ပီၼႆႉ ၶဝ်ႈၼႃး တီႈဝဵင်းလႃႈသဵဝ်ႈ ဢမ်ႇဢွၵ်ႇၼမ် ၸဝ်ႈၼႃး ဢွၼ်ၵၼ်ႁူပ်ႉတၢင်းယၢပ်ႇၽိုတ်ႇႁႅင်း ယွၼ်ႉပၢင်တိုၵ်းသိုၵ်းသိူဝ်။
တႄႇဢဝ် ႁၢင်လိူၼ်ဢွၵ်ႊထူဝ်ႊပိူဝ်ႊ 2024 ၼႆႉမႃး ပဵၼ်ၽွင်း လူဝ်ႇဢဝ်မၢၵ်ႇၶဝ်ႈတဝ်ႈၼမ်ႉယဝ်ႉလႄႈ ၸဝ်ႈၼႃး တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ထူပ်းတၢင်းယၢပ်ႇၽိုတ်ႇ ယွၼ်ႉပၢင်တိုၵ်းသိုၵ်းသိူဝ်သေ ဢမ်ႇလႆႈလုမ်းလႃးတူင်ႈ ၼႃးလီ လႆႈၽုၵ်ႇသွမ်ႈၶဝ်ႈတူၵ်းလႃႈတူၵ်းလိုၼ်းႁႅင်းလႄႈ ပီၼႆႉ ဢမ်ႇလႆႈၶွၼ်ႈၶဝ်ႈ ဢွၼ်ၵၼ်လူႉသုမ်းၼမ် ၼႆယဝ်ႉ။
ၸဝ်ႈၼႃး ၽူႈယိင်း ဢႃယု 40 ပၢႆ ၵေႃႉၼိုင်ႈ တီႈဝဵင်းလႃႈသဵဝ်ႈ လၢတ်ႈၽူႈတွႆႇႁွၵ်ႈဝႃႈ – “ပီၼႆႉ သုမ်းတႄႉသုမ်းဝႃႈ ၼၼ်ႉယဝ်ႉ။ ၽိူဝ်လိူဝ်လႆႈပၢႆႈပၢင်တိုၵ်းယဝ်ႉ ၶဝ်ႈသမ်ႉဢမ်ႇလႆႈၼမ် တႃႇမိူဝ်းၼႃႈတႄႉ တေ ႁဵတ်းႁိုဝ် ဢမ်ႇႁူႉ။ ၵူႈပီ ၸဝ်ႈၼႃး ၸိူဝ်းလႆႈ 30 ၸေႃးၼၼ်ႉ ပီၼႆႉလႆႈ 12 ၸေႃး။ ၸိူဝ်းယၢမ်ႈလႆႈ 12 ၸေႃးသမ်ႉ လႆႈ 3 ၸေႃး ၸိူင်ႉၼၼ် ၵူၺ်းၶႃႈဢေႃႈ”- ဝႃႈၼႆ။
ယွၼ်ႉၽႅၼ်ယၼ်ႇသိုၵ်း 1027 ၼႆႉသေ ႁဵတ်းႁႂ်ႈၵူၼ်းလႃႈသဵဝ်ႈ ပၢႆႈၽေးသိုၵ်း တင်းၼမ်လၢႆ ယဝ်ႉၵေႃႈ တုမ်ႉတိူဝ်ႉ ၸဝ်ႈသူၼ်ႁႆႈၼႃး ဢမ်ႇၸၢင်ႈလုမ်းလႃး တူၺ်းထိုင်လႆႈလီၵေႃႈ ပိူင်ၼိုင်ႈ လိူဝ်ၼၼ်ႉ မူင်ႈမႅင်းၶူပ်းယႃႉတူၼ်ႈၶဝ်ႈ ၸိူဝ်းၼႆႉၵေႃႈ ပိူင်ၼိုင်ႈ။
“ယွၼ်ႉပၢင်တိုၵ်း ၶဝ်ၼႆႉသေ ႁဝ်းၶႃႈ လႆႈၽုၵ်ႇသွမ်ႈၼႃးတူၵ်းလိုၼ်း၊ ႁဵတ်းႁႂ်ႈတူၼ်ႈၶဝ်ႈၵႄႇ ႁိုင် 40 ဝၼ်း ပၢႆယဝ်ႉ ၸင်ႇတေလႆႈၽုၵ်ႇသွမ်ႈ။ ထိုင်တူၼ်ႈၶဝ်ႈယႂ်ႇမႃး မူင်ႈမႅင်းၶူပ်းၼမ် ယွၼ်ႉဢမ်ႇလႆႈဝၢၼ်ႇၽုၼ်ႇ၊ ဢမ်ႇတၼ်းမၢႆယိူဝ်ႈယႃႈ၊ ဢမ်ႇလႆႈသၢင်းၼမ်ႉမၼ်းဢိမ်ႇဢိမ်ႇလႄႈ ၵွပ်ႈၼႆ တူၼ်ႈၶဝ်ႈတၢႆ၊ ၽိူၵ်ႇ၊ ႁူင်းၶဝ်ႈဢမ်ႇမၢၵ်ႈဢမ်ႇဢွၵ်ႇ ဢဝ်ပဵၼ်လိပ်ႈပဵၼ်ၽၢင်း ဢမ်ႇလႆႈၶွၼ်ႇၶဝ်ႈၼၼ်ႉၶႃႈယဝ်ႉ”- ၸဝ်ႈၼႃး ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
