ၶၢဝ်းတၢင်းလိူၼ်ဢွၵ်ႊထူဝ်ႊပိူဝ်ႊမႃးၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းပွႆႇမၢၵ်ႇ၊ ၸႂ်ႉၶိူင်ႈၵွင်ႈယႂ်ႇ လၢမ်းယိုဝ်း ၼႂ်းၸႄႈဝဵင်းၼွင်ၶဵဝ်၊ သီႇပေႃႉ၊ ၼမ်ႉသၼ်ႇလႄႈ ၵူတ်ႉၶၢႆ ၸိုင်ႈတႆးပွတ်းႁွင်ႇ ၼႂ်းၼႃႈ တီႈ ၸုမ်းသိုၵ်းတဢၢင်း ယိုတ်းၵုမ်း ၼၼ်ႉ ၵူၼ်းမိူင်းလူႉတၢႆ 34 ၵေႃႉ၊ မၢတ်ႇၸဵပ်း 87 ၵေႃႉၼႆ TNLA ပိုၼ်ၽၢဝ်ႇဝႆႉ ၼႂ်းဝၼ်းတီႈ 3 ၼႆႉၼင်ႇၼႆ။
ၼႂ်းလိူၼ်ဢွၵ်ႊထူဝ်ႊပိူဝ်ႊၼႆႉ တီႈၸႄႈဝဵင်းၼွင်ၶဵဝ် ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇသေ ၵူၼ်းမိူင်းလူႉတၢႆ 27 ၵေႃႉ ပဵၼ်ၸၢႆး 13 ၵေႃႉလႄႈ ယိင်း 14 ၵေႃႉ။ လိူဝ်ၼၼ်ႉ ၵူၼ်းမိူင်းမၢတ်ႇၸဵပ်းထႅင်ႈ 72 ၵေႃႉ။ ၼႂ်းၸႄႈဝဵင်းၼမ်ႉသၼ်ႇၵေႃႈ ၵူၼ်းမိူင်း လူႉတၢႆ 6 ၵေႃႉ ပဵၼ်ၸၢႆး 5 ၵေႃႉလႄႈ ယိင်း 1 ၵေႃႉ၊ မၢတ်ႇၸဵပ်းထႅင်ႈ 4 ၵေႃႉ ဝႃႈၼႆ။
မိူၼ်ၼႆ တီႈၸႄႈဝဵင်းသီႇပေႃႉၵေႃႈ ၵူၼ်းမိူင်းၺႃးၸၢၵ်ႇမၢၵ်ႇသိုၵ်းမၢၼ်ႈသေ လူႉတၢႆ 3 ၵေႃႉ ပဵၼ်ၵူၼ်းၸၢႆး 2 ၵေႃႉလႄႈ ၵူၼ်းယိင်း ၵေႃႉၼိုင်ႈ၊ မၢတ်ႇၸဵပ်းထႅင်ႈ 9 ၵေႃႉ။ ၼႂ်းၸႄႈဝဵင်းၵူတ်ႉၶၢႆသမ်ႉ ၵူၼ်းၸၢႆးၵေႃႉၼိုင်ႈ ၺႃးၸၢၵ်ႇမၢၵ်ႇ မၢတ်ႇၸဵပ်း ဝႃႈၼႆ။
လိူဝ်ၼၼ်ႉ ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇ ၸႂ်ႉၶိူင်ႈၵွင်ႈယႂ်ႇလၢမ်းယိုဝ်းသေ ႁိူၼ်းယေး ၵူၼ်းမိူင်း 100 ပၢႆလႄႈ ဝတ်ႉဝႃးၽႃသိူဝ်ႇ 2 လင် ၺႃးၸၢၵ်ႇမၢၵ်ႇ လူႉၵွႆၵႂႃႇၼႆ သိုၵ်းတဢၢင်း TNLA ပိုၼ်ၽၢဝ်ႇဝႆႉ ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