မိူဝ်ႈၼႆႉ ဝၼ်းတီႈ 01/11/2024 ယၢမ်းၵၢင်ၼႂ်ၸဝ်ႉ 3 မူင်းၶိုင်ႈ မၢၵ်ႇၶိူင်ႈမိၼ် သိုၵ်းမၢၼ်ႈ ယိုတ်းမိူင်း မႃးပွႆႇတီႈလုမ်းၵဵပ်းၶွၼ်ႇ၊ လုမ်းၽဵဝ်ႈမူၺ်ႉယႃႈမဝ်းၵမ်၊ လုမ်းၾႆးၾႃႉ၊ လုမ်းၶႄၾႆး၊ ႁူင်းႁဵၼ်းလႄႈ ႁိမ်းတူဝ်း ၵဵတ်ႉဢေႊသျိူဝ်ႊဝေႃႊ ၼႂ်းဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ တိူဝ်ႉၺႃးၵူၼ်းလူႉတၢႆ 1 ၵေႃႉ။

ၵူၼ်းပိုၼ်ႉတီႈ ဝဵင်းၵူတ်ႉၶၢႆ ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ယူႇတီႈ ႁဝ်းၶႃႈ လႆႈႁူႉတႄႉ တင်းမူတ်း ၶဝ်မႃးပွႆႇ 13 လုၵ်ႈ။ ၼႂ်းၼၼ်ႉ မၢၵ်ႇလူင်သႅၼ်း 500 ပွင်ႇ 2 လုၵ်ႈ၊ မၢၵ်ႇဢွၼ်ႇ 11 လုၵ်ႈ။ တိူဝ်ႉၺႃးၵူၼ်းလူႉတၢႆ ၼၼ်ႉတႄႉ ႁဝ်းၶႃႈ ပႆႇလႆႈႁူႉၶေႃႈမုလ်းတႅတ်ႈတေႃးလီ”- ဝႃႈၼႆ။

ယူႇတီႈ ႁွင်ႈၵၢၼ် ပိုၼ်ၽၢဝ်ႇ ၶွင်တပ်ႉသိုၵ်းတဢၢင်း TNLA တႄႉ ဢွၵ်ႇဝႆႉဝႃႈ – ၶိူင်ႈမိၼ် သိုၵ်းမၢၼ်ႈ မႃးပွႆႇမၢၵ်ႇတင်းမူတ်း 8 လုၵ်ႈ၊ ယၢမ်းၵၢင်ၼႂ် 3:28 မူင်း ၵမ်းၼိုင်ႈ၊ ယၢမ်း 3:33 မူင်း ၵမ်းၼိုင်ႈလႄႈ ယၢမ်း 3:38 မူင်း ၵမ်းၼိုင်ႈ။ ၶိူင်ႈမိၼ် ဢၼ်မႃးပွႆႇသမ်ႉ ပဵၼ်ၵျႅၵ်ႊၾၢႆႊတိူဝ်ႊ 2 လမ်း မႃးပွႆႇ 3 ၵမ်း။ တိူဝ်ႉၺႃး ၵူၼ်းမၢတ်ႇၸဵပ်း 1 ၵေႃႉလႄႈ ၵႂၢႆး 1 တူဝ်။ ယဝ်ႉၵေႃႈ လုမ်းလူင်ပွင်ၸိုင်ႈမၢၼ်ႈ လူႉၵွႆၸွမ်း ၵမ်ႈၽွင်ႈ။ မၢၵ်ႇဢၼ်ပႆႇတႅၵ်ႇသမ်ႉ 1 လုၵ်ႈ ဝႃႈၼႆ။

ၵူၼ်းသႅၼ်ဝီ ၽူႈယိင်း ဢႃယု 30 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ငိၼ်းသဵင်မၢၵ်ႇ မႃးပွႆႇ ၼၼ်ႉ ယွၼ်ႈထိုင်တီႈသႅၼ်ဝီၼႆႉ လိၼ်ပေႃးသၼ်ႇဢေႃႈ။ ဢၼ်ၶႃႈလႆႈငိၼ်းတႄႉ မႃးပွႆႇ 2 ၵမ်း။ ဢၼ်မႃးပွႆႇၵမ်းလင်ၼႆႉ ယွၼ်ႈႁႅင်းဢေႃႈ။ ၶိူင်ႈမိၼ်ၶဝ်ၼၼ်ႉ လတ်းမႃးတၢင်းၼိူဝ်ဝဵင်းသႅၼ်ဝီၼႆႉသေ ၵႂႃႇပွႆႇဢေႃႈ”- ဝႃႈၼႆ။

မၢၵ်ႇၶိူင်ႈမိၼ် သိုၵ်းမၢၼ်ႈ ဢၼ်မႃးတူၵ်းသႂ်ႇ  ၵူၼ်းလူႉတၢႆၵေႃႉၼိုင်ႈၼၼ် ပဵၼ်ၵူၼ်းသိုၵ်းတဢၢင်း TNLA ဝႃႈၼႆ – ယူႇတီႈ သိုဝ်ႇၶၢဝ်ႇ RFA တင်း The Irrawaddy တႄႉ ဢွၵ်ႇဝႆႉၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 28/10/2024 ယၢမ်းၵၢင်ၼႂ် ၼၼ်ႉၵေႃႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇတီႈပုင်ႇၼမ်ႉသႃ ဝၢၼ်ႈပဵင်းလူင် ဢိူင်ႇၼမ်ႉမေႃး ၸႄႈဝဵင်းၵူတ်ႉၶၢႆ တင်းမူတ်း 6 လုၵ်ႈ။ ဢွင်ႈတီႈၼၼ်ႈ ယွၼ်ႉ ပဵၼ်တီႈၾိုၵ်းၵၢၼ်သိုၵ်း ၶွင်တပ်ႉသိုၵ်းတဢၢင်း – ၵူၼ်းပိုၼ်ႉတီႈ ဝဵင်းၵူတ်ႉၶၢႆလၢတ်ႈ။

ပူၼ်ႉမႃး မိူဝ်ႈဝၼ်းတီႈ 04/08/2024 ၼၼ်ႉၵေႃႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ တီႈၵၢတ်ႇလူင် ဝဵင်းၵူတ်ႉ ၶၢႆ တင်းမူတ်း 4 ၵမ်း တိူဝ်ႉၺႃး ၵူၼ်းမိူင်းလူႉတၢႆ 6 ၵေႃႉ၊ မၢတ်ႇၸဵပ်း ဢမ်ႇယွမ်း 10 ၊ ႁၢၼ်ႉၶၢႆၶူဝ်းၵုၼ်ႇ လူႉၵွႆ 400 ပၢႆ – ႁွင်ႈ ၵၢၼ်ပိုၼ်ၽၢဝ်ႇ ၶွင် TNLA ဢွၵ်ႇဝႆႉၼင်ႇၼႆ။