ၾႆးတဵၼ်းလူမ်ႉ မႆႈႁိူၼ်းယေးၵူၼ်းလၢႆးၶႃႈ လင်ၼိုင်ႈ ၽွင်းၸဝ်ႈႁိူၼ်းဢမ်ႇယူႇ ၶူဝ်းႁိူၼ်းယေးမႆႈမူတ်း လူႉသုမ်းၼပ်ႉႁူဝ်ပၢၵ်ႇသႅၼ်ပျႃး ဝႃႈၼႆ။
ဝၼ်းတီႈ 31/10/2024 ယၢမ်းၵၢင်ၶမ်ႈမွၵ်ႈ 8 မူင်း ၾႆးမႆႈႁိူၼ်း မေႃယႃ တေႃႇၼႃႇၼူး (သြႃႇမသမ်းၶဵမ်) တီႈပွၵ်ႉ 1 ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း လင်ၼိုင်ႈ ယွၼ်ႉၾႆးတဵၼ်းလူမ်ႉ။
ၵူၼ်းပိုၼ်ႉတီႈ ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၶႃႈႁၼ်ၼၼ်ႉ ၾႆးလုၵ်ႉမႆႈယဝ်ႉ။ ၶဝ်တႆႈတဵၼ်း ၽြႃးတီႈႁိူၼ်းဝႆႉသေ ဢွၼ်ၵၼ်ၵႂႃႇၸွႆႈ တီႈၵျွင်းၽြႃးႁိၼ်ႇတူႇၶဝ် ယွၼ်ႉဝႃႈမိူဝ်ႈၼႆႉ ပဵၼ်ဝၼ်း တေႇဝႃႇလီႇၶဝ်။ ၾႆး ၼႆႉ တႄႇမႆႈၸၼ်ႉၼိူဝ်လူင်းမႃး တၼ်းမႆႈၶၢဝ်းတၢင်း 1 ၸူဝ်ႈမူင်းၵူၺ်း မႆႈမူတ်းယဝ်ႉ။ ၶူဝ်းႁိူၼ်းယေးတႄႉ ဢမ်ႇတၼ်းလႆႈသင် လူႉသုမ်းၸွမ်းၾႆးမႆႈ တေဢမ်ႇယွမ်း 300 သႅၼ်ပျႃး – 500 သႅၼ် ပျႃးၼႆႉ ၸွမ်းၼင်ႇႁဝ်းၶႃႈ လၢမ်းၶၢတ်ႈတႄႉ”- ဝႃႈၼႆ။
ႁိူၼ်းယေး မေႃယႃ တေႃႇၼႃႇၼူးၼႆႉ ပဵၼ်ႁိူၼ်းသွင်ၸၼ်ႉ၊ ၸၼ်ႉၼိူဝ် ပဵၼ်မႆႉပႅၼ်ႈ၊ ၸၼ်ႉတႂ်ႈသမ်ႉ ၵေႃႇဢုတ်ႇ။ ယဝ်ႉၵေႃႈ ၼႂ်းႁိူၼ်းၼၼ်ႉ မီးၵူၼ်းႁိူၼ်းယူႇဝႆႉ 3 ၵေႃႉ။ တီႈၸၼ်ႉတႂ်ႈသမ်ႉ ၵူၼ်းၼုမ်ႇ လႃႈသဵဝ်ႈ ပၢႆႈၽေးသိုၵ်း မႃး ၶၢတ်ႈယူႇဝႆႉမွၵ်ႈ 5 ၵေႃႉ ဝႃႈၼႆ။
“မိူဝ်ႈၽွင်း ၾႆးမႆႈၼၼ်ႉ ၸဝ်ႈႁိူၼ်းၵေႃႈ ဢမ်ႇယူႇ၊ ၵူၼ်းၶၢတ်ႈႁိူၼ်း ၼၼ်ႉၵေႃႈ ဢမ်ႇယူႇ ၶဝ်ဢွၼ်ၵၼ် ၵႂႃႇၸွႆႈတီႈ ၵျွင်းၽြႃးၶဝ်မူတ်း ယွၼ်ႉဝႃႈ ၸဝ်ႈႁိူၼ်းၼၼ်ႉ ပဵၼ်ၸၢဝ်းၵေႃႇရၶႃး။ ၵွပ်ႈၼႆလႄႈ သင်ဝႃႈ တေၵႂႃႇတၢင်းၼွၵ်ႈၸိုင် ၾႆးၽြႃး ဢၼ်ႁဝ်းတႆႈဝႆႉၼၼ်ႉ မွတ်ႇသေၸင်ႇဢွၵ်ႇၵႂႃႇၼႆ လီတီႈသုတ်းယဝ်ႉ။ ဢမ်ႇၼၼ် သင်ဢမ်ႇမွတ်ႈၵႂႃႇ ၸိုင် တီႈတႆႈတဵၼ်းႁဝ်းၼၼ်ႉ သႂ်ႇဝႆႉပၢၼ်ႉၼမ်ႉ သင်ဝႃႈ တဵၼ်းလူမ်ႉၵေႃႈ ႁႂ်ႈလူမ်ႉသႂ်ႇၼႂ်းပၢၼ်ႉၼမ်ႉ။ လွင်ႈတႆႈတဵၼ်း ၾႆးၽြႃးၼႆႉ ဝႆႉမဝ်မၢင်ဢမ်ႇလႆႈ မိူဝ်ႈႁဝ်းယူႇႁိူၼ်းလႄႈသင်၊ ဢွၵ်ႇၵႂႃႇတၢင်းၼွၵ်ႈလႄႈသင် ၸိူဝ်းၼႆႉ”- ၵူၼ်းပိုၼ်ႉတီႈ ဝဵင်းလၢႆးၶႃႈ သိုပ်ႇလၢတ်ႈၼႄၼင်ႇၼႆ။
ဢိင်ၼိူဝ် လွင်ႈၾႆးမႆႈႁိူၼ်းယေးၼႆႉသေ ယၢမ်းလဵဝ် ယူႇတီႈ ၵူၼ်းမိူင်းလၢႆးၶႃႈ၊ ၸုမ်းၸွႆႈထႅမ် ၵူၼ်းပၢႆႈ ၽေးလႄႈ ၸုမ်းတူင်ႇဝူင်းၵူၼ်း တိုၵ်းသူၼ်းၵၼ် ၸွမ်းၼင်ႇ ပွင်ပဵၼ်လႆႈ တေၵမ်ႉၸွႆႈထႅမ် ၵူၼ်းပၢႆႈၽေး ဢၼ်မႃးၶၢတ်ႈယူႇဝႆႉ ၼၼ်ႉ – ၽူႈတူင်ႉၼိုင် တူင်ႇဝူင်းၵူၼ်းလၢတ်ႈ။
 တီႈပွၵ်ႉ 1 ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း လင်ၼိုင်ႈ ယွၼ်ႉၾႆးတဵၼ်းလူမ်ႉ။){kind=link}