ၽွင်းၵူၼ်းဝၢၼ်ႈ ၼႂ်းၸႄႈဝဵင်းပၢင်လွင်း တိုၵ်ႉဢွၼ်ၵၼ်ပၢႆႈၽေးသိုၵ်းယူႇၼၼ်ႉ သိုၵ်းမၢၼ်ႈဢဝ်ၻရူၼ်ႊ ပွႆႇမၢၵ်ႇသႂ်ႇ တိူဝ်ႉထေႃႈလႃႈၵျီႈ ၵူၼ်းဝၢၼ်ႈ မၢတ်ႇၸဵပ်း 9 ၵေႃႉ တၢႆ 2 ၵေႃႉ။
မိူဝ်ႈဝႃး ဝၼ်းတီႈ 31/10/2024 ယၢမ်းၵၢင်ၼႂ် 9 မူင်း ၵူၼ်းဝၢၼ်ႈမႂ်ႇ ၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ၶွၼ်ႈ ၵၼ်တီႈႁူင်းႁဵၼ်းတီႈဝၢၼ်ႈသေ ဢၢၼ်းပၢႆႈဢွၵ်ႇဝၢၼ်ႈၸွမ်းၵၼ် တႃႇငိူင်ႉပၢႆႈၽေးသိုၵ်း။ ၽွင်းၼၼ်ႉ သိုၵ်းမၢၼ်ႈတင်ႈၸႂ်ဢဝ်ၻရူၼ်ႊမႃးပွႆႇမၢၵ်ႇ တူၵ်းသႂ်ႇထေႃႈလႃႈၵျီႈၵူၼ်းဝၢၼ်ႈ လမ်းၼိုင်ႈ။ တႅၵ်ႇတိူဝ်ႉသႂ်ႇ ၵူၼ်းဝၢၼ်ႈဢၼ်ၶီႇထေႃႈလႃႈၵျီႈဝႆႉ။ ၵူၼ်းဝၢၼ်ႈ တၢႆထင်တီႈ 2 ၵေႃႉ မၢတ်ႇၸဵပ်းႁၢဝ်ႈႁႅင်း 9 ၵေႃႉ။
ၽူႈၸၢႆး ၵေႃႉၼိုင်ႈ ၵူၼ်းဝၢၼ်ႈၼမ်ႉၽႃမူ ဝဵင်းပၢင်လွင်း လၢတ်ႈၽူႈတွႆႇႁွၵ်ႈဝႃႈ -“ၵူၼ်းဝၢၼ်ႈမႂ်ႇ 100 ပၢႆ ဢၢၼ်းပၢႆႈ ၽေးသိုၵ်းၸွမ်းၵၼ်။ မၢၵ်ႇၼၼ်ႉ မႃးတူၵ်းသႂ်ႇထေႃႈလႃႈၵျီႈၼၼ်ႉလီလီ။ တႅၵ်ႇတိူဝ်ႉသႂ်ႇၵူၼ်းဝၢၼ်ႈတၢႆ 2 ၵေႃႉ။ ၵေႃႉၼိုင်ႈ ပဵၼ်ၼၢင်းယိင်း ၵေႃႉၼိုင်ႈပဵၼ်လုၵ်ႈဢွၼ်ႇ။ ရူတ်ႉၵႃးလူင် ဢၼ်တၢင်ႇ ၵူၼ်းဝၢၼ်ႈဝႆႉ ဢၼ်မီးႁိမ်းထေႃႈလႃႈၵျီႈၼၼ်ႉတႄႉ ဢမ်ႇတၼ်းၵွႆ။ ၵူၼ်းဝၢၼ်ႈလွတ်ႈၽေး”- ဝႃႈၼႆ။
ၼၢင်းယိင်း ဢၼ်မၢၵ်ႇတႅၵ်ႇတိူဝ်ႉသႂ်ႇသေတၢႆၼၼ်ႉတႄႉ ဢႃယုမီးမွၵ်ႈလႂ်ၼႆ ဢမ်ႇလႆႈႁူႉ။ လုၵ်ႈဢွၼ်ႇ ၸၢႆးၼၼ်ႉတႄႉ ဢႃယုမီး 10 ၶူပ်ႇ။
ၵူၼ်းမၢတ်ႇၸဵပ်း ၸိူဝ်းၼၼ်ႉၵေႃႈ ဢဝ်ၵႂႃႇယူတ်းယႃတူဝ်ဝႆႉ တီႈလႂ် ပႆႇလႆႈႁူႉတႅတ်ႈတေႃး။ ယွၼ်ႉပိူဝ်ႈ ၵၢၼ်ၵပ်းသိုပ်ႇတိတ်းတေႃႇၵၼ် ယၢပ်ႇၽိုတ်ႇ – ၵူၼ်းမိူင်းဝဵင်းပၢင်လွင်းလၢတ်ႈၼင်ႇၼႆ။
ၵူၼ်းဝၢၼ်ႈမႂ်ႇ ဢၼ်ပၢႆႈၽေးပၢင်တိုၵ်း ဢွၵ်ႇဝၢၼ်ႈမႃးၼၼ်ႉၵေႃႈ မႃးထူပ်းၸုမ်းသိုၵ်းမၢၼ်ႈ ၵၢင်တၢင်းသေ ၺႃးသိုၵ်းမၢၼ်ႈႁႄႉၵိုတ်း ၵူတ်ႇထတ်းထဵတ်ႈထၢမ်တင်းႁိုင်။ ႁဵတ်းႁႂ်ႈၵူၼ်းမိူင်းတူၵ်းၸႂ်ၵူဝ်ႁႄ ဢမ်ႇ မီးလွင်ႈႁူမ်ႇလူမ်ႈ။
