ၼႄဝႆႉၼင်ႇၼႆ –

“သိုၵ်းမၢၼ်ႈၵေႃႈ ဢဝ်မၢၵ်ႇမႃးပွႆႇယူႇတိၵ်းတိၵ်းလႄႈ ၵူၼ်းဝၢၼ်ႈၵေႃႉလႂ် တေႁတ်းမိူဝ်းတူၺ်း။ ၶဝ်ပၢႆႈၸဵမ်မိူဝ်ႈပဵၼ်ပၢင်တိုၵ်းပုၼ်ႉလူး။ ပေႃးၵူၼ်းဝၢၼ်ႈမိူဝ်းသမ်ႉဝႃႈ တဵၵ်းၸႂ်ႉႁဵတ်းသိုၵ်း PNO ၼႆ ဢမ်ႇမီးၽႂ်မိူဝ်းလေႃႇ ၽႂ်ၵေႃႈၵူဝ်တၢႆ ၼေႃႈ၊ ၽႂ်ဢမ်ႇပႃးသၢႆၸႂ် သွင်သဵၼ်ႈမႃးလူး”- ဝႃႈၼႆ။

ၵူၼ်းမိူင်း ၸိူဝ်းၺႃးၾႆးမႆႈႁိူၼ်း ၸိူဝ်းၼႆႉ ပၢႆႈၸဵမ်မိူဝ်ႈ တႄႇပဵၼ်ပၢင်တိုၵ်း ပၢႆႈသွၼ်ႈယူႇဝႆႉၸွမ်း ဝၢၼ်ႈလွႆႁူဝ်တိုင်း၊ ဝၢၼ်ႈလွႆပဝ်း၊ ဝၢၼ်ႈလိၼ်ပူၵ်ႇတႅၵ်ႇ၊ ဢၼ်မီးၾၢႆႇဢွၵ်ႇ ၼွင်ႁၢႆးယႃႈလႄႈ ၸိူဝ်းပၢႆႈ ၵႂႃႇမူၵ်းသွၼ်ႈဝႆႉတီႈ ဝဵင်းပၢင်လွင်း၊ ဝၢၼ်ႈသီႇၵိပ်ႇ ၼႆႉၵေႃႈ မီးထႅင်ႈၼမ်။ ဢၼ်ပၢႆႈၵႂႃႇတၢင်းဝဵင်းယွင် ႁူၺ်ႈ၊ ထိုင်ၵႂႃႇတၢင်းဝဵင်းၼမ်ႉၸၢင် ၵေႃႈမီး။

ဢၼ်ၵူၼ်းမိူင်း လႆႈၵိုင်ႉၵၢင်ႉဢွၵ်ႇပၢႆႈၼမ်ၼမ် ပဵၼ်ပၢႆပီ 2023 ၼႆႉ ယွၼ်ႉသိုၵ်းမၢၼ်ႈ ပျီႇတူႉၸိတ်ႉပဢူဝ်းလႄႈ တင်းၸုမ်းလုၵ်ႉၽိုၼ်ႉယၢင်းလႅင် ၶဵင်ႈၶႅင်ပိုတ်းယိုဝ်းတိုၵ်းတေႃး တေႃႇၵၼ်ႁႅင်း။ ၽွင်း မိူဝ်ႈပၢႆႈၼၼ်ႉ ယွၼ်ႉဢမ်ႇတၼ်း ႁၢင်ႈႁႅၼ်းတူဝ်၊ ၵိုင်ႉၵၢင်ႉလႆႈပၢႆႈလႄႈ ပဵၼ်ဢၼ်တူၵ်းၵိၼ်းတႄႉ တႄႉယဝ်ႉၼႆ ၼၢင်းယိင်း ၵူၼ်းမိူင်းဝဵင်းပၢင်လွင်း လၢတ်ႈၼႄဝႆႉၼင်ႇၼႆ –

“မႄႈပုမ်လူင် လႆႈပၢႆႈၽေးသိုၵ်း ၵႂႃႇၵိူတ်ႇလုၵ်ႈ ဝၢၼ်ႈပိူၼ်ႈမိူင်းပိူၼ်ႈ ၵေႃႈမီးဢေႃႈ။ ၵမ်ႈၽွင်ႈပဵၼ် ဢမ်ႇယူႇလီ ပဵၼ် ၵိၼ်းႁႅင်း၊ ၵႂႃႇတၢႆၽၢၵ်ႇ မီးယူႇတီႈဝၢၼ်ႈလွႆပဝ်း ၸိူဝ်းၼႆႉၵေႃႈမီး။ ၵမ်ႈၽွင်ႈ ၶႅၼ်ႁၵ်းၶႃႁၵ်းသေ လုၵ်ႉဢမ်ႇလႆႈ ၸိူဝ်း ၼႆႉ ၵႂႃႇမီးတၢင်းသီႇၵိပ်ႇ ၸိူဝ်းၼႆႉၵေႃႈမီး” – ဝႃႈၼႆ။

