ၼႂ်းလိူၼ်ဢွၵ်ႊထူဝ်ႊပိူဝ်ႊ ဝၼ်းတီႈ 17-18 ၸွမ်သိုၵ်းလူင်ၵမ်ႇသျွင်ႇ ၵေႃႉပဵၼ်ၵႅမ်ႁူဝ်ပဝ်ႈ KIA လႆႈ ၵႂႃႇႁူပ်ႉ တိူင်ႉသျီႊၸွၼ်ႊ (တဵင်ႉသျီႊၵျွၼ်ႊ) တူဝ်တႅၼ်းၶိုၵ်ႉတွၼ်းၶွင်ၶႄႇ ၵဵဝ်ႇလိူင်ႈဢေးသျႃးၼၼ်ႉ တမ်ႈတီႈမိူင်းလႃႈၸၢၼ်းတႃႊ။ ၾၢႆႇၶႄႇတုၵ်းယွၼ်း ႁႂ်ႈၵိုတ်းယိုတ်း လွင်ႈပိုတ်းတိုၵ်း ၸွမ်းလႅၼ် လိၼ်မိူင်းသွင်ၾၢႆႇ ဢၼ်ပဵၼ်ၼႃႈတီႈ NDAK ၸၢဝ်းရဝၢင်ႇ ႁူမ်ႈမိုဝ်းသိုၵ်းမၢၼ်ႈသေ ၵုမ်းၵမ်။

ၵူၺ်းၵႃႈ ၾၢႆႇ KIA ဢမ်ႇယွမ်းယိုၼ်ဝႃႈ တေၵိုတ်း “ယွၼ်ႉလႆႈႁႅၼ်းသိုၵ်း လေႃႇတိုၵ်းယူႇယဝ်ႉလႄႈ တေၵိုင်ႉၵၢင်ႉၵိုတ်းဢမ်ႇၸၢင်ႈ၊ ၶႅၼ်းတေႃႈ ပွင်ႇၸႂ်ပၼ်သေၵမ်း” ဝႃႈၼႆသေ သိုပ်ႇတိုၵ်းတေႃႇပေႃး ၽဵဝ်ႈလႆႈ တပ်ႉပႂ်ႉလႅၼ်လိၼ်မူတ်းပိတ်းတင်းသၢမ်ဢၼ်ယဝ်ႉ။

ၾၢႆႇၶႄႇ လႅပ်ႈတေဢမ်ႇႁၢၼ်ႉၸႂ်လႄႈ ပွႆႇတပ်ႉႁူမ်ႇလူမ်ႈ မႃးပၵ်းၼႂ်းပၢင်ဝႃႈ ဢၼ်ပဵၼ်လႅၼ်လိၼ် ၾၢႆႇမိူင်းၶႄႇ သေဢမ်ႇၵႃး ပူင်ႁွင်ႉၸွမ်သိုၵ်းလူင် N. Bang La ႁႂ်ႈၵႂႃႇၵႄႈၶႆ ၼႂ်းဝၼ်းဢႃးတိတ်ႉၼႆႉ ၼႆယဝ်ႉ။

ၸုမ်းၶၢင် KIA ဢၼ်ဢဝ်ၵူၼ်းမိူင်းပဵၼ်ယႂ်ႇ၊ ဢၼ်ဢမ်ႇယၼ်ၼိူဝ် ၼႃႈလိၼ်လွၵ်းလဵဝ် ႁဵတ်းပဵၼ် ငဝ်ႈငုၼ်းငဝ်ႈၸိုင်ႈၼၼ်ႉ တေၸႂ်ႉလၢႆးလႂ် လိမ်ႇလွတ်ႈတႂ်ႈမိပ်ႇငႅၼ်းမိူင်းၶႄႇၼႆ တႃႉလီသူၼ်ၸႂ်လဵပ်ႈ ႁဵၼ်းႁူႉႁၼ် တႃႇဢဝ်တွၼ်ႈသွၼ်လႃႈ။

