ပီၼႆႉ ၼမ်ႉထူမ်ႈသူၼ်ႁႆႈၼႃး ဝဵင်းသီႇသႅင်ႇလိူဝ်ႁႅင်း တေႃႇထိုင်ယၢမ်းလဵဝ် ၼမ်ႉပႆႇယွမ်းလူင်းသေတႃႉ ဢိင်ၼိူဝ် ပၢင်တိုၵ်းသိုၵ်းသိူဝ်ၵေႃႈ ၾၢႆႇၼိုင်ႈ၊ ၸဝ်ႈသူၼ်မႆႈၸႂ် ၵူဝ်ၶၼ်ၶဝ်ႈၵၢပ်ႇ လူတ်းလူင်းတိၵ်းတိၵ်းၵေႃႈ ႁင်းမၼ်းလႄႈ ၼႅတ်ႈ ဢဝ်ဢွၵ်ႇၶၢႆ။

လိူၼ်ဢွၵ်ႊထူဝ်ႊပိူဝ်ႊၼႆႉ ပဵၼ်ၶၢဝ်းၸဝ်ႈသူၼ်ဝဵင်းသီႇသႅင်ႇ ဢဝ်ၶဝ်ႈၵၢပ်ႇၼႂ်းသူၼ်ဢွၵ်ႇၶၢႆ၊ ၵွၼ်ႇၼႃႈ ပဵၼ်ပၢင်တိုၵ်း ၽွင်းဝၢၼ်ႈမိူင်းၵတ်းယဵၼ်ၼၼ်ႉတႄႉ ၶၢဝ်းၼႆႉ ပဵၼ်ၶၢဝ်းၸဝ်ႈသူၼ်မီးငိုၼ်း။

ပီၼႆႉတႄႉ ယွၼ်ႉပိူဝ်ႈၼမ်ႉထူမ်ႈ သူၼ်ႁႆႈၼႃးလႄႈ မၢၵ်ႇၶဝ်ႈတဝ်ႈၼမ်ႉလူႉသုမ်းၼမ်။ ၸဝ်ႈသူၼ် ၵူဝ်လႆႈၶၢႆၶဝ်ႈၵၢပ်ႇ ၶၼ်ထုၵ်ႇ။  ၶဝ်ႈၵၢပ်ႇ ဢမ်ႇပႆႇမၢၵ်ႈ ပႆႇၵႄႇသေတႃႉၵေႃႈ ၼႅတ်ႈဢဝ်ဢွၵ်ႇၶၢႆ။ 

လုင်းၸၢႆး ၸဝ်ႈသူၼ် ၶဝ်ႈၵၢပ်ႇဝဵင်းသီႇသႅင်ႇ လၢတ်ႈၽူႈတွႆႇႁွၵ်ႈဝႃႈ -“ငဝ်းလၢႆးဝၢၼ်ႈမိူင်း ဢမ်ႇပေႃးလီလႄႈ ၽႂ်ၵေႃႈ ဢမ်ႇပႂ်ႉ ၶဝ်ႈၶႄႇႁႅင်ႈယဝ်ႉ။ ႁႅင်ႈဢမ်ႇႁႅင်ႈၵေႃႈ ဢဝ်ၶၢႆဢၼ်လိပ်းၸိူင်ႉၼၼ်ယဝ်ႉ။ ပေႃး ဢဝ်ၶၢႆယဝ်ႉၵေႃႈ ၵတ်းၸႂ်ယဝ်ႉ။ ၵႃႈၶၼ်ဢမ်ႇလႆႈယႂ်ႇၵေႃႈ ၶႅၼ်းလိူဝ်ဢမ်ႇတၼ်းလႆႈၶၢႆ။ မႆႈၸႂ်ၵူဝ် ၶၼ် ၶဝ်ႈၵၢပ်ႇ ယွမ်းလူင်းၼမ်လိူဝ်ၼႆႉ”- ဝႃႈ ၼႆ။

ၸဝ်ႈသူၼ်ၶဝ်ႈၵၢပ်ႇ ဝဵင်းသီႇသႅင်ႇလၢတ်ႈဝႃႈ ၽွင်းၶၢဝ်းၽုၵ်ႇၶဝ်ႈၵၢပ်ႇၼၼ်ႉ ၶၼ်ၵုၼ်ႇၵိၼ်ယႅမ်ႉ ပႃးၸဵမ်ၶၼ်ၵုၼ်ႇ ၽုၵ်ႇသွမ်ႈၵေႃႈ ၶိုၼ်ႈႁႅင်း၊ ထိုင်ၶၢဝ်းၵဵပ်းၶဝ်ႈၵၢပ်ႇသမ်ႉ လႆႈၶၢႆၶဝ်ႈၵၢပ်ႇၶၼ်ထုၵ်ႇ ၸိူင်ႉၼႆ ၸဝ်ႈသူၼ်ၶဝ်ႈၵၢပ်ႇၵမ်ႈၼမ် လူႉသုမ်း၊ မၢင်ၸိူဝ်း တိုၼ်းလၢင်းၵူၺ်းၵေႃႈ ဢမ်ႇၶိုၼ်းလႆႈ ဝႃႈၼႆ။

