သိုၵ်းမၢၼ်ႈ ၶၢၼ်းၵူၼ်းမိူင်းတူၼ်ႈတီး ဢဝ်ႁူမ်ႇလူမ်ႈ ၼႂ်းပွၵ်ႉၼႂ်းယွမ်ႇ ၽွင်းပွႆးႁူင်းၾႆးမိၼ်

ၽွင်းတေႁဵတ်းပွႆးႁူင်းၾႆးမိၼ်ၼႆႉ သိုၵ်းမၢၼ်ႈၸႂ်ႉ ၵူၼ်းပိုၼ်ႉတီႈ ဢဝ်ႁူမ်ႇလူမ်ႈႁင်းၵူၺ်း ၼႂ်းပွၵ်ႉၼႂ်းယွမ်ႇ တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။

တႄႇႁူဝ်လိူၼ်ဢေႃႊၵတ်ႊသ်မႃးၼႆႉ သိုၵ်းမၢၼ်ႈ ၽွတ်ႈၸုမ်းႁူမ်ႇလူမ်ႈလႄႈ ႁွင်ႈၵၢၼ် ၵႂၢတ်ႇလၢင်ႉလွင်ႈၵေႃႇၵၢၼ် ႁၢႆႉဝႆႉ ဝႃႈၼႆသေတႃႉ ၽွင်းၶၢဝ်းပွႆးႁူင်းၾႆးမိၼ် လိူၼ်သိပ်းသွင်မူၼ်းၼႆႉ ၸႂ်ႉၵူၼ်းမိူင်းဢဝ်ႁူမ်ႇလူမ်ႈ ၼႂ်းပွၵ်ႉၼႂ်းယွမ်ႇႁင်းၵူၺ်းထႅင်ႈ ဝႃႈၼႆ။

ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “ၸႂ်ႉၵူၼ်းပိုၼ်ႉတီႈ ပႂ်ႉလုမ်းၽူႈၵွၼ်းပွၵ်ႉ ႁူဝ်ၶမ်ႈ 7 မူင်းထိုင် ၵၢင်ၼႂ်ၸဝ်ႉ 5 မူင်း။ ၼိုင်ႈပွၵ်ႉၼိုင်ႈၵေႃႉ တၵ်းတေလႆႈလဵပ်ႈၼႂ်းပွၵ်ႉၼႂ်းယွမ်ႇ” – ဝႃႈၼႆ။

ဢၼ်သိုၵ်းမၢၼ်ႈ တဵၵ်းၶၢၼ်းၸႂ်ႉပႂ်ႉၼႆႉ ပိူင်လူင်ပဵၼ်ၼႂ်းပွၵ်ႉၽြႃးၶၢဝ် (ဘုရားဖြူ)၊ ပွၵ်ႉၺွင်ႇၽိဝ်ႇသၶၢၼ်း (ညောင် ဖြူစခန်း)လႄႈ ပွၵ်ႉၸဝ်ႈၸၢမ်ႇထုၼ်း (စဝ်စံထွန်း) ၸိူဝ်းၼႆႉ။ ၼႂ်းပွၵ်ႉၼၼ်ႉ ၸုမ်းပျီႇတူႉၸိတ်ႉပဢူဝ်း PNO ၵႆႉၶဝ်ႈၶဝ်ႈဢွၵ်ႇဢွၵ်ႇ ၼႆၵူၼ်းပိုၼ်ႉတီႈလၢတ်ႈၼင်ၼႆ။

မိူဝ်ႈ 27/10/2024 ၼႆႉၵေႃႈ သိုၵ်းမၢၼ်ႈ လူင်းၼႂ်းပွၵ်ႉၼႂ်းယွမ်ႇ ယၢမ်းၵၢင်ၶမ်ႈၵၢင်ၶိုၼ်းသေ ပႂ်ႉၵူတ်ႇထတ်းထဵတ်ႈထၢမ် ၵူၼ်းၼုမ်ႇၵူၼ်းၵမ် ၸိူဝ်းၵႂႃႇမႃး ဝႃႈၼႆ။

ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ၵူၼ်းဢၼ်ႁၼ်မႅၼ်ႈၶဝ်မႃးလၢတ်ႈၼႄဝႃႈ သိုၵ်းမၢၼ်ႈ ၵူတ်ႇထတ်းသေ တီႉၺွပ်းၵႂႃႇၵူၼ်းၼုမ်ႇမွၵ်ႈ 20 ၵေႃႉၼႆဢေႃႈ။ ဢဝ်ၵႂႃႇတၢင်းလႂ် သိုပ်ႇႁဵတ်းသင်ထႅင်ႈတႄႉ ဢမ်ႇႁူႉ”- ဝႃႈၼႆ။

ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ တိုၵ်ႉၸွပ်ႇထၢမ်တူၺ်းယူႇ ပႆႇလႆႈႁူႉတႅတ်ႈတေႃး။

ဝၢႆးလင်ၶၢဝ်ႇၼႆႉ ၽႄႈလၢမ်းၼႂ်းဝဵင်းတူၼ်ႈတီးယဝ်ႉ ၵူၼ်းၼႂ်းပိုၼ်ႉတီႈၵေႃႈ ၽႂ်ဢမ်ႇႁတ်း ဢွၵ်ႇၼွၵ်ႈ ႁိူၼ်းယေးယဝ်ႉၼႆ ၵူၼ်းၸၢႆးပိုၼ်ႉတီႈ သိုပ်ႇလၢတ်ႈထႅင်ႈၼင်ႇၼႆ။

“ပေႃးၵၢင်ၶမ်ႈ ၽႂ်ဢမ်ႇပေႃးႁတ်းဢွၵ်ႇႁိူၼ်းယဝ်ႉ။ ၵၢင်ၶမ်ႈၵၢင်ၶိုၼ်းၵေႃႈ ဢမ်ႇပေႃးငိၼ်းသဵင် ရူတ်ႉၵႃး မိူၼ်မိူဝ်ႈဢွၼ်တၢင်းယဝ်ႉ”- ဝႃႈၼႆ။

တႃႇႁဵတ်းပွႆးႁူင်းၾႆးမိၼ်ၼႆႉ ၵူၼ်းမိူင်းဝဵင်းတူၼ်ႈတီး ၵမ်ႈၼမ် ဢမ်ႇႁၼ်လီ ဢမ်ႇၽွမ်ႉၸွမ်းသေတႃႉ ဢမ်ႇလိူဝ်လႆႈ ၶေႃႈၸီႉသင်ႇသိုၵ်းမၢၼ်ႈ။ တႃႇမႃးၶဝ်ႈပွႆးႁူင်းၾႆးမိၼ် ၵူၼ်းမိူင်းမၢၼ်ႈတူင်ႈပဵင်း ၵမ်ႈၼမ် သင်ႇၶၢတ်ႈႁူင်းႁႅမ်း ၼႂ်းဝဵင်းတူၼ်ႈတီး သမ်ႉပေႃးတဵမ်မူတ်းယဝ်ႉ ဝႃႈၼႆ။

ယၢမ်းလဵဝ် ပဵၼ်ၽွင်းၸမ်ႁဵတ်းပွႆးႁူင်းၾႆးမိၼ် လိူၼ် 12 မူၼ်းလႄႈ ၽူႈမီးပုၼ်ႈၽွၼ်းၵူတ်ႇထတ်း ရူတ်ႉၵႃးဢၼ်ဢမ်ႇမီးဝတ်းဝႂ်။ ၵမ်ႈၼမ်ပဵၼ် ရူတ်ႉၵႃး ၵူၼ်းပၢႆႈၽေးသိုၵ်း ဢၼ်မႃးယူႇဝႆႉ တီႈတူၼ်ႈတီးၼႆ ၵူၼ်းပိုၼ်ႉတီႈလၢတ်ႈၼင်ႇၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)