မိူဝ်ႈၼႆႉ ဝၼ်းတီႈ 03/11/2024 ယၢမ်းၵၢင်ဝၼ်းမွၵ်ႈ 12 မူင်း ၾႆးမႆႈႁွင်ႈၼွၼ်းၵူၼ်းႁဵတ်းၵၢၼ် တီႈႁၢၼ်ႉ V8 KTV ပွၵ်ႉၵွင်းမူးတူင်ႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ဝႃႈၼႆ။
ၵူၼ်းမူႇၸေႊ ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၾႆးမႆႈ ႁွင်ႈၼွၼ်းၵူၼ်း ႁဵတ်းၵၢၼ် KTV ၼၼ်ႉ ၼႂ်းႁွင်ႈၼၼ်ႉ မီးဝႆႉၼမ်ႉမၼ်းထၢတ်ႈသီႇ 4-5 ပုင်း၊ ယဝ်ႉၵေႃႈ တဝ်ႈၼမ်ႉဢွၼ်ႇ ၸိူဝ်းၼႆႉထႅင်ႈ လႅပ်ႈၶဝ်တေၶၢႆၼမ်ႉမၼ်းၸၢၵ်ႈႁိုဝ် ဢမ်ႇႁူႉ။ ၵူၼ်းယူႇတီႈ ႁွင်ႈၼွၼ်းၼၼ်ႉ။ လွင်ႈၼႆႉ ႁဵတ်းႁိုဝ်မႆႈတႄႉ ပႆႇလႆႈႁူႉငဝ်ႈႁၢၵ်ႈမၼ်းလီလီၶႃႈ။ ၶူဝ်းၶွင်ၼႂ်းႁွင်ႈၼၼ်ႉ ဢမ်ႇတၼ်းလႆႈသင် ၼႆၶႃႈဢေႃႈ”- ဝႃႈၼႆ။
ဢိင်ၼိူဝ် လွင်ႈၾႆးမႆႈၼႆႉသေ ယွၼ်ႉသင်လႄႈမႆႈ ယဝ်ႉၵေႃႈ လွင်ႈလူႉသုမ်းတင်းမူတ်းမီးၵႃႈႁိုဝ် ၼႆၸိူဝ်း ၼႆႉ ယင်းပႆႇႁူႉၶေႃႈမုလ်း ႁူဝ်ယွႆႈမၼ်းတႅတ်ႈတေႃး။
ၼႂ်းလိူၼ်ဢွၵ်ႊထူဝ်ႊပိူဝ်ႊ ပူၼ်ႉမႃးၼႆႉ တီႈဝဵင်းမူႇၸေႊၼႆႉၵူၺ်း မီးလွင်ႈၾႆးမႆႈမႃး သွင်ပွၵ်ႈယဝ်ႉ။ မိူဝ်ႈ ဝၼ်းတီႈ 17/10/2024 ယၢမ်းၵၢင်ၶမ်ႈ 8 မူင်း ၼၼ်ႉၵေႃႈ ၾႆးမႆႈႁွင်ႈသဝ်း တီႈလိုဝ်ႈၶွင်ၽူႈႁၢပ်ႇၵၢၼ် ၼႂ်းႁူင်းယႃမူႇၸေႊ တႃႇ ႁွင်ႈသဝ်း 3 ႁွင်ႈ လူႉသုမ်း ဢမ်ႇယွမ်း 30 သႅၼ်ပျႃး။ မိူဝ်ႈဝၼ်းတီႈ 06 ယၢမ်းၵၢင်ၼႂ် 10 ၾႆးမႆႈႁိူၼ်းယေး ၵူၼ်းမိူင်း တီႈၵွင်းလွႆသူၺ်ႇၵျွင်း ပွၵ်ႉၼိူဝ် သွင်လင်တိတ်းၵၼ် ၶူဝ်းႁိူၼ်းယေး ဢမ်ႇတၼ်းလႆႈသင် ထုၵ်ႇၾႆးမႆႈမူတ်း။
လိူဝ်ၼၼ်ႉ မိူဝ်ႈဝၼ်းတီႈ 31/10/2024 ယၢမ်းၵၢင်ၶမ်ႈမွၵ်ႈ 8 မူင်း ၾႆးမႆႈႁိူၼ်းယေးမေႃယႃ တေႃႇၼႃႇၼူး (သြႃႇမသမ်းၶဵမ်) တီႈပွၵ်ႉ 1 ဝဵင်းလၢႆးၶႃႈ ၸိုင်ႈတႆးပွတ်းၸၢၼ်း ၼၼ်ႉၵေႃႈ ဢမ်ႇတၼ်းလႆႈသင် ယွၼ်ႉၾႆးတဵၼ်းလူမ်ႉ ၼႆယဝ်ႉ။