လုင်းၸၢႆး ၸဝ်ႈသူၼ်ၶဝ်ႈၵၢပ်ႇ ဝဵင်းသီႇသႅင်ႇ သိုပ်ႇလၢတ်ႈထႅင်ႈဝႃႈ -“ငိုၼ်းတိုၼ်းလၢင်းၼမ်လႄႈ ယၢမ်းလဵဝ် ပေႃးဢမ်ႇၶၢႆလႆႈ 1 ၸွႆႉ 1,500 ပျႃးၼႆ ပဵၼ်ဢၼ်သုမ်းယဝ်ႉ။ ယႃႇဝႃႈလႆႈၶိုၼ်းၵႃႈႁႅင်းလႃႈ သုမ်းပႃး တိုၼ်းလၢင်းလူးၵွၼ်ႇ” – ဝႃႈၼႆ။

ယၢမ်းလဵဝ် ၶၼ်ၶဝ်ႈၵၢပ်ႇလိပ်းလႆႈၶၢႆ ၸွႆႉ 800 ပျႃး။ ၶဝ်ႈၵၢပ်ႇဢၼ်တၢၵ်ႇႁႅင်ႈယဝ်ႉၼၼ်ႉ လႆႈၶၢႆၼိုင်ၸွႆႉ 1,200 ပျႃး။ ႁူင်းႁပ်ႉသိုဝ်ႉၶဝ်ႈၵၢပ်ႇမၢင်တီႈ ပေႃးပဵၼ်ၶဝ်ႈၵၢပ်ႇၼမ်ႉထူမ်ႈ ဢမ်ႇႁပ်ႉသိုဝ်ႉ –  ၼႆလူးၵွၼ်ႇ၊ ၸဝ်ႈသူၼ်ၶဝ်ႈၵၢပ်ႇ ဝဵင်းသီႇသႅင်ႇ လၢတ်ႈၼင်ႇၼႆ။

တႄႇဢဝ် ၽွင်းတၢင်းပဵၼ်ၶူဝ်ႊဝိတ်ႉလၢမ်းၽႄႈမႃးၼႆႉ ပၢႆးမၢၵ်ႈမီးတူၵ်း၊ မၢၵ်ႇၶဝ်ႈတဝ်ႈၼမ်ႉ ၼႂ်းသူၼ် ဢမ်ႇလႆႈၶၢႆ၊ ၸဝ်ႈသူၼ် ၵူၼ်းမိူင်း လႆႈဢွၼ်ၵၼ် ဢဝ်ငိုၼ်းၵူႈငိုၼ်းၶီႈ တီႈပေႃႈလဵင်ႉ ၸဝ်ႈႁပ်ႉသိုဝ်ႉၶဝ်ႈၵၢပ်ႇသေ မႃးၽုၵ်ႇသွမ်ႈ။ ၸႂ်ယႂ်ႇမၢၵ်ႇၶဝ်ႈတဝ်ႈၼမ်ႉ ဢၼ်တေဢွၵ်ႇသေ တေဢဝ်မႃးၶၢႆပၼ်တႅၼ်းၼီႈၶိုၼ်း ၼႆသေတႃႉ ထိုင်ၶၢဝ်းဢဝ်ၶၢႆမႃး လႆႈၶၼ်ထုၵ်ႇၶၼ်ပေႃးလႄႈ ၸဝ်ႈသူၼ်သုမ်းၵူႈပီ ထပ်းၵၼ်မႃး 3 ပီယဝ်ႉ။

ဢိင်ၼိူဝ်လွင်ႈၼႆႉသေ ၸဝ်ႈသူၼ်ၶဝ်ႈၵၢပ်ႇ ၵမ်ႈၽွင်ႈ ၶတ်းၸႂ်လႅၵ်ႈၽုၵ်ႇၶဝ်ႈ၊ ထူဝ်ႇလိၼ် တႅၼ်းတၢင် တူၺ်းယူႇ ဝႃႈ ၼႆ။

ၶဝ်ႈၵၢပ်ႇ ဢၼ်ၽုၵ်ႇၼႂ်းမိူင်းတႆး ၵမ်ႈၼမ်ၼႆႉ တေႃႉသူင်ႇၶၢႆဢွၵ်ႇမိူင်းၶႄႇ၊ ၽွင်းတၢင်းပဵၼ်ၶူဝ်ႊဝိတ်ႉ လၢမ်းၽႄႈၶဝ်ႈမႃးၼၼ်ႉ မိူင်းၶႄႇ ဢမ်ႇႁပ်ႉသိုဝ်ႉယဝ်ႉလႄႈ ၸဝ်ႈသူၼ်ၶဝ်ႈၵၢပ်ႇ ပဵၼ်ဢၼ်ယၢပ်ႇၽိုတ်ႇ ၵိၼ်းၸႂ်။

တႅမ်ႈ – ယိင်းသဵဝ်ႈၶၢဝ်(ၽူႈသိုဝ်ႇၶၢဝ်ႇၾိုၵ်းၵၢၼ်)