မိူင်းၶႄႇၼႆႉ ၼွၵ်ႈလိူဝ်ၶႂ်ႈႁႂ်ႈလႅၼ်လိၼ်တိတ်းၸပ်းမၼ်း ၼိမ်ယဵၼ်သေ ၼင်ႇႁိုဝ် ၽႅၼ်ၵၢၼ်မၢၵ်ႈ မီးၵွတ်ႇလူၵ်ႈမၼ်း တေၸၢင်ႈလႆႈၸဵဝ်းၽေႃႇသၢင်ႈၼၼ်ႉ ၸွမ်းလူၺ်ႈမၼ်းဢမ်ႇဝႆႉၼၵ်းလႆႈတၢင်ႇ ပိူင်ယဝ်ႉလႄႈ ၸင်ႇတၵ်းဢိုတ်းႁၢမ်ႈၵုၼ်ႇသိၼ်ၵိၼ်ယႅမ်ႉ၊ ယႃႈယႃ၊ ၼမ်ႉမၼ်းၸၢၵ်ႈ ၸိူဝ်းၼႆႉ ယႃႇ ႁႂ်ႈလႆႈလတ်းၶဝ်ႈၸူးၼႂ်းၼႃႈ တီႈပလွင်ႈ၊ ၵဝ်ႈၵၢင်ႉ၊ ၶၢင် ၵူၺ်းဢမ်ႇၵႃး ၸႂ်ႉတိုတ်းပႃးၸွမ်းလၢၼ်ႇဝႃႉ၊ မိူင်းလႃး ၵွၼ်ႇယဝ်ႉ။

ၶၼ်ၵုၼ်ႇၼႆႉ ၶိုၼ်ႈထိုင်ၵႂႃႇသၢမ်ပုၼ်ႈ၊ ၼမ်ႉမၼ်းၸၢၵ်ႈ ၼိုင်ႈလီႇတႃႇ လႆႈသိုဝ်ႉၶၢႆၵၼ်ယူႇ 12,000 ယဝ်ႉလႄႈ ႁဵတ်းႁႂ်ႈၵူၼ်းမိူင်းၽၵ်းၵႃႇ ယၢပ်ႇၽိုတ်ႇလိူဝ်ႁႅင်းတႄႉယဝ်ႉ။ ၼႂ်းၼင်ႇၼၼ် သိုၵ်းမၢၼ်ႈ သမ်ႉသူင်ႇၶိူင်ႈမိၼ် ပွႆႇမၢၵ်ႇတႅၵ်ႇသႂ်ႇ။ ၼွင်ၶဵဝ်၊ သႅၼ်ဝီ၊ လႃႈသဵဝ်ႈ၊ ၼမ်ႉၶမ်း၊ လၢဝ်ႇၵၢႆး၊ ၶျိၼ်းသူၺ် ႁိူဝ်၊ မၢၼ်ႈတူင်ႈ၊ ၼမ်ႉသၼ်ႇ တေႃႇထိုင် ပၢင်ဝႃႈ၊ ၶျီႇၽူၺ်ႇ၊ သေႃႉလေႃႇ ၸိူဝ်းၼႆႉ ဢမ်ႇလိူၵ်ႈပဝ်ႉမၢႆ ဢမ်ႇလိူၵ်ႈၶၢဝ်းယၢမ်း ဢမ်ႇဝႄႈၵူၼ်းသိုၵ်းၵူၼ်းမိူင်းဝႆႉ ပဵၼ် ၶဵၼ်တင်းပိုၵ်းသေ တိုၵ်းမင်ယူႇယႂ်းယႂ်း ယဝ်ႉ။

မိူဝ်ႈတင်းၸဝ်ႉတႄႉ ပၢင်တိုၵ်းမိူင်းတႆး ပွတ်းႁွင်ႇ1027 ၼၼ်ႉ တႄႇမႃးလူၺ်ႈ မိူင်းၶႄႇၼႄၾႆးၶဵဝ်ၼႆ ႁူႉငိၼ်းၵၼ်ယူႇသေတႃႉ မိူဝ်ႈလဵဝ်ပႄႇ ထိုင်တီႈမိူင်းၶႄႇႁၢမ်ႈသီးၶိုၼ်းယဝ်ႉလႄႈ ၸိူင်ႉၼင်ႇ MNDAA ၼႆႉ ပေႃးလႆႈၶႆႈၸႂ်တႃႇထွႆဢွၵ်ႇ လႃႈသဵဝ်ႈ၊ သႅၼ်ဝီ ယူႇယဝ်ႉ။