ၵူၼ်းၸၢႆး ယူႇၸမ်ဝၢၼ်ႈမႂ်ႇ ဢၼ်ပၢႆႈၽေးသိုၵ်း မႃးမီးတီႈဝဵင်းပၢင်လွင်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈလႄႈ သိုၵ်းယၢင်းလႅင် ဢိၵ်ႇ PDF ပဵၼ်ပၢင်တိုၵ်းၵၼ် ၼႂ်းၵႄႈၸႄႈဝဵင်းပၢင်လွင်း – ၸႄႈဝဵင်း ၾၢႆၶုၼ်။ ပဵၼ်ၶၢဝ်းၵူၼ်းဝၢၼ်ႈဢဝ် မၢၵ်ႇၶဝ်ႈတဝ်ႈၼမ်ႉၼႂ်းသူၼ်သေတႃႉ ယွၼ်ႉပၢင်တိုၵ်းသေ ဢမ်ႇၸၢင်ႈၵႂႃႇၵဵပ်းသင်။ လိူဝ်ၼၼ်ႉ လွင်ႈၵပ်းသိုပ်ႇတိတ်းတေႃႇၵေႃႈၶၢတ်ႇမူတ်းလႄႈ ၸုမ်းၸွႆႈထႅမ်ၵူၼ်းပၢႆႈ ၽေးသိုၵ်းၵေႃႈ ဢမ်ႇၸၢင်ႈတိတ်းတေႃႇၸူး ၵၼ်၊ တႃႇတၢင်းၵမ်ႉၸွႆႈၵေႃႈ ဢမ်ႇၸၢင်ႈယိုၼ်းထိုင်လႆႈ”- ဝႃႈၼႆ။
တီႈဝဵင်းပၢင်လွင်းၼႆႉ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO ႁူမ်ႈၵၼ်သေ ပိုတ်းယိုဝ်းၵၼ်တင်း တပ်ႉသိုၵ်းၽွမ်ႉႁူမ်ႈယၢင်းလႅင် တၢင်းဝၢၼ်ႈၼွၵ်ႇဝူဝ်း၊ လွႆၵဵင်ႈ၊ ဝၢၼ်ႈၼမ်ႉၽႃမူ၊ ၾၢႆၶုၼ်၊ ဝၢၼ်ႈသွင်းပျွင်း ၸိူဝ်းၼႆႉ ၶႂ်ႈမီးလိူၼ်ပၢႆယဝ်ႉ။
ၶိူင်ႈမိၼ်သိုၵ်းမၢၼ်ႈ မိၼ်လတ်းၵႂႃႇမႃး ၼိူဝ်ဝဵင်းပၢင်လွင်း ၼိုင်ႈၶိုၼ်း မွၵ်ႈ 2 – 3 လမ်း ၵူႈၶိုၼ်း – ၵူၼ်းပၢင်လွင်း ၵေႃႉ ၼိုင်ႈ သိုပ်ႇလၢတ်ႈတီႈၽူႈတွႆႇႁွၵ်ႈၼင်ႇၼႆ။
ဝၢၼ်ႈမႂ်ႇၼႆႉ မီးၾၢႆႇၸၢၼ်းဝဵင်းပၢင်လွင်း ယၢၼ်ၵႆၵၼ်တင်း ဝဵင်းပၢင်လွင်း 25 လၵ်း။ ၸွမ်းသၢပ်ႇဝဵင်းပၢင်လွင်း – မိူင်းပၢႆး – ၾၢႆၶုၼ် ၸိူဝ်းၼႆႉ ပၢင်တိုၵ်း တိုၵ်ႉသိုပ်ႇပဵၼ်ၶိူဝ်းယႂ်း ၵူၼ်းမိူင်းၼပ်ႉႁူဝ်ႁဵင် လႆႈပၢႆႈၽေးသိုၵ်း။ မၢင်ၸိူဝ်း ဢမ်ႇၸၢင်ႈပၢႆႈၵႂႃႇၵႆလႄႈ ပၢႆႈယူႇၸွမ်း ၾင်ႇၼမ်ႉၽီလူးသေ ၽုၵ်ႇၶဝ်ႈ၊ ၽုၵ်ႇမၢၵ်ႇ ႁႃၵိၼ်လဵင်ႉတွင်ႉ။
ယၢမ်းလဵဝ်သမ်ႉ လႆႈထူပ်းၽေးၼမ်ႉထူမ်ႈထႅင်ႈလႄႈ လႆႈဢွၼ်ၵၼ်ပၢႆႈထႅင်ႈ ၵူၼ်းမိူင်းဢမ်ႇမီးတီႈယူႇ တီႈၵိၼ် ၸိူဝ်းထူပ်းၽေး ဢိုပ်းယၢၵ်ႈၵေႃႈ မီးၼမ် ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