ထႅင်ႈၾၢႆႇၼိုင်ႈ ဢၼ်ၸဝ်ႈၼႃး တုမ်ႉတိူဝ်ႉႁႅင်းသမ်ႉ လွင်ႈလူင်းတိုၼ်းလၢင်း မိူၼ်ၼင်ႇ – သွမ်ႈၼႃး၊ ပၢတ်ႇၶဝ်ႈ၊ ပုမ်ႇၶဝ်ႈ၊ ပေႃႉၶဝ်ႈ ၸိူဝ်းၼႆႉ ပီၼႆႉ လႆႈၸၢင်ႈၵူၼ်း တေႃႇဝၼ်း ၼိုင်ႈၵေႃႉလႂ်လႆႈပၼ် 20,000 ပျႃး၊ ပီၵၢႆသမ်ႉ လႆႈၸၢင်ႈ ၵူၼ်း တေႃႇဝၼ်းၼိုင်ႈၵေႃႉသမ်ႉ 10,000 ပျႃး ၵွပ်ႈၼႆလႄႈ ၵႃႈၸၢင်ႈၼႆႉ ပုင်ႈၶိုၼ်ႈမႃး ပဵၼ်ၼိုင်ႈပုၼ်ႈ ဝႃႈၼႆ။
ယၢမ်းလဵဝ် ၵူၼ်းၼုမ်ႇသမ်ႉ ဢွၼ်ၵၼ်ပၢႆႈဢွၵ်ႇမိူင်း ၵႂႃႇတၢင်းမိူင်းထႆး၊ မိူင်းၶႄႇ၊ ၸွမ်းလႅၼ်လိၼ်၊ ဝဵင်းလိူဝ်ႇ၊ တႃႇၵုင်ႈ ၸိူဝ်းၼႆႉၼမ် တႃႇၵူၼ်းႁဵတ်းၵၢၼ် သူၼ်ႁႆႈၼႃးတႄႉ ဢမ်ႇၶႂ်ႈမီးယဝ်ႉ ဢၼ်ၵိုတ်းယူႇ ဝႆႉႁိူၼ်းသေ တေပဵၼ်ၵူၼ်းထဝ်ႈ ၵူၼ်းႁၢတ်ႈ ၸိူင်ႉၼၼ်ၵူၺ်း ဝႃႈၼႆ။
ၼႂ်းပီ 2024 ၼႆႉ တူင်ႈႁႆႈၼႃး ၵူၼ်းမိူင်းလႃႈသဵဝ်ႈ ဢၼ်ႁၢမ်းသေ ဢမ်ႇလႆႈၽုၵ်ႇသွမ်ႈ ယွၼ်ႉပၢင်တိုၵ်းၼႆႉ ၼိုင်ႈဝၢၼ်ႈလႂ် ဢမ်ႇယွမ်း 4-5 တူင်ႈ။ ၵမ်ႈၼမ် ပဵၼ်တၢင်းပွတ်းမိူင်းတဵမ်၊ ႁူဝ်ပိုၵ်ႉ၊ မိူင်းယၢင်းလႄႈ ၸွမ်းႁိမ်းသၢပ်ႇဝဵင်း ၸိူဝ်းၼႆႉ – ၵူၼ်းဝဵင်းလႃႈသဵဝ်ႈလၢတ်ႈ။
တီႈဝဵင်းလႃႈသဵဝ်ႈၼႆႉ သိုၵ်းၵဝ်ႈၵၢင်ႉ တႄႇၶဝ်ႈတိုၵ်းႁၢဝ်ႈႁႅင်း လွပ်ႈသွင် ၼႂ်းၽႅၼ်ယၼ်ႇသိုၵ်း 1027 ၼႆႉ မိူဝ်ႈဝၼ်းတီႈ 02/07/2024 ယၢမ်းၵၢင်ၶိုၼ်း 11:45 မူင်းသေ ထိုင်မႃးဝၼ်းတီႈ 03/10/2024 ၼႆႉ ၸင်ႇယိုတ်းၵုမ်းလႆႈ ဝဵင်းလႃႈသဵဝ်ႈမႃး – ၵူၼ်းပိုၼ်ႉတီႈလၢတ်ႈ။
တႄႇဢဝ် ဝၼ်းတီႈ 30/08/2024 ၼၼ်ႉမႃး သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ တီႈဝဵင်းလႃႈသဵဝ်ႈ ႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ် မီးၶၢဝ်းတၢင်းသွင်လိူၼ်ပၢႆယဝ်ႉ ဝႃႈၼႆ။