ဝၢၼ်ႈဢၼ်တိတ်းၸပ်းၵၼ်တၢင်း ဝၢၼ်ႈလွႆၵဵင်ႈ မိူၼ်ၼင်ႇ ဝၢၼ်ႈလိၼ်ၶၢၼ်၊ ၼမ်ႉၽႃမူ၊ ႁူဝ်ဝူဝ်း၊ ၼွၵ်ႇဝူဝ်း၊ ဝၢၼ်ႈသေႃလမ်၊ ဝၢၼ်ႈလွႆၸၢင်ႉ၊ ဝၢၼ်ႈတေႃႇပေႃႇၵလႄး (ဝၢၼ်ႈယၢင်းလႅင်) ၸိူဝ်းၼႆႉၵေႃႈ ၼိုင်ႈဝၢၼ်ႈလႂ် လင်ၶႃးႁိူၼ်း မီးၼပ်ႉႁူဝ်ပၢၵ်ႇသေ ယၢမ်းလဵဝ် ဢမ်ႇမီးၽႂ်ႁတ်းယူႇသဝ်း  ပၢႆႈၵႂႃႇၵေႃႉ တီႈၵေႃႉတၢင်း။ ၸိူဝ်းၵိုတ်းပႂ်ႉ သူၼ်ႁႆႈၼႃးတႄႉ မီးယူႇၵမ်ႈၽွင်ႈ ယွၼ်ႉဝႃႈ ၽုၵ်ႇမၢၵ်ႇၶဝ်ႈတဝ်ႈၼမ်ႉ ဝႆႉ။

ယၢမ်းလဵဝ် ၼႂ်းဝၢၼ်ႈၼႂ်းဢိူင်ႇၵေႃႈ ပဵၼ်ၽိုၼ်းပဵၼ်ၾႆးမူတ်းယဝ်ႉလႄႈ တေႃႈၼင်ႇ ပဵၼ်ၶၢဝ်းၵဵပ်းမၢၵ်ႇၶဝ်ႈတဝ်ႈၼမ်ႉၵေႃႈ လႆႈၵူဝ်သိုၵ်းသိူဝ် ဢမ်ႇႁတ်းၵႂႃႇၵဵပ်း ဢမ်ႇႁတ်းၵႂႃႇဢဝ်သေ ၵႃႈလႆႈပၢႆႈလႆႈၼီၼႆ ၼၢင်းယိင်း ၵူၼ်းမိူင်းဝဵင်းပၢင်လွင်း ၵေႃႉၼိုင်ႈ လၢတ်ႈၼႄၼင်ႇၼႆ –

“တၢင်းဝၢၼ်ႈၶႃႈၶဝ်ၼႆႉ သူၼ်ၶဝ်ႈၵၢပ်ႇၸိူဝ်းၼႆႉၵေႃႈ ထိုင်ၽွင်းလူဝ်ႇၵၢၼ်ႉ၊ သိုၵ်းမၢၼ်ႈလႄႈ ၸုမ်းပျီႇ တူႉၸိတ်ႉပဢူဝ်း PNO ၶဝ် ဢဝ်ၸၢၵ်ႈပၢတ်ႇၶဝ်ႈ မႃးပၢတ်ႇဢဝ်ၵႂႃႇမူတ်းယဝ်ႉၼႆဢေႃႈ။ ယဝ်ႉၵေႃႈ တေႃႉၵႂႃႇၶၢႆတၢင်းဝဵင်းပၢင်လွင်း ၼႆဢေႃႈ။ ပႃးၸဵမ်ၶူဝ်းၼႂ်းႁိူၼ်းယေးၵူၼ်းဝၢၼ်ႈၵူၼ်းသူၼ်ၵေႃႈ ဢၼ်ၶဝ်ဢဝ်ၶၢႆလႆႈမၼ်း ၸိူဝ်းၼႆႉ ၶဝ်လၵ်ႉၵႂႃႇမူတ်း”- ဝႃႈၼႆ။  

ႁိူၼ်းယေး ဢၼ်ၺႃးၾႆးမႆႈ ၸိူဝ်းၼႆႉ မၢင်ၸိူဝ်းၵေႃႈဝႃႈ ပဵၼ်ၸုမ်းပျီႇတူႉၸိတ်ႉပဢူဝ်း PNO ၶဝ်ႈၽဝ်၊ မၢင်ၸိူဝ်း ၵေႃႈဝႃႈ ပဵၼ်ၸုမ်း PDF မႃးၽဝ်။ ၾၢႆႇၼိုင်ႈၵေႃႈ သိုၵ်းမၢၼ်ႈသမ်ႉ ပွႆႇၶၢဝ်ႇဢွၵ်ႇ ဝၼ်းတီႈ 30/10/2024 ၼႂ်းၶျွင်ႉတႄႊလီႊၵရမ်ႊ Ko Thet ၼၼ်ႉဝႆႉဝႃႈ PDF ၸီႉသင်ႇ ႁႂ်ႈလုၵ်ႈၸုမ်းၶဝ်ၸုတ်ႇ ၽဝ်ႁိူၼ်းယေး ၵူၼ်းမိူင်းၾၢႆၶုၼ် ၸိူဝ်းၼႆႉၵေႃႈမီးဝႆႉလႄႈ တီႈပၢင်လွင်းၼႆႉၵေႃႈ ႁဵတ်းႁႂ်ႈ တင်းသွင် ၾၢႆႇ ၶဵင်ႇၼႄးတၢင်းၽိတ်းၵၼ်ဝႆႉၼႆ ၵူၼ်းဝဵင်းပၢင်လွင်းၵေႃႉၼိုင်ႈလၢတ်ႈ။

ၵဵဝ်ႇလူၺ်ႈလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်တိတ်းတေႃႇၸူး ၸုမ်းပျီႇတူႉၸိတ်ႉပဢူဝ်း PNO သေတႃႉ ၵပ်းသိုပ်ႇၸူး ဢမ်ႇလႆႈ။

သိုဝ်ႇၶၢဝ်ႇ ပိုၼ်ႉတီႈၶမ်းသႃးငၢဝ်းဢွၵ်ႇဝႆႉဝႃႈ လွင်ႈဝႃႈ PDF ၸႂ်ႉၽဝ်ႁိူၼ်းၼႆၼၼ်ႉ ပဵၼ်ၶၢဝ်ႇပွမ်ၵူၺ်း ဝႃႈၼႆ။