ၵူၺ်းၵႃႈ တႃႇတေပွႆႇပၼ် ၼႂ်းမိုဝ်းသိုၵ်းမၢၼ်ႈတႄႉ တေပဵၼ်ယၢပ်ႇယူႇ။ တေဝႃႈ TNLA ဢၼ်ႁူမ်ႈတင်း PDF သေ လေႃႇတိုၵ်းဝႆႉ တီႈတွင်းၶမ်း ၼႂ်းလၢပ်ႈၼွင်ၶဵဝ်ၼၼ်ႉၵေႃႈ ၵမ်းၼိုင်ႈပဵၼ်တိုင်း ၵမ်း ၼိုင်ႈပဵၼ်ႁၢတ်ႇယူႇ၊ ႁႅင်းၸႂ်ယႂ်ႇသေတႃႉ တၢင်းလင်ဢမ်ႇၸၢင်ႈထႅမ်သႂ်ႇလႄႈ ငဝ်းလၢႆးၼႆႉ ဢမ်ႇမိူၼ် ၸႂ်။ PDF ပွတ်းၵၢင် ၸိူဝ်းၶိုၼ်ႈမႃးၸွႆႈတိုၵ်းၼႆ ၵေႃႈ ဝၢၵ်ႈလူင်းမိူဝ်း ပေႃးၸမ်သဵင်ႈယဝ်ႉလႄႈ တႃႇတေ တႃႉၵၼ်တင်းသိုၵ်းမၢၼ်ႈၼႆႉ ဢမ်ႇငၢႆႈၼင်ႇပီၵၢႆပူၼ်းမႃးယဝ်ႉ။

ၼႃႈသိုၵ်း ဢၼ်တိုၵ်ႉလွတ်ႈၽီမိုဝ်းၶႄႇ ၶဝ်ႈၸိမ်ၵဝ်းၸွမ်းၼႆ ၵူၺ်းမီးတၢင်းမိူင်းရၶႅင်ႇယဝ်ႉယိုင်။ ယွၼ်ႉပိူဝ်ႈ တိုၼ်းလၢင်းမၢၵ်ႈမီးလႄႈ ၼမ်ႉတွၼ်းၽွၼ်းပၢင်ႈ ဢၼ်လူဝ်ႇလႆႈတီႈမိူင်းရၶႅင်ႇၼၼ်ႉ ၼမ်လၢႆၼႃႇၵေႃႈ ပိူင်ၼိုင်ႈ၊ ယွၼ်ႉပဵၼ်ၼႃႈတီႈတိတ်းၸပ်း မိူင်းပင်းၵလႃး ဢၼ်ဢူဢၢႆ US သုမ်ႇ ငုမ်းၵေႃႈ လွင်ႈၼိုင်ႈသေ ၸင်ႇတေပႆႇတိူဝ်ႉၵူၺ်းၵေႃႈ ၸၢင်ႈပဵၼ်ယူႇ။

ၽွင်းမိူဝ်ႈ US တိုၵ်ႉယုင်ႈယၢင်ႈၸွမ်း ၵၢၼ်လိူၵ်ႈတင်ႈ ၸွမ်ၸိုင်ႈမႂ်ႇၼႆႉ ၶတ်းၸႂ်မင်ႁႂ်ႈပၼ်ႁႃၼႂ်း ပွတ်းႁွင်ႇ ယဝ်ႉယိဝ်ႉၵွၼ်ႇ လႅပ်ႈတေဝႃႈၼၼ်ၵေႃႈမီးမီးယဝ်ႉ။ ၼေႇပျီႇတေႃႇ လႄႈ EAO ပွတ်းႁွင်ႇၼႆႉ မၼ်းၵူၺ်းၼပ်ႉပဵၼ် ၶွင်လဵၼ်ႈမၼ်းၼႆ ႁၼ်ၸႅင်ႈၼႃႇ။

လွင်ႈၼႆႉ ႁူႉထိုင်ၵၼ် ၵူႈၸုမ်းၸၢဝ်းယူႇၵေႃႈယႃႇ ယၼ်ၼိူဝ်ၼမ်ႉလိၼ်ႁိၼ်ၽႃလႄႈ မႃႇႁႅင်းၵူႈပိူင် သေ တႃႇတေၶၢမ်ႈပူၼ်ႉလႆႈၼႆႉ ဢမ်ႇငၢႆႈ၊ ၸုမ်းသိုၵ်းမၢၼ်ႈ ၼေႇပျီႇတေႃႇၵေႃႈ ၵႃႈလႆႈယိူၼ်ႉယွၼ်ႇမႃႇၼသေ ၶဝ်ႈၸူးမၼ်း၊ ၸုမ်း ၸၢဝ်းၶိူဝ်းပွတ်းႁွင်ႇၵေႃႈ ၵႃႈလႆႈႁေႈႁူထွမ်ႇၵႂၢမ်းမၼ်း။

ၼႂ်းၼင်ႇၼၼ် ၽႂ်မုင်ႈႁၼ်မႃႇႁႅင်းၵူၼ်းမိူင်းပဵၼ်ယႂ်ႇၵေႃႈ မၼ်းတေထူၺ်ႈၸႂ်ငၢႆႈလူမ်ယဝ်ႉ။ ၽႂ်ဢဝ် လႆႈလွင်ႈၽွမ်ႉၸႂ်ၵူၼ်းမိူင်းၵေႃႈ မၼ်းတေငွၵ်ႈႁႅၼ်လႆႈ ၼႂ်းလၢႆႇၼမ်ႉၵၢၼ်မိူင်း ႁိမ်းႁွမ်းတူင်ႇတၢင်ႇယဝ်ႉ။ ၽႂ်လူင်လိုမ်းဝႆႉမဝ်တေႃႇ မႃႇႁႅင်းလွင်ႈၽွမ်ႉၸႂ်ၵူၼ်းမိူင်းၵေႃႈ မၼ်းတေတၢင်ႇၵွင်းပၢၼ်ႉႁၢတ်ႇပႅတ်ႈ ၸွမ်းၾင်ႇၼမ်ႉၵၢၼ်မိူင်းမိူဝ်းၼႃႈ ၼၼ်ႉယဝ်ႉ။

ၸိုင်ႈမိူင်း Super Power လူင်ၵေႃႈယႃႇ ၸွမ်းလူၺ်ႈၾိင်ႈယဵၼ်ႇငႄႈ ၵၢၼ်မိူင်းပၢၼ်မႂ်ႇသေ တၵ်းတေလႆႈၼပ်ႉယမ် ၶေႃႈၵၢင်ၸႂ်ၵူၼ်းမိူင်း ဢၼ်ဢွမ်ႇလွမ်ႈၽွမ်ႉႁူမ်ႈၵၼ်ၼၼ်ႉယူႇယဝ်ႉ။ လူင်ပွင်ၸိုင်ႈၼႆႉ ၸၢမ်းႁႂ်ႈဝႃႈ ႁဵတ်းတႃႇၵူၼ်းမိူင်းတင်းလုမ်ႈတႄႉတႄႉၸိုင် တေႃႇတေႃႇဢမ်ႇထိုင်လႆႈတီႈပိူၼ်ႈ ငမ် ယိပ်းၸိၵ်းယႅဝ်ငၢႆႈငႅမ်ႈသႄႈ။

ၸုမ်းၸၢဝ်းလုၵ်ႉၽိုၼ်ႉၵေႃႈ တေႃႈမိူၼ်ၼၼ်ယဝ်ႉ။ တိုၵ်းပိူဝ်ႈတႃႇသင်၊ လုၵ်ႉၽိုၼ်ႉၸိူင်ႉႁိုဝ်၊ လုၵ်ႉၽိုၼ်ႉ ၽႂ်လႂ်ၼႆ ပေႃးတင်းၸႅင်ႈလႅင်းသိုဝ်ႈသႂ်မၼ်ႈၵႅၼ်ႇယူႇပႄႇ ဢမ်ႇထိုင်တီႈပိူၼ်ႈ ငမ်ဝၵ်ႉၵမ်ၵိၼ်း လႆႈငၢႆႈငၢႆႈ၊ တိူၵ်ႈတီႈပဵၼ်မီးမႃး ၵေႃႈ ၸၢင်ႈဢဝ်ၵူၼ်းမိူင်း ႁဵတ်းၼႃႈတိူဝ်ႈသေ ၶၢမ်ႈပူၼ်ႉ လႆႈယူႇ ၼၼ်ႉယဝ်ႉ။ ၶိုၼ်ႈယႂ်ႇၶိုတ်းၵၢပ်ႈတၢၼ်ႇလႂ်ၼိုင်ႈ ၵေႃႈ လွင်ႈသိုဝ်ႈယူဝ်းတေႃႇၵူၼ်းမိူင်းတူဝ်ၵဝ်ႇၼႆႉ တိုၼ်းလမ်ႇလွင်ႈ ပဵၼ်ယႂ်ႇယူႇယဝ်ႉ